Snickers

తెలంగాణ ఆర్థిక ప్రగతికి గ్లోబల్ కేపబిలిటీ సెంటర్ల (జీసీసీ)ను కీలక చోదక శక్తులుగా తీర్చిదిద్దేందుకు ప్రణాళికాబద్ధంగా కృషి చేస్తున్నామని రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్‌బాబు పేర్కొన్నారు. కొత్త టెక్నాలజీ అభివృద్ధి, ఆర్ అండ్ డీ, డేటా అనలిటిక్స్, ప్రొడక్ట్ డిజైన్, ఇంజినీరింగ్, ఇన్నోవేషన్ తదితర విభాగాల్లోనూ కీలక పాత్ర పోషించేలా వాటికి మార్గనిర్దేశం చేస్తున్నామన్నారు. స్నికర్స్, పెడిగ్రీ, రాయల్ కానిన్ తదితర ప్రముఖ బ్రాండ్లతో ప్రపంచవ్యాప్తంగా గుర్తింపు పొందిన మార్స్ సంస్థ హైదరాబాద్‌లోని గచ్చిబౌలి ఫైనాన్షియల్ డిస్ట్రిక్ట్ లో 60 వేల చదరపు అడుగుల విస్తీర్ణంలో అభివృద్ధి చేసిన జీసీసీని ఆయన గురువారం లాంఛనంగా ప్రారంభించారు.ఈ సందర్భంగా మంత్రి శ్రీధర్‌బాబు మాట్లాడుతూ... హైదరాబాద్‌ను సంప్రదాయ ఐటీ సేవల కేంద్రం నుంచి ప్రపంచస్థాయి టెక్నాలజీ, ఇన్నోవేషన్, నాలెడ్జ్ ఆధారిత ఆర్థిక వ్యవస్థగా అభివృద్ధి చేసేందుకు చిత్తశుద్ధితో కృషి చేస్తున్నామన్నారు. కొత్త రంగాల్లో పెట్టుబడులను ఆకర్షించేందుకు, ఉద్యోగ అవకాశాలను పెంపొందించేందుకు ఐటీ/ఐటీఈఎస్ రంగంలో హైదరాబాద్‌కు ఉన్న అనుకూలతలను ఇతర పరిశ్రమలతో అనుసంధానించడంపై ప్రత్యేకంగా దృష్టి సారించామన్నారు. ఈ లక్ష్యాలకు అనుగుణంగానే ‘తెలంగాణ రైజింగ్ 2047’ విజన్‌లోనూ టెక్నాలజీ, పరిశ్రమలు, నైపుణ్యాభివృద్ధికి అత్యంత ప్రాధాన్యత ఇచ్చామన్నారు.జెన్‌పాక్ట్ సహకారంతో ఏర్పాటైన ఈ కేంద్రంలో ప్రస్తుతం 400 మందికి పైగా ఉపాధి లభించనుందని, రాబోయే రోజుల్లో ఈ సంఖ్య వేయికి పెరుగుతుందన్నారు. మార్స్ గ్లోబల్ ఆపరేషన్స్ కు అవసరమైన డిజిటల్, డేటా, ఏఐ సామర్థ్యాలను మరింత బలోపేతం చేస్తుందన్నారు. కార్యక్రమంలో మార్స్ చీఫ్ ఫైనాన్షియల్ ఆఫీసర్ క్లాస్ ఆగార్డ్, జెన్‌పాక్ట్ ప్రతినిధి తరుణ్ చోప్రా, అమెరికా కాన్సులేట్ జనరల్ హైదరాబాద్ ప్రతినిధి ఎమీలియా బి. స్మిత్ తదితరులు పాల్గొన్నారు.

తైవాన్‌ విషయమై ఆగ్రహం​తో ఊగిపోతున్న చైనా తాజాగా స్నీకర్‌ సంస్థ తయారీదారుల చేత క్షమాపణలు చెప్పించుకుంది. ఈ మేరకు  స్నీకర్‌ క్యాండీ చాకోలెట్‌ తయారీ సంస్థ మార్స్‌ రిగ్లీ చైనా సోషల్‌ మీడియా వేదికగా క్షమాపణలు చెపింది. ఇంతకీ ఏ జరిగిందంటే...స్నీకర్స్‌ క్యాండీకి సంబంధించిన ఈవెంట్‌ ప్రమోటింగ్‌లో భాగంగా ఒక వీడియోని విడుదల చేసింది. ఆ వీడియోలో పరిమిత పరిధిలో లభించే స్నీకర్‌క్యాండీలు కేవలం దక్షిణ కొరియా, మలేషియా, తైవాన్‌ దేశల్లోనే లభిస్తుంది అని వస్తుంది. అంతే ఈ వీడియో చైనాకి సంబంధించిన మైక్రోబ్లాగింగ్‌ ప్లాట్‌ ఫాం వీబోలో తెగ వైరల్‌ అయ్యింది. దీంతో చైనీస్‌ నెటిజన్లు తైవాన్‌ ఒక దేశామా అంటూ ఆగ్రహంతో సూటిగా ప్రశ్నల వర్షం కురిపించారు. అంతే దెబ్బకు స్నీకర్‌ చాకోలెట్‌ తయారీ సంస్థ మార్స్‌ రిగ్లీ తన చైనా వీబో అకౌంట్‌లో క్షమాపణలు చెప్పడమే కాక ఆ వీడియోని సవరించింది కూడా. (చదవండి: తైవాన్‌ టెన్షల నడుమ భారత్‌తో చర్చలు జరిపేందుకు వచ్చిన చైనా)


 అంతర్జాతీయ చాక్లెట్ కంపెనీ మార్స్ ఉత్పత్తుల్లో రెడ్ ప్లాస్టిక్ పదార్థం లభించడం కలకలం రేపుతోంది. గత నెల 8న జర్మనీలో ఓ వినియోగదారుడు కొనుగోలు చేసిన స్నిక్కర్స్ బార్‌ చాక్లెట్‌లో రెడ్ ప్లాస్టిక్ లభించడంతో.. మార్స్ పెద్ద ఎత్తున మార్కెట్‌ నుంచి తన ఉత్పత్తులను ఉపసంహరించుకుంటోంది. దాదాపు 55 దేశాల్లో తన చాక్లెట్ ఉత్పత్తులను ఈ కంపెనీ మార్కెట్ నుంచి వెనుకకు తీసుకుంటున్నట్టు ఓ ప్రకటనలో తెలిపింది. దీంతో కంపెనీకి వందల మిలియన్ డాలర్ల నష్టం వాటిల్లనున్నట్టు భావిస్తున్నారు.
 
 జర్మనీ వ్యక్తి తాను కొన్న స్నికర్స్‌ చాక్లెట్‌లో రెడ్ ప్లాస్టిక్‌ ఉన్నట్టు గుర్తించి వెంటనే కంపెనీకి ఫిర్యాదు చేశాడు. నెదర్లాండ్‌ వేఘేల్‌లోని ఫ్యాక్టరీలో తయారైన ఈ చాక్లెట్‌లో ప్లాస్టిక్ కలిసినట్టు కంపెనీ గుర్తించింది. తయారీ ప్రక్రియలో భాగంగా రక్షణ కోసం ఉపయోగించే కవర్‌కు చెందిన ప్లాస్టిక్ పదార్థం చాక్లెట్‌లో కలిసినట్టు గుర్తించారు. దీంతో అంతర్జాతీయంగా పెద్ద ఎత్తున మార్స్ తన చాక్లెట్ ఉత్పత్తులను మార్కెట్‌ నుంచి ఉపసంహరించుకుంటోంది. మార్స్‌కు సంబంధించిన మిల్కీ వే, స్నిక్కర్స్, సెలబ్రేషన్స్, మినీ మిక్స్ వంటి ఉత్పత్తులపై ఈ ప్రభావం పడినట్టు కంపెనీ మంగళవారం నాటి ప్రకటనలో వెల్లడించింది. వినియోగదారులు కొనుగోలు చేసే చాక్లెట్లలో రెడ్‌ ప్లాస్టిక్‌ పదార్ధం వల్ల ఇబ్బంది పడకూడదనే ఉద్దేశంతోనే ముందుజాగ్రత్త చర్యగా వీటిని మార్కెట్ నుంచి ఉపసంహరించుకుంటున్నట్టు తెలుస్తోంది.
 
 యూఏఈలో నిషేధం
 ప్రజారోగ్యం దృష్ట్యా యునైటెడ్ అరబ్ ఏమిరెట్స్‌ (యూఏఈ)లో మార్స్‌ కంపెనీ చాక్లెట్లపై ఆ దేశ ప్రభుత్వం నిషేధం విధించింది. మార్స్‌కు సంబంధించిన మిల్కీ వే, స్నిక్కర్స్, సెలబ్రేషన్స్, మినీ మిక్స్ వంటి చాక్లెట్లపై నిషేధం విధించినట్టు యూఏఈ పర్యావరణ, వాతావరణ మంత్రిత్వశాఖ ఓ ప్రకటనలో తెలిపింది. నెదర్లాండ్‌కు చెందిన మార్స్ కంపెనీ స్వచ్ఛందంగా మార్కెట్‌ నుంచి తన చాక్లెట్‌లను ఉపసంహరించుకుంటున్న నేపథ్యంలో ఈ నిర్ణయం తీసుకున్నట్టు పేర్కొంది.