=జిల్లావాసుల గజగజ
  =తుపాను ప్రభావంతో పెరిగిన గాలులు
  =పడిపోతున్న పగటిపూట ఉష్ణోగ్రతలు
  =నందిగామలో 13 డిగ్రీల అత్యల్ప ఉష్ణోగ్రత నమోదు
 సాక్షి, మచిలీపట్నం : జిల్లావ్యాప్తంగా నాలుగు రోజుల నుంచి చలి బాగా పెరిగింది. దట్టంగా కమ్మేస్తున్న మంచుదుప్పటి భానుడి కిరణాలు సైతం నేలకు సోకకుండా అడ్డుకుంటోంది. దీనికితోడు మాదీ తుపాను ప్రభావంతో చలిగాలులు మరింత పెరుగుతున్నాయి. పగటి ఉష్ణోగ్రతలు సైతం గణనీయంగా పడిపోతుండడంతో ప్రజలు వణికిపోతున్నారు. ప్రధానంగా చలి తీవ్రతకు చిన్నారులు, వృద్ధులు ఇబ్బందులు పడుతున్నారు. నం దిగామ ప్రాంతంలో ఆదివారం రాత్రి 13 డిగ్రీల సెంటీగ్రేడ్ అత్యల్ప ఉష్ణోగ్రత నమోదైంది.
 
 గత ఏడాది ఇదే ప్రాంతంలో 11 డిగ్రీల అత్యల్ప ఉష్ణోగ్రత నమోదుకావడం గమనార్హం.  జిల్లా కేంద్రం మచిలీపట్నంలో 22 డిగ్రీల అత్యల్ప ఉష్ణోగ్రత కాగా, 29 డిగ్రీల అత్యధిక ఉష్ణోగ్రత నమోదైంది. నందిగామలో 13 డిగ్రీల సెంటీగ్రేడ్ అత్యల్ప ఉష్ణోగ్రతగాను, 29 డిగ్రీలు అత్యధికంగాను నమోదైంది.  పగటి ఉష్ణ్రోగ్రతలు కూడా రెండు రోజులుగా 27 డిగ్రీలకు పడిపోయాయి. ఎండలు కాస్తున్నప్పటికీ చలిగాలులు వీస్తూనే ఉన్నాయి. ఒకేసారి వాతావరణంలో మార్పులు రావడంతో ప్రజలు చలిగాలుల నుంచి రక్షణ పొందేందుకు నానా పాట్లు పడుతున్నారు.  
 
 సాయంత్రమైతే చాలు  ఇళ్లకు పరిమితమవుతున్నారు. వెచ్చదనాన్ని ఇచ్చే రగ్గులను ఉపయోగిస్తున్నారు. పేద, మద్యతరగతి ప్రజలు సైతం రాత్రి సమయాల్లో చలికి తట్టుకోలేక ఇళ్ల ముందు చలిమంటలు వేసుకుని కొంతమేర ఉపశమనం పొందుతున్నారు. ఇక రాత్రి సమయాల్లో వాహనచోదకుల తిప్పలు అన్నీ ఇన్నీ కావు. సాయంత్రం 6 గంటల తరువాత వాహనాలు నడిపేందుకు భయపడాల్సిన పరిస్థితి నెలకొంది. చలి తీవ్రత పెరిగితే ఆస్తమా రోగులకు మరింత ఇబ్బందేనని వైద్యులు చెబుతున్నారు. ఈ క్రమంలో స్వెట్టర్లు, మంకీక్యాప్‌లు వంటి వేడినిచ్చే దుస్తులతో పాటు కోల్డ్‌క్రీమ్‌ల వినియోగం పెరిగింది.
  


 హైదరాబాద్, న్యూస్‌లైన్: ప్రముఖ సినీ హీరో మహేశ్‌బాబు ఇంట్లోకి మంకీ క్యాప్ ధరించిన ఆగంతకుడు చొరబడి దొంగతనానికి యత్నించాడు. ఈ సంఘటన జూబ్లీహిల్స్ పోలీస్‌స్టేషన్ పరిధిలో చోటు చేసుకుంది. జూబ్లీహిల్స్ రోడ్ నంబర్- 81లో హీరో మహేశ్‌బాబు నివాసం ఉంది. బుధవారం తెల్లవారుజామున 2.30 గంటల ప్రాంతంలో మహేశ్‌బాబు ఇంటి ప్రహరీగోడ దూకిన ఆగంతకుడు సెక్యూరిటీ కళ్లుగప్పి ఇంటి వెనకాల కిటికీ అద్దాలు పగులగొట్టి లోనికి ప్రవేశించాడు. నేరుగా మహేశ్ నిద్రిస్తున్న బెడ్‌రూమ్ వద్దకు చేరుకొని దొంగతనానికి యత్నించాడు. అలికిడి విన్న పని మనుషులు ఉలిక్కిపడి లేచారు. ఎదురుగా మంకీ క్యాప్ ధరించిన వ్యక్తి నిలబడటంతో భయంతో అరిచారు.
  
  దీంతో సెక్యూరిటీగార్డ్‌లు అప్రమత్తమయ్యారు. వెంటనే ప్రధాన ద్వారం వద్దకు వచ్చి ఆగంతకుడిని పట్టుకునేందుకు ప్రయత్నించారు. అప్పటికే అతడు వెనక దారి నుంచి పరారయ్యాడు. విషయం తెలుసుకున్న మహేశ్‌బాబు బయటికి వచ్చి వివరాలు తెలుసుకున్నారు. సెక్యూరిటీ గార్డ్‌ల ద్వారా జూబ్లీహిల్స్ పోలీసులకు లిఖితపూర్వక ఫిర్యాదు ఇచ్చారు. పశ్చిమ మండలం డీసీపీ కె. సత్యనారాయణ, బంజారాహిల్స్ ఏసీపీ శంకర్‌రెడ్డి సంఘటనా స్థలానికి చేరుకొని, మహేశ్‌బాబుతో మాట్లాడి సంఘటనలను తెలుసుకున్నారు. వేలిముద్రల నిపుణులు, డాగ్‌స్క్వాడ్‌తో తనిఖీలు చేయించారు. కిటీకీపై పడ్డ వేలిముద్రలను సేకరించారు. ఐపీసీ సెక్షన్ 457, 511 కింద జూబ్లీహిల్స్ పోలీసులు కేసు నమోదు చేసి, దర్యాప్తు చేపట్టారు.