Personal Finance Briefs

మోనికా హెలెన్‌ ఫైనాల్సియల్‌ జర్నలిస్ట్, రచయిత్రి, స్పీకర్, పర్సనల్‌ ఫైనాన్స్‌ మేనేజ్‌మెంట్‌ నిపుణురాలు. బెంగళూరులోని ఇండియన్‌ ఇనిస్టిట్యూట్‌ ఆఫ్‌ మేనేజ్‌మెంట్‌లో చదువుకున్న మోనిక స్టాన్‌ఫోర్డ్‌ యూనిర్శిటీలో బ్రాడ్‌కాస్ట్‌ జర్నలిజంలో పట్టా అందుకున్నారు. జటిలమైన ఆర్థిక విషయాలను కూడా సామాన్యులకు సైతం అర్థమయ్యేలా చెప్పడం ఆమె ప్రత్యేకత. ఆమె ప్రసిద్ధ పుస్తకం... లెట్స్‌ టాక్‌ మనీ. ఏది చేయాలి? ఏది చేయకూడదు?... మన ఆర్థిక విషయాలకు సంబంధించి సరైన అవగాహన కలిగించే ఈ పుస్తకంలో నుంచి కొన్ని విషయాలు...‘రెండు వారాలు తిరిగేసరికల్లా నెల జీతం మొత్తం ఖర్చయిపోతుంది. డబ్బు ఎక్కడికి పోతుందో ఏమిటో!’ అని చాలామంది గందరగోళానికి గురవుతుంటారు. క్లాష్‌ ఫ్లో మేనేజ్‌మెంట్‌ సిస్టమ్‌ గురించి అవగాహన లేకపోవడమే దీనికి కారణం. ఈ సిస్టమ్‌ డబ్బును ఖర్చు, పొదుపుగా వర్గీకరించడంలో సహాయపడుతుంది.నీడ్స్‌ వర్సెస్‌ గ్రీడ్‌→ ‘ఇవ్వాళ ఖర్చు చేశాం. రేపు సంపాదిస్తాం’ అనే నిర్లక్ష్య ధోరణి వీడి... ఎందుకు ఖర్చు చేశాం? అనవసర ఖర్చా? అవసరమైన ఖర్చా? ఈ విషయాలు ఎప్పటికప్పుడూ విశ్లేషించుకుంటే వృథా ఖర్చులను గణనీయంగా తగ్గించుకోవచ్చు. ‘ఎమోషనల్‌ పర్చేజింగ్‌’కు దూరంగా ఉండాలి.→ త్రీ–బకెట్‌ (మూడు ఖాతాల) విధానాన్ని అమలు చేయాలి.1. ఇన్‌కామ్‌ ఎకౌంట్‌ (అన్ని రకాల నగదు రాబడుల కోసం)2. ఖర్చుల ఖాతా–స్పెండ్‌ ఇట్‌ ఎకౌంట్‌ (నెలవారీ ఖర్చుల కోసం)3. పెట్టుబడుల ఖాతా: ఇన్వెస్ట్‌–ఇట్‌ ఎకౌంట్‌ (పొదుపు, పెట్టుబడుల కోసం) త్రీ–బకెట్‌ సిస్టమ్‌ను అమలు చేసిన మూడు నెలల లోపు మనకు అవసరమైన ఖర్చులు, అనవసరమైన ఖర్చుల గురించి ఒక అవగాహన వస్తుంది.→ పొదుపు పద్దతులను అలవాటు చేసుకోవడానికి మొదట్లో సమయం పట్టవచ్చు. పొదుపు విషయంలో క్రమబద్ధమైన విధానాన్ని అలవాటు చేసుకోవాలి. ఫలితాలు అద్భుతంగా ఉంటాయి.→ జీవితం అన్నాక ఊహించని ఖర్చులు ఉంటాయి. అలాంటి సందర్భాలో ఎవరినో అప్పు అడిగే బదులు, ఇబ్బందులు పడే బదులు అత్యవసర నిధి (ఎమర్జెన్సీ ఫండ్‌) తప్పనిసరిగా ఏర్పాటు చేసుకోవాలి.→ పొదుపు చేయడానికి, పెట్టుబడి పెట్టడానికి అవసరమైన డబ్బును సమకూర్చుకోవాలంటే క్యాష్‌ ఫ్లో సిస్టమ్‌ ఉండాలి. ఆ సిస్టమ్‌ను మనం సమగ్రంగా అర్థం చేసుకోవాలి.→ డబ్బుకు ఒక నిర్దిష్ట ఉద్దేశాన్ని (లేబుల్‌)ను కేటాయించడం వల్ల దాన్ని ఇతర అవసరాలకు వాడకుండా నిరోధించవచ్చు.నీటిని కూడా...సాధారణంగా ఎండాకాలంలో మాట్లాడే నీటి పొదుపు గురించి వర్షాభావం పుణ్యమా అని ఈ కాలంలో కూడా తప్పనిసరిగా మాట్లాడుకోవాల్సి వస్తోంది. మన ఇంట్లో నీటి పొదుపుకు కొన్ని మార్గాలు...→ చాలా నగరాల్లో నీరు వృథా కావడానికి కారణం... పళ్లు తోముకునేటప్పుడు, ముఖం కడిగేటప్పుడు, గిన్నెలు కడిగేటప్పుడు కుళాయిని మూసివేయకపోవడం. దీన్ని నివారించడానికి కుళాయి తెరిచిన ప్రతీసారి అప్రమత్తంగా ఉండాలి. నీరు వృథా కాకుండా చూడాలి.→ కుళాయిల నుండి నీరు వృథాగా పోయే సమస్యకు వాటర్‌ ఏరేటర్‌లు ఒకే ఒక్క పరిష్కార మార్గం. సాధారణ కుళాయిలతో పోలిస్తే ఏరేటర్‌లు నిమిషానికి దాదాపు 35–40 శాతం నీటిని ఆదా చేస్తాయి.→ తడి చెత్తను ఎరువుగా మార్చే ప్రక్రియ కంపోస్టింగ్‌. పట్టణ ప్రాంతాలలో మిద్దెతోటలు ప్రాచుర్యం పొందుతుండడం వల్ల మొక్కలు ఉన్న ఇళ్లలో నీటి వినియోగం పెరిగింది. కంపోస్టింగ్‌ ఎరువును ఉపయోగించడం ద్వారా తక్కువ నీరు అవసరమవుతుంది.→ షవర్‌హెడ్స్‌ ద్వారా ఎన్నో లీటర్‌ల నీరు వృథా అవుతోంది. దీనికి బదులు ఒక బకెట్‌ నీటితో స్నానం చేస్తే మంచిది. సాధారణ షవర్‌హెడ్స్‌కు బదులుగా నీటిని ఆదా చేసే షవర్‌హెడ్స్‌ను అమర్చుకోవడం ద్వారా 80 శాతం వరకు నీటి వినియోగాన్ని తగ్గించుకోవచ్చు. ఇంధన వినియోగాన్ని కూడా తగ్గించుకోవచ్చు.→ నీటిని పునర్వినియోగించుకోవడమే నీటి పొదుపుకు ఉత్తమ మార్గం. ఉదా: కూరగాయలు, పండ్లు కడిగిన నీటిని తోట పనులకు తిరిగి ఉపయోగించవచ్చు. కూరగాయలను ఆవిరిపై ఉడికించడానికి ఉపయోగించిన నీటిని పారబోస్తుంటాం. చల్లారిన తరువాత ఈ నీటిని మొక్కలకు తిరిగి పోయడానికి ఉపయోగించవచ్చు. వంట నీటిని తిరిగి ఉపయోగించడం అనేది వ్యర్థాలను తగ్గించే సులభ మార్గం. మొక్కలకు సహజమైన బలాన్ని కూడా ఇస్తుంది.→ కండెన్సేషన్‌ ట్రేలు ఉన్న డిహ్యూమిడిఫైయర్‌లు, రిఫ్రిజిరేటర్‌లు నీటిని గ్రహిస్తాయి. ఈ నీటిని మురుగు కాలువలో పారబోయడానికి బదులుగా ఫ్లోర్‌ను శుభ్రం చేయడానికి, టాయిలెట్లను ఫ్లష్‌ చేయడానికి, మొక్కలకు నీరు పోయడానికి తిరిగి ఉపయోగించవచ్చు.→ కూరగాయలు, పండ్లు కడిగేటప్పుడు చాలా నీరు వృథా అవుతుంది. దీనికి బదులుగా ఒక గిన్నె లేదా బేసిన్‌ను ఉపయోగించడం ద్వారా నీటి వృథాను అరికట్టవచ్చు.→ వంటగదులు, బాత్రూమ్‌లలో పుష్‌–బటన్‌ కుళాయిలు లేదా మోషన్‌–సెన్సార్‌ కళాయిలను అమర్చడం ద్వారా నీటి వృథాను గణనీయంగా తగ్గించవచ్చు. ఈ కుళాయిలు వాటంతట అవే ఆగిపోతాయి. చేతులు కడుక్కోవడం, పళ్లు తోముకోవడం...మొదలైన వాటికి సంబంధించి నీటి వాడకాన్ని పరిమితం చేయడానికి చిన్న ట్యాప్‌ టైమర్స్‌ ఉపయోగపడతాయి.


 ఐఆర్‌ఎఫ్‌సీ ట్యాక్స్ ఫ్రీ బాండ్లు
 ఇండియన్ రైల్వేస్ ఫైనాన్స్ కార్పొరేషన్(ఐఆర్‌ఎఫ్‌సీ) రూ. 4,532 కోట్ల విలువైన ట్యాక్స్ ఫ్రీ బాండ్లను జారీ చేస్తోంది. డిసెంబర్ 8న ప్రారంభమయ్యే ఈ బాండ్లపై కూపన్ రేటును గరిష్టంగా 7.53 శాతంగా నిర్ణయించారు. 10, 15, 20 ఏళ్ల కాలపరిమితి గల బాండ్లపై రిటైల్ ఇన్వెస్టర్లకు కూపన్ రేట్లను వరుసగా 7.32%, 7.53%, 7.50% నిర్ణయించారు. 15 ఏళ్ల కాలపరిమితి కంటే 20 ఏళ్ల కాలపరిమితి గల బాండ్లపై తక్కువ వడ్డీరేటును ఆఫర్ చేస్తుండటం గమనార్హం.
 
 కనీస ఇన్వెస్ట్‌మెంట్ విలువను రూ. 1,000 నిర్ణయించారు. ఈ బాండ్లపై ఇన్వెస్ట్ చేసిన మొత్తంపై ఎటువంటి పన్ను మినహాయింపులు లభించవు. కానీ ఈ బాండ్స్ అందించే వడ్డీని పన్ను లేని ఆదాయంగా పరిగణిస్తారు. కాబట్టి వీటిని ట్యాక్స్ ఫ్రీ బాండ్స్‌గా వ్యవహరిస్తారు.
  
 టాటా నుంచి థీమ్ ఫండ్స్
 టాటా మ్యూచువల్ ఫండ్ సంస్థ ఐదు రకాల థీమాటిక్స్ ఫండ్స్‌ను ప్రవేశపెట్టింది. బ్యాంకింగ్ అండ్ ఫైనాన్షియల్ సర్వీసెస్, డిజిటల్ ఇండియా, ఇండియా కన్జూమర్, ఇండియా ఫార్మా అండ్ హెల్త్‌కేర్, రిసోర్సెస్ అండ్ ఎనర్జీ ఫండ్ పేరుతో ఐదు రకాల థీమ్స్‌ను ప్రవేశపెట్టింది. ఇందులో మీకు నచ్చిన థీమ్‌ను ఎంచుకుంటే ఆ రంగంలోని కంపెనీల్లో మాత్రమే ఇన్వెస్ట్ చేస్తారు.
 
 ప్రస్తుతం ప్రధానమంత్రి డిజిటల్ ఇండియా మంత్రం జపిస్తుండటంతో ఇన్వెస్టర్లను ఆకర్షించడానికి డిజిటల్ ఇండియా థీమ్ ఫండ్‌ను ప్రవేశపెట్టింది. ఈ ఫండ్‌ను ఎంచుకుంటే డిజిటల్ ఇండియాలో భాగమయ్యే అంటే ఐటీ, టెలికాం, ఆనెలైన్ మార్కెటింగ్ వంటి కంపెనీల్లో ఇన్వెస్ట్ చేస్తుంది. డిసెంబర్ 4న ప్రారంభమైన ఈ ఐదు ఫండ్స్ ఎన్‌ఎఫ్‌వోలు డిసెంబర్ 18తో ముగుస్తుంది. కనీస ఇన్వెస్ట్‌మెంట్‌ను రూ. 5,000గా నిర్ణయించారు. డైవర్సిఫైడ్ ఈక్విటీ ఫండ్స్‌తో ఈ థీమాటిక్ ఫండ్స్‌లో రిస్క్ అధికంగా ఉంటుందన్న విషయం మర్చిపోవద్దు.
  
 పేటీఎం ప్రీపెయిడ్ కార్డులు
 మొబైల్ వాలెట్ సేవలు అందిస్తున్న పేటీఎం సంస్థ ప్రీపెయిడ్ కార్డులను ప్రవేశపెట్టింది. ఇందుకోసం ఐసీఐసీఐ బ్యాంక్‌తో కలిసి కో-బ్రాండెడ్ వర్చువల్ ప్రీపెయిడ్ కార్డులను ప్రారంభించింది. మొబైల్ వాలెట్‌కు అనుసంధానమైన పనిచేసే ఈ కార్డులతో వివిధ వెబ్‌సైట్లలో కొనుగోళ్లు చేసుకునే సౌలభ్యాన్ని అందుబాటులోకి తెచ్చింది. నెట్‌బ్యాంకింగ్, డెబిట్, క్రెడిట్ కార్డులు లేని వారికి ఉపయోగపడే విధంగా ఈ ప్రీపెయిడ్ కార్డులను ప్రవేశపెట్టినట్లు పేటీఎం పేర్కొంది.
  
 స్టాక్ హోల్డింగ్‌తో అర్థయంత్ర ఒప్పందం
 స్టాక్ హోల్డింగ్ కార్పొరేషన్ ఆఫ్ ఇండియాతో (ఎస్‌హెచ్‌సీఐఎల్) ఫైనాన్షియల్ సేవలను అందించే అర్థయంత్ర ఒప్పందం కుదుర్చుకుంది. ఈ ఒప్పందంలో భాగం గా ఎస్‌హెచ్‌సీఐఎల్‌కు చెందిన ఖాతాదారులకు వ్యక్తిగత వెల్త్‌మేనేజ్‌మెంట్ సేవలను అర్థయంత్ర అందిస్తుంది. ప్రస్తుతం ఎస్‌హెచ్‌సీఐఎల్‌కు దేశవ్యాప్తంగా 180 శాఖలతో 7 లక్షల మంది ఖాతాదారులను కలిగి ఉంది.