ఓసోస్‌.. అంత కథ ఉందా!?! ఓషో శిష్యురాలి మీద తీసేంత సినిమా కథ!ప్రతి మగాడి విజయం వెనుకా ఒక స్త్రీ ఉంటుందంటారు. ఈ.. స్త్రీ వెనుక ఓషో ఉన్నాడు. అప్పుడది ఓషో కథ అవుతుంది కానీ.. ఆ స్త్రీ కథ అవుతుందా?అవుతుంది. ఆమె మామూలు స్త్రీ కాదు. అందం చందం, క్రైమ్‌ డివైన్‌ మిక్స్‌ అయిన స్త్రీ. పేరు షీలా. ఆమె పేరు మీదే ప్రియాంకా చోప్రా ఇప్పుడుబయోపిక్‌ తియ్యబోతున్నారు.   ఈ ఏడాది వాలెంటైన్స్‌డేకి ఒక రోజు ముందు హాలీవుడ్‌ మూవీ ‘ఈజెంటిట్‌ రొమాంటిక్‌’  విడుదల అవుతోంది. సెటైరికల్‌ ఫ్యాంటసీ కామెడీ. నటాలీ అనే బొద్దుగా ఉండే ఒక ఆర్కిటెక్ట్‌.. న్యూయార్క్‌లో తన కెరీర్‌ని నిర్మించుకుంటూ ఉంటుంది. రొమాన్స్, కామెడీ ఉన్న సినిమాలంటే ఆమెకు పిచ్చి. వాటిని చూసి ఊహల్లోకి వెళ్లిపోతుంటుంది. అలాగని ప్రేమంటే ఆమెకు ఇష్టమేమీ ఉండదు. ఓ రోజు సబ్‌వేలో వెళుతుంటే ఓ దొంగను తప్పించుకోబోయి, ఓ గుంజకు కొట్టుకుని కింద పడి స్పృహ కోల్పోతుంది. తర్వాత కళ్లు తెరిచి చూసేసరికి వేరే ఏదో లోకంలో ఉంటుంది. అది ప్రేమలోకం! ఆ లోకంలో కూడా తను ప్రేమలో పడదు. అయితే తన ప్రేమలో పడే వ్యక్తి కోసం నటాలీ వెదుకుతుంటుంది.  నటాలీ ప్రేమకథకు ఇవాళ్టి మన ‘ఫ్యామిలీ’ స్టోరీకి ఏ కొంచమో తప్ప ఏమాత్రం సంబంధం లేదు. ఆ ‘ఏ కొంచెమో’.. ప్రియాంకా చోప్రా! ‘ఈజెంటిట్‌ రొమాంటిక్‌’ చిత్రంలో ప్రియాంక చిన్న పాత్ర వేశారు. చిన్నదే కానీ, సినిమాకు కీలకమైనది. యోగా అంబాసిడర్‌ క్యారెక్టర్‌. ఇంచుమించు అదే పాత్రలో త్వరలోనే పూర్తి స్థాయి హీరోయిన్‌గా ఓ హాలీవుడ్‌ చిత్రంలో ప్రియాంక నటించబోతున్నారు. అందులో ప్రియాంక ఆధ్యాత్మిక ఆశ్రమవాసిగా కనిపిస్తారు. 76 ఏళ్ల  ఆస్కార్‌ అవార్డు దర్శకుడు బ్యారీ లెవిన్‌సన్‌ ఆ చిత్రానికి డైరెక్టర్‌. నిర్మాత ప్రియాంకే. షూటింగ్‌ మొదలు కాలేదు. టైటిల్‌ ఖరారైంది.  ‘మా ఆనంద్‌ షీలా’!  ‘ఓషో’ భగవాన్‌ రజనీష్‌ భక్తురాలే ఆనంద్‌ షీలా. రజనీష్‌ ఆశ్రమంలో చేరాక ‘మా ఆనంద్‌ షీలా’ అయ్యారామె. షీలా ప్రస్తుతం స్విట్జర్లాండ్‌లో ఉంటున్నారు. ఈ 69 ఏళ్ల వయసులో ఆమె ఎలాంటి జీవితం గడుపుతున్నారో ఎవరికీ తెలియదు. (రెండు నర్సింగ్‌ హోమ్‌లైతే నడుపుతున్నారు). భక్తురాలు ఆధ్యాత్మిక జీవితమే కదా గడుపుతారు. కావచ్చు. అయితే నేరస్థురాలిగా ఆమె గడిపిన జీవితమే ఎక్కువ. ఆ పాపాలేమైనా ఆమెను వెంటాడుతూ ఉంటాయా?! చెప్పలేం. ప్రియాంక నిర్మించబోతున్న షీలా బయోపిక్‌లో షీలా ఆధ్యాత్మిక జీవితంతో పాటు, షీలా నేరగ్రస్థ జీవనం రెండూ మిళితమై ఉండబోతున్నాయి. భక్తిభావం, నేరస్వభావం రెండూ కలగలిసి ఉన్న స్త్రీ మూర్తి షీలాను రెండు సబ్జెక్టులుగా విడదీసి సినిమా తియ్యడం సాధ్యం కాదు కాబట్టి! రజనీష్‌ ధ్యానముద్రలతో ఆయనకు దగ్గరై, ఆయనకు మరింత దగ్గరవడానికి దారి తప్పి తనకు తెలియకుండానే నేర ప్రపంచంలోకి వెళ్లిపోయిన  భక్తురాలు షీలా.  అటెంప్ట్‌ టు మర్డర్, సెకండ్‌–డిగ్రీ అసాల్ట్, ఇల్లీగల్‌ వైర్‌–టాపింగ్, ఆర్సన్, ఇమిగ్రేషన్‌ ఫ్రాడ్‌.. ఇన్ని కేసులలో ఆమె దోషి. వీటన్నిటికన్నా పెద్ద నేరం మరొకటి ఉంది. మరొక నేరం కాదు. అగ్రరాజ్యాన్నే దిగ్భ్రాంతిపరచిన  నేరం!భారత ప్రధాని ఇందిరాగాంధీ హత్య. 1984లో ప్రపంచానికి పెద్ద వార్త. శ్రీమతి గాంధీ హత్య జరగకుండా ఉండి ఉంటే, అదే ఏడాది యు.ఎస్‌లో జరిగిన ఒక ఘటన ప్రపంచానికి పెద్ద వార్త అయి ఉండేది! ఆ ఏడాది ఒరెగాన్‌ రాష్ట్రంలోని డాలెస్‌ సిటీలో అకస్మాత్తుగా 750 మందికి పైగా మంచాన పడ్డారు. వాళ్లంతా లోకల్‌గా ఉన్న పది రెస్టారెంట్‌లలో సలాడ్‌ తిన్నవారే. అంతకన్నా ముఖ్యం.. వాళ్లంతా వాస్కో కౌంటీ ఎన్నికల్లో ఓటేయవలసిన వాళ్లు. అయితే ఆ ఈటింగ్‌కి, ఈ ఓటింగ్‌కి మధ్య లింకు ఉంటుందని ఎవరు ఊహిస్తారు?మెడికల్‌ రిపోర్ట్‌లు చూస్తే ఆ పది రెస్టారెంట్‌లలో సలాడ్స్‌ తిని జబ్బున పడిన ఆ ఏడొందల యాభై మందిలో ‘సాల్మొనెల్లా’ బ్యాక్టీరియా బయటపడింది! టైఫాయిడ్‌ వచ్చేది ఈ బ్యాక్టీరియా వల్లనే. తాగిన నీరు, తీసుకున్న ఆహారం కలుషితమైనదైతే సాల్మొనెల్లా ఒంట్లోకి ప్రవేశించి, మనిషిని కుంగదీస్తుంది. నూటనాలుగు డిగ్రీల జ్వరం వస్తుంది. చెమటలు పడతాయి. విరేచనాలు అవుతాయి. చర్మంపై దద్దుర్లు వస్తాయి. ఒంటిపై గులాబీ రంగు మచ్చలు కనిపిస్తాయి. జ్వరం తగ్గనని మొరాయిస్తుంటుంది. లేవలేరు. కూర్చోలేరు. పడుకుని ఉండడమే. ఇంట్లో పడుకుని ఉన్నవాళ్ల దగ్గరికి బ్యాలెట్‌ బాక్సు రాదు కదా. అలా ఆ మొత్తం ఓట్లన్నీ పోలవకుండా అలా మంచంపైనే ఉండిపోయాయి! ఎవరికి లాభం? పోలీస్‌ ఎంక్వయిరీ మొదలైంది.  మొదలైంది కానీ, వెంటనే మొదలు కాలేదు. మొదలు కావాలంటే మొదట అనుమానం రావాలి. డాలెస్‌ ప్రాంతంలో ఒకేసారి ఇన్ని ఓట్లు ఎందుకు పోల్‌ అవలేదని ఆరా తీస్తే ఈ టైఫాయిడ్‌ కేసులు బయటపడ్డాయి. టైఫాయిడ్‌ ఎందుకొచ్చిందని ఆరా తీస్తే రెస్టారెంట్‌లలో తిన్న ఫుడ్‌ బయటపడింది. రెస్టారెంట్‌లన్నిటిలో ఒకేసారి ఫుడ్‌ ఎలా కలుషితం అయిందని ఆరా దీస్తే ‘మా’ ఆనంద్‌ షీలా’ బయటపడింది. ఆమెను ఇంటరాగేట్‌ చేస్తే.. అసలు విషయం బయటపడింది! ‘మా’ ఆనంద్‌ షీలా.. భగవాన్‌ శ్రీ రజనీష్‌  రైట్‌ హ్యాండ్‌. ఒరెగాన్‌ స్టేట్‌ వాస్కో కౌంటీలో ‘రజనీష్‌పురం’ ఉంది. రజనీష్‌పురంలో రజనీష్‌ లేనప్పుడు ఆదేశాలన్నీ ‘మా’ ఆనంద్‌ షీలావే. అలా ఆమె ఇచ్చిన ఒక రహస్య ఆదేశంతోనే డాలెస్‌ రెస్టారెంట్‌లలోని ఆహార పదార్థాలలోకి ‘సాల్మొనెల్లా’ బ్యాక్టీరియా చేరింది!బ్యాక్టీరియా తనకై తను చేరితే కలుషితం. మనుషులు చేర్చితే.. బయోటెర్రర్‌ ఎటాక్‌. యు.ఎస్‌. ఒక్కసారిగా ఉలిక్కిపడింది. అమెరికా చరిత్రలోనే తొలి బయోటెర్రర్‌ ఎటాక్‌! తొలి మాత్రమే కాదు, చివరిది కూడా. మళ్లీ ఇంతవరకు అలాంటి ఎటాక్‌ అక్కడ జరగలేదు. వాస్కో కౌంటీ ఎన్నికల్లో రజనీష్‌ అనుచరులు కొందరు పోటీ చేస్తున్నారు. వారి గెలుపు అవకాశాలను పెంచడానికే ‘మా’ ఆనంద్‌ షీలా బయోటెర్రర్‌ ఎటాక్‌ చేయించారని విచారణలో బయటపడింది. ‘మా’ షీలాకు ఇరవై ఏళ్ల జైలు శిక్ష పడింది. 39 నెలల శిక్షాకాలం తర్వాత మంచి ప్రవర్తనపై విడుదలైంది. స్విట్జర్లాండ్‌ వెళ్లిపోయింది. శ్రీమతి గాంధీ హత్య జరగకుండా ఉండి ఉంటే అమెరికా బయోటెర్రర్‌ దాడి ఘటన పెద్ద వార్తే అయి ఉండేదని అనుకోవడం ఎందుకంటే.. ప్రపంచానికి బయోటెర్రర్‌ దాడులు కొత్త కాకపోయినా, అమెరికాలో జరగడం కొత్తే. అమెరికాపై అలాంటి ప్రయోగం చెయ్యాలంటే గట్స్‌ ఉండాలి. అయితే ‘మా’ ఆనంద్‌ షీలా కు గట్స్‌ కంటే కూడా భగవాన్‌ రజనీష్‌ మీద ఆరాధనా భావమే ఎక్కువగా ఉంది. అందుకే ఆయన కోసం ఏమైనా చేయాలనుకుంది. చేసింది.  భగవాన్‌ శ్రీ ‘ఓషో’ రజనీష్‌ది ఇండియా. మధ్యప్రదేశ్‌లో జన్మించారు. అతడికన్నా పద్దెనిమిదేళ్లు చిన్నదైన మా ఆనంద్‌ షీలాది కూడా ఇండియానే. పుట్టింది గుజరాత్‌లో. ఈ రెండు స్వదేశీ ఆత్మలు విదేశాల్లో ఏకమయ్యాయి. షీలా అసలు పేరు షీలా అంబాలాల్‌. రజనీష్‌ ఆశ్రమానికి వచ్చాక ‘మా’ ఆనంద్‌ షీలా అయింది. అతడికి ప్రియ శిష్యురాలైంది. ఈ ఆనంద్‌ ఎవరో తెలీదు. బహుశా షీలాలోని ఆనంద భావన అయుంటుంది. ప్రియాంక ఈమె జీవితకథను సినిమాగా తీయడానికి ఎందుకు ఎంచుకున్నారో వివరాలు వెల్లడి కాలేదు. ‘ఎలెన్‌ షో’ అతిథిగా వెళ్లినప్పుడు మా ఆనంద్‌ షీలాపై తను సినిమా తియ్యబోతున్నట్లు మాత్రమే చెప్పారు. బహుశా.. ఓషోలోని దివ్యతేజస్సు షీలాను ఆకర్షించిన విధంగానే.. ‘ఈజెంటిట్‌ రొమాంటిక్‌’ చిత్రంలోని యోగా అంబాసిడర్‌ పాత్ర ప్రియాంకను షీలాపై సినిమా తీసేలా ప్రేరేపించి ఉండొచ్చు. ‘ఓషో’ సన్నిధిలో షీలా 1981 నుంచి 1985 వరకు ఉన్నారు. ఆ మధ్యకాలంలో ఆమె చాలా చురుగ్గా ఉన్నారు. వివిధ దేశాలలోని ప్రతినిధులతో ఓషో తరఫున చాలాసార్లు ఆమే సంప్రదింపులు, చర్చలు, సమావేశాలు జరిపేవారు. ఓషో మాటల్లోని ఆకర్షణ శక్తి.. షీలా చూపుల్లోని సమ్మోహన శక్తి ఆ నాలుగేళ్లూ ఈ భూగోళాన్ని ధ్యానముద్ర వేయించాయి. ఓషోపై 1974 నుంచి 2018 వరకు దాదాపు పది సినిమాలు వచ్చాయి. ఏడాది క్రితం కూడా నెట్‌ఫ్లిక్స్‌లో ఓషో జీవితం ‘వైల్డ్‌ వైల్డ్‌ కంట్రీ’ అనే పేరుతో ఆరు పార్టులుగా రిలీజ్‌ అయింది. వాటన్నిటికీ నేరేషన్‌ షీలానే. షీలాపై తొలిసారి వస్తున్న చిత్రం మాత్రం ప్రియాంక తియ్యబోతున్నదే.                       రజనీష్‌పురం షీలా తండ్రే షీలాను భగవాన్‌ రజనీష్‌కు పరిచయం చేశారు. ఆ తర్వాత ఆమె ఓషోకు ప్రియ శిష్యురాలు అయ్యారు. పుణెలోని ‘ఓషో మెడిటేషన్‌ సెంటర్‌’కు, ఓరెగాన్‌లోని ‘రజనీష్‌పురం’ ఆశ్రమానికి మధ్య షీలా తరచు ప్రయాణిస్తూ ఓషో సూచనల మేరకు విధులు నిర్వర్తిస్తుండేవారు. యు.ఎస్‌.లోని ఓరెగాన్‌ ప్రశాంతంగా ఉండే విశాలమైన ఎడారి  ప్రదేశం. జనాభా తక్కువ. రజనీష్‌పురంలోని ఆశ్రమం ధ్యానానికి అపరిచితులు వచ్చిపోతుండటంపై.. లోపల అసాంఘిక, అవినీతి కార్యకలాపాలు జరుగుతున్నాయని స్థానికులు ప్రభుత్వ అధికారులకు ఫిర్యాదు చేయడంతో రజనీష్‌పురం ఉనికి కష్టం అయింది. షీలా రంగంలోకి దిగి, స్థానిక మండలిలో ఎన్నికల్లో ఓషో అనుచరులను పోటీకి నిలబెట్టారు. వాళ్లు గెలిస్తే కనుక ఫిర్యాదులు చేసేవారిని అడ్డుకోవచ్చని ఆమె ఆలోచన. ప్రత్యర్థులకు ఓట్లు పడకుండా ఉండడం కోసం ఆమె చివరికి బయోటెర్రర్‌ ఎటాక్‌కి కూడా తెగించారు. 1990లో రజనీష్‌ చనిపోయాక, అంతకుముందే షీలా స్విట్జర్లాండ్‌ వెళ్లిపోయారు. ఆ తర్వాతి నుంచి రజనీష్‌పురం తన వైభవాన్ని కోల్పోతూ వచ్చి ఆ స్థలం కూడా  చేతులు మారిపోయింది. 

ఆమిర్‌ ఖాన్‌ ప్లాన్‌ మారిందని బాలీవుడ్‌ టాక్‌. ఏంటా ప్లాన్‌ అంటే? ఆధ్యాత్మిక గురువు ఓషో జీవితం ఆధారంగా చేయాలనుకున్న సినిమాని ఆయన పక్కన పెట్టారట. ఎందుకంటే కథ ఆమిర్‌ అనుకున్న విధంగా లేదని సమాచారం. కథలో తనకు కావాల్సిన మార్పులు చెప్పి, మరో వెర్షన్‌ రెడీ చేయమని చిత్రదర్శకుడు శకున్‌ బాత్రాకి చెప్పారట ఆమిర్‌. అన్ని మార్పులు చేసినా సరిగ్గా కుదరదనే అభిప్రాయం కూడా ఆమిర్‌కి ఉందని, అందుకే ఈ ప్రాజెక్ట్‌ చేయకూడదనుకుంటున్నారని బాలీవుడ్‌ వర్గాల సమాచారం. ఇప్పుడు ఆమిర్‌ ఆసక్తి అంతా ఓ హాలీవుడ్‌ ప్రాజెక్ట్‌ పైన ఉందట. ఆ చిత్రాన్ని హిందీలో రీమేక్‌ చేయాలనుకుంటున్నారని భోగట్టా. ఇంతకీ ఈ మిస్టర్‌ పర్ఫెక్షనిస్ట్‌కి అంతగా నచ్చిన ఆ హాలీవుడ్‌ సినిమా ఏంటి? అని సన్నిహితులు అడిగినా పెదవి విప్పడంలేదట. అయితే.. పారామౌంట్‌ పిక్చర్స్‌ నిర్మించిన ఓ హిట్‌ సినిమా అనే విషయం మాత్రం బయటికొచ్చింది. సో.. పారామౌంట్‌ సంస్థ తీసిన సినిమాల లిస్ట్‌ బయటికి తీయండి. అందులో ఆమిర్‌ ఏ చిత్రాన్ని సెలెక్ట్‌ చేసుకుని ఉంటారో ఊహించండి. మీరు బాగా ఖాళీగా ఉంటేనే సుమా. లేకపోతే ఎలానూ అధికారికంగా ప్రకటించాలనుకున్నప్పుడు ఆమిర్‌ స్వయంగా చెబుతారు కదా. అప్పటిదాకా వెయిట్‌ చేయడమే.


 మలయాళ సూపర్ స్టార్ మోహన్ లాల్ మరో విభిన్న పాత్రలో కనిపించనున్నాడు. కమర్షియల్ హీరోగా కొనసాగుతూనే ప్రయోగాత్మక పాత్రలు చేస్తున్న ఈ కంప్లీట్ యాక్టర్, ప్రపంచ ప్రఖ్యాత ఆధ్యాత్మిక తత్వవేత్త ఓషో పాత్రో నటించనున్నాడన్న వార్త ఇప్పుడు మాలీవుడ్ సర్కిల్స్లో హాట్ టాపిక్గా మారింది. అయితే ఈ సినిమాపై ఎలాంటి ప్రకటన చేయకపోయినా.. మోహన్ లాల్ తన సోషల్ మీడియాలో పోస్ట్ చేసిన ఫోటోతో చర్చ మొదలైంది.
 
 ట్విట్టర్ పేజ్లో తాను ఓషో వేషదారణలో ఉన్న ఫోటోను పోస్ట్ చేసిన మోహన్ లాల్, 'ఆధ్యంతాలు లేని వ్యక్తి వేషంలో.. సముద్రమంత ప్రేమతో..' అంటూ కామెంట్ చేశాడు. ప్రస్తుతం నార్త్ సౌత్ ఇండస్ట్రీలో బయోపిక్ ల ట్రెండ్ నడుస్తుండటంతో మోహన్ లాల్ కూడా ఓషో బయోపిక్ ను తెరకెక్కించనున్నాడన్న టాక్ మొదలైంది. సినిమా పై ఎలాంటి ప్రకటన లేకపోయినా.. మోహన్ లాల్ గెటప్ కు మాత్రం మంచి స్పందన వస్తోంది.
 
 In disguise of the limitless man - The Ocean of Love pic.twitter.com/FlLIJqGspI
 — Mohanlal (@Mohanlal) 16 September 2016


 చింతన
  
  ఈ పుస్తకం వెనుక ఓషో మాటలు ఇలా ఉన్నాయి.  ‘‘లైంగిక శక్తే ఈ ప్రపంచంలో ఉన్న ఏకైక శక్తి. దేవుడు కూడా దేన్నైనా సృష్టించాలంటే సెక్స్‌ను ఆశ్రయించాల్సిందే. సెక్స్ నుంచే జీవం పుడుతుంది. శిశువు జన్మిస్తుంది. పువ్వులు వికసించినా, కోయిల కుహూ కుహూ రాగాలు పాడినా, నెమలి పురి విప్పి నాట్యం చేసినా అవన్నీ లైంగిక శక్తి సంకేతాలే. ఈ ప్రపంచంలో ఎటు చూసినా మీకు లైంగిక శక్తి ప్రేరణలే కనిపిస్తాయి. కాబట్టి సెక్స్‌ను వ్యతిరేకించకండి. సెక్స్‌ను అందరూ అధిగమించగలరు. దాన్ని దాటి ముందుకెళ్లే దారి ఉంది. తమాషా ఏమిటంటే సెక్స్‌ను సెక్స్ ద్వారానే అతి సులభంగా అధిగమించవచ్చు. సెక్స్‌కు దగ్గరగా ఉండటమంటే దివ్య చైతన్యానికి దగ్గరగా ఉన్నట్టే. మీ ఆధ్యాత్మిక జీవితంలో సెక్స్ ఒక పవిత్రమైన భాగమైపోవాలి. కాబట్టి మీరు పరమానందభరితులై, ఎంతో ఉత్సాహంతో, ప్రార్థనాపూర్వకమైన ప్రేమానుభూతితో ఉన్నప్పుడు మాత్రమే సంభోగించమని నేను మిమ్మల్ని ప్రార్థిస్తున్నాను. మీ హృదయం ఆనందం, శాంతి, కృతజ్ఞతలతో నిండిపోయిందని మీరు భావించినప్పుడు మాత్రమే లైంగికానందాన్ని పొందండని నేను మిమ్మల్ని ప్రార్థిస్తున్నాను. అలా మీరు సెక్స్‌లో పాల్గొన్నప్పుడే ‘దివ్య చైతన్యానుభూతి’ని పొందగలరు’’...
 
 ఓషో (ఆచార్య రజనీష్) వివాదాస్పద పుస్తకం ‘సెక్స్ మేటర్స్- ఫ్రమ్ సెక్స్ టు సూపర్‌కాన్షియస్‌నెస్’ తెలుగులో అనువాదమై వెలువడింది. ఈ వెనుకమాటను బట్టి చదవాలా వద్దా అనేది మీ ఇష్టం.  శృంగారోపనిషత్- ఓషో (అనువాదం: భరత్)
  వెల: రూ.250
  ప్రతులకు: 09440716716
  


 వియన్నా నగరానికి మొదటిసారిగా విద్యుచ్ఛక్తి పరిచయమైన కొత్తలో సిగ్మండ్ ఫ్రాయిడ్‌ను చూడటానికి ఆయన మిత్రుడొకడు ఆయన వద్దకు వ చ్చాడు. ఫ్రాయిడ్ అతనిని ఆ రోజు రాత్రి ఒక గదిలో ఉండమని ఏర్పాట్లు చేశాడు. ఆ మిత్రుడు ఓ పల్లెటూరివాసి. అతనికి విద్యుచ్ఛక్తి కొత్త. అదంటే భయం. ఆ భయంతోనే అతను తన గదిలో వెలుగుతున్న బల్బుని ఆపాలనుకున్నాడు. దాన్ని నోటితో ఊది ఆర్పడానికి ప్రయత్నించాడు. కానీ ఆరలేదు. దాంతో ఫ్రాయిడ్‌ని లేపి బల్బు ఆర్పమందామని చెప్పాలనుకున్నాడు. కానీ అలా అడిగితే ఆయన తనను ఏమనుకుంటాడో అని శంక. దాంతో ఆ మిత్రుడు వెలుగుతున్న బల్బు వంక భయంభయంగా చూస్తూ పడుకుంటాడు.
  తెల్లవారుతుంది. ఫ్రాయిడ్ అతని గదిలోకి వచ్చీ రావడంతోనే ‘‘రాత్రి బాగా నిద్ర పట్టిందా?’’ అన్నాడు.
 
  ‘‘నిద్ర మాట దేవుడెరుగు గానీ ఈ దీపాన్ని ఎలా ఆర్పాలి?’’ అని అడిగాడు మిత్రుడు.
  అప్పుడు ఫ్రాయిడ్ తన మిత్రుడిని స్విచ్ దగ్గరకు తీసుకెళ్లి, దానిని ఎలా నొక్కితే ఆరిపోతుందో ఎలా నొక్కితే వెలుగుతుందో చెప్పాడు.
  ఫ్రాయిడ్ మాటలు విని తనకిప్పుడు విద్యుచ్ఛక్తి గురించి తెలిసిందన్నాడు మిత్రుడు.
  ఓషో ఈ విషయాన్ని తన శిష్యులకు చెప్తూ స్విచ్ నొక్కడం గురించి తెలుస్తుంది...బాగానే ఉంది కానీ ప్రేమ, అభిమానం గురించి ఏం తెలుసు అని అడిగారు.  ఇంతకూ స్విచ్ నొక్కినప్పుడు అది ఎలా పని చేసి వెలుగుతున్న బల్బుని ఆర్పిందో తెలియకపోవ చ్చు. కనుక ఒక్కసారి ఆలోచించి చూడండి. ఏదీ తెలియదని అర్థమవుతుంది. మీలోని మనసుని, దాని పని తీరును సరిగ్గా తెలుసుకోగలిగితే జీవితంలోని రహస్యాలన్నింటినీ తెలుసుకోవడం సాధ్యమవుతుందని ఓషో బోధించారు.
  - యామిజాల జగదీశ్
  


 ఒక యువకుడు ఓషోను ఇలా అడిగాడు. ‘‘దేవుడనే మాట ఒక వస్తువులా వినిపిస్తోంది. అన్వేషించే వారికి దూరమై ఉంటున్నట్టు, అన్వేషిస్తే దొరికే వస్తువులా దేవుడు కూడా దొరుకుతాడు అని అనిపిస్తుంటుంది. ఇంతకూ ఎవరీ దేవుడు?’’
  అప్పుడు ఓషో ఇలా చెప్పారు.
 
 ‘‘దేవుడిని పొందడం, దేవుడిని అర్థం చేసుకోవడం వంటివన్నీ వృథా. ఎందుకంటే ఆయన మన చుట్టూ ఉన్నాడు. నేనూ ఆయనలోనే ఉన్నాను. నిజం చెప్పాలంటే నేను లే నే లేను. ఉన్నదంతా ఆయనే. ఉన్న ఆయన పేరే దేవుడు. జీవితం లోపల ఆయన దాగి ఉన్నాడు. ఆయన్ని వెతకలేం. జీవితంలో మునగడంతోనే ఆయన్ని పొందవచ్చు. ఇందుకు ఉదాహరణగా ఒక కథ చెప్తాను. ఒక చేపకు సముద్రం పేరు వినీ వినీ విసుగుపుట్టింది. అప్పుడు చేపల రాణిని అడిగింది - ‘నేను ఎన్నో ఏళ్లుగా సముద్రం పేరు వింటున్నాను. ఇంతకూ ఈ సముద్రమంటే ఏమిటి? అది ఎక్కడ ఉంది?’ అని. అప్పుడు చేపల రాణి ఇలా చెప్పింది.
 
 ‘సముద్రంలోనే నీ పుట్టుక, జీవితం ఉన్నాయి. అదే నీ ప్రపంచం. సముద్రమే నువ్వుండే చోటు. సముద్రం నీలో ఉంది. అది నీ వెలుపలా ఉంది. సముద్రం నుంచి పుట్టిన నీ జీవితమూ అందులోనే అంతమవుతుంది. సముద్రం నీ చుట్టూ తిరుగుతోంది’ అని చెప్పింది’’ అంటూ ఓషో ముగించాడు.  
 
 దేవుడు సైతం ప్రతి ఒక్కరినీ అన్ని వేళలా ఆవరించి ఉంటాడు. కానీ మనమే తెలియని మత్తులో మాయలో ఉన్నాం. కనుక మనకు ఆయన దర్శనం కావడం లేదు.మత్తూ మాయ లేని స్థితే దేవుడు.
  
 - యామిజాల జగదీశ్