సాక్షి, అమరావతి: ఉపాధ్యాయులు, ప్రధానోపాధ్యాయులకు జీవిత భాగస్వామి (స్పౌజ్‌), పరస్పర (మ్యూచువల్‌) అంతర్‌ జిల్లా బదిలీలు చేపట్టేందుకు ప్రభుత్వం గ్రీన్‌ సిగ్నల్‌ ఇచ్చింది. ఈ మేరకు బుధవారం పాఠశాల విద్యాశాఖ మార్గదర్శకాలతో కూడిన షెడ్యూల్‌ను విడుదల చేసింది. ప్రభుత్వ, జెడ్పీ, మండల పరిషత్, మున్సిపల్, కార్పొరేషన్‌ స్కూళ్లల్లో పనిచేస్తూ ఈ ఏడాది జూలై 31 నాటికి రెండేళ్ల సర్వీసు ఉన్నవారికి మాత్రమే అవకాశం కల్పించారు. దరఖాస్తుదారులు ప్రస్తుతం పనిచేస్తున్న జిల్లా, బదిలీ కోరుకుంటున్న జిల్లా వివరాలకు సంబంధించి రెండు రకాల ఫార్మాట్లలో గురువారం నుంచి ఈ నెల 24లోగా ఉపాధ్యాయులు లీప్‌ యాప్‌లో ఆన్‌లైన్‌ దరఖాస్తులు సమర్పించాలని పాఠశాల విద్యాశాఖ డైరెక్టర్‌ విజయరామరాజు ఆదేశించారు. దరఖాస్తుల ప్రింట్‌ కాపీలను స్థానిక ఎంఈవోలకు అందించాలని, వీటిపై డీఈవో పరిశీలన చేసి ఈనెల 27 నాటికి డైరెక్టరేట్‌కు పంపించాలన్నారు. మ్యూచువల్, స్పౌజ్‌ కేటగిరీ ఉపాధ్యాయులు రాష్ట్రవ్యాప్తంగా 2 వేల మంది వరకు ఉండవచ్చని అంచనా. తాజా బదిలీల్లో మెడికల్‌ గ్రౌండ్స్‌ కింద అవకాశం ఇవ్వకపోవడంతో ఉపాధ్యాయులు ఆందోళన చెందుతున్నారు. వ్యక్తిగతం, మెడికల్‌ గ్రౌండ్స్‌ కింద కూడా అంతర్‌ జిల్లా బదిలీలకు అనుమతించాలని ఉపాధ్యాయులు కోరుతున్నారు. అలాగే, మిగులు ఉపాధ్యాయులకు సైతం అంతర్‌ జిల్లా బదిలీలు చేపట్టాలని కోరుతున్నారు.


 అడ్డగోలుగా అంతర్ జిల్లా బదిలీలు ఎలా వస్తున్నాయ్..
 వారిని చేర్చుకోకుండా వెనక్కు పంపాలి : ఉపాధ్యాయ సంఘాలు
 నిరుద్యోగులకు అన్యాయం జరిగితే ఊరుకోం : జెడ్పీ చైర్‌పర్సన్ సునీతారెడ్డి
  
 అంతర్ జిల్లా బదిలీలను జిల్లాలో అనుమతించడంపై ఉపాధ్యాయ సంఘాలు తీవ్ర ఆగ్రహం వ్యక్తం చేశాయి. జిల్లాలో ఇప్పటికే స్థానిక, స్థానికేతర నిష్పత్తిలో భారీ వ్యత్యాసముందని, అయినప్పటికీ తాజాగా ప్రభుత్వ ఉత్తర్వులతో వచ్చే బదిలీలను అనుమతించడం దారుణమని తప్పుబట్టాయి. జిల్లా యంత్రాంగానికి, జిల్లా పరిషత్ పాలకవర్గానికి ఏమాత్రం సమాచారం ఇవ్వకుండా విద్యాశాఖ ఏకపక్షంగా వ్యవహరించి అంతర్ జిల్లా బదిలీలను అనుమతించడంతో జిల్లాలోని నిరుద్యోగులు తీవ్రంగా నష్టపోతున్నారని మండిపడ్డాయి. జిల్లాకు అడ్డగోలుగా వస్తున్న టీచర్ల ప్రభుత్వ ఉత్తర్వుల బదిలీలపై రెండు రోజుల క్రితం ‘సాక్షి’ ప్రచురించిన ప్రత్యేక కథనంతో జిల్లా పరిషత్ పాలకవర్గంలో కదలిక వచ్చింది. మంగళవారం జిల్లా పరిషత్‌లో చైర్‌పర్సన్ పి.సునీతారెడ్డి అధ్యక్షతన విద్యాశాఖ అధికారులు, ఉపాధ్యాయ సంఘాల నేతలతో సమావేశం జరిగింది. ఈ సందర్భంగా ఉపాధ్యాయ సంఘ నేతలు విద్యాశాఖ తీరును తీవ్రంగా తప్పుబట్టారు. ఈ క్రమంలో జెడ్పీ చైర్‌పర్సన్ సునీతారెడ్డి సైతం డీఈఓపై ఆగ్రహం వ్యక్తం చేశారు.
 
 దీంతో డీఈఓ రమేష్ స్పందిస్తూ ఇకపై అంతర్ జిల్లా బదిలీలపై జెడ్పీకి సైతం సమాచారమిస్తామన్నారు. ప్రభుత్వం నుంచి రిమార్క్స్ వచ్చిన వెంటనే కలెక్టర్‌తోపాటు జెడ్పీకి తెలియజేస్తామని పేర్కొన్నారు. అదేవిధంగా జిల్లాలో సైపర్ న్యూమరీ పోస్టులు ఏర్పాటుచేసి ప్రత్యేక డీఎస్సీకి ప్రణాళిక తయారు చేయాలని, ఈ అంశాన్ని ప్రభుత్వ దృష్టికి తీసుకెళ్లి అనుమతి వచ్చేలా చర్యలు తీసుకుంటామని జెడ్పీ చైర్‌పర్సన్ హామీ ఇచ్చారు. సమావేశంలో ఉపాధ్యాయ సంఘ నేతలు యూ.పోచయ్య, మాణిక్‌రెడ్డి, శివకుమార్, చెన్నకేశవరెడ్డి, సదానంద్, ప్రవీణ్‌కుమార్, ఆంజనేయులు, విఠల్, వెంకటేశ్వర్లు తదితరులు పాల్గొన్నారు.