న్యూఢిల్లీ: రతన్ టాటా స్టార్టప్‌ల పెట్టుబడుల జోరు కొనసాగుతోంది. ఇప్పటికే పలు స్టార్టప్‌ల్లో పెట్టుబడులు పెట్టిన ఆయన తాజాగా, వర్చువల్ ఫిట్‌నెస్ కోచింగ్ ప్లాట్‌ఫార్మ్, గోఖీలో పెట్టుబడులు పెట్టారు. అయితే ఏ స్థాయిలో ఇన్వెస్ట్ చేశారో ఆ వివరాలు వెల్లడికాలేదు. ప్రముఖ హిందీ సినిమా నటి మాధురీ దీక్షిత్, ఆమె భర్త శ్రీరామ్ నెనె, నీరజ్ అరోరా(వాట్సాప్)లు గోఖీని నిర్వహిస్తున్నారు. భారత వేరబుల్స్ (ఫిట్‌నెస్ బాండ్, తదితర ధరించే వస్తువుల) మార్కెట్లో అగ్రశ్రేణి కంపెనీల్లో గోఖీ కూడా ఒకటి.
 ఈ కంపెనీ గత ఏడాది నవంబర్‌లో 1.34 కోట్ల డాలర్ల పెట్టుబడులు సమీకరించింది. రతన్ టాటా తమ సంస్థలో పెట్టుబడులు పెట్టడం..తమ సంస్థ ప్రజల జీవితాలపై దీర్ఘకాలిక ప్రభావం చూపుతోందనడానికి నిదర్శనమని గోఖీ సీఈవో విశాల్ గోండల్ పేర్కొన్నారు. స్నాప్‌డీల్, కార్య, అర్బన్ లాడర్, బ్లూ స్టోన్, కార్‌దేఖో, సబ్‌సే టెక్నాలజీస్, షియోమి, ఓలా, డాగ్‌స్పాట్‌డాట్‌ఇన్, ట్రాక్సిన్, క్యాష్‌కరో, ఫస్ట్‌క్రై, టీబాక్స్ తదితర సంస్థల్లో రతన్ టాటా ఇన్వెస్ట్ చేశారు.


 న్యూఢిల్లీ: ఆన్‌లైన్ మార్కెట్ ప్లేస్, స్నాప్‌డీల్ అమెరికాకు చెందిన ఫిట్‌నెస్ సంస్థ గొకీతో ఒప్పందం కుదుర్చుకుంది. ఈ ఒప్పందంలో భాగంగా గొకీ ఫిట్‌నెట్ బాండ్, సర్వీసులను భారత వినియోగదారులకు అందిస్తామని స్నాప్‌డీల్ పేర్కొంది. గొకీ సబ్‌స్క్రిప్షన్ కోసం వినియోగదారులు స్నాప్‌డీల్‌డాట్‌కామ్ ద్వారా నేరుగా ఆర్డర్ చేయవచ్చని వివరించింది.
 
 ఆరు నెలల ప్లాన్ రూ.5,999 అని, 12 నెలల ప్లాన్ రూ.9,999 అని వివరించింది. గొకీ బాండ్, పర్సనల్ కోచ్ సర్వీస్, గొకీ యాప్ తదితర సేవలు పొందవచ్చని తెలిపింది.  అడ్వాన్స్‌డ్ ఫిట్‌నెస్ ట్రాకర్‌గా గొకీ బాండ్ పనిచేస్తుందని పేర్కొంది. వినియోగదారుడి డేటాను బట్టి కస్టమైజ్‌డ్ సలహాలవివ్వడమే కాకుండా సాధించదలచుకున్న లక్ష్యాన్ని చేరువ అయ్యేలా ప్రేరణనిచ్చేలా గొకీ పర్సనల్ కోచ్ సర్వీస్  పనిచేస్తుందని పేర్కొంది.