బీజింగ్‌: సాధరణంగా చిన్నపిల్లలే ఎక్కువగా భయపడుతుంటారు. వారికి పెద్దలు ధైర్యాన్ని నూరిపోస్తుంటారు. అయితే, చైనాలో మాత్రం అందుకు విరుద్ధమైన పరిస్థితి దర్శనం ఇచ్చింది. ఓ బాలుడు తన తండ్రికి ధైర్యం నూరిపోసే సంఘటన వెలుగులోకి వచ్చింది. భయంతో గజగజ వణికిపోతూ అతుక్కుపోయినా తన తండ్రిని తనతో రావాలని బుడిబుడి అడుగులు వేసే చిన్నారి లాగుతున్న ఆ వీడియో ఇప్పుడు ఫేస్‌బుక్‌లో తెగ పరుగులు పెడుతోంది. దీనిని చూస్తున్నవారంతా తెగ నవ్వుకుంటున్నారు.
 
 ఇంతకీ ఆ వీడియో ఏమిటంటే.. చైనాలో పెద్ద పెద్ద పర్వతాల చుట్టూ శిఖరాగ్రానికి కొంచెం కిందగా గాజు పలకలతో ఫుట్‌పాత్‌ మాదిరిగా స్కైవేలు ఏర్పాటుచేసిన విషయం తెలిసిందే. అందులో భాగంగా అక్కడ వాన్‌షెన్‌ నేషనల్‌ పార్క్‌లోని పర్వతం చుట్టూ ఏర్పాటుచేసిన గాజు స్కైవేపై నడిచేందుకు ఓ తండ్రి కొడుకు బయలుదేరి వెళ్లారు. అయితే, దాని మీదకు ప్రవేశించిన తర్వాత కేవలం రెండు అడుగులు మాత్రమే వేసిన ఆ తండ్రి అక్కడి నుంచి కిందకు చూసి వణికిపోయి ఇక తాను అంగుళం కూడా కదలబోనంటూ రాతికి అతుక్కుపోయాడు. ఆ సమయంలో అతడి కుమారుడు ఏం కాదని, తనతో రావాలని చేతిని, కాలును పట్టుకొని లాగుతుంటాడు. ఆ వీడియోనే ఇప్పుడు చూపరులను ఆకట్టుకుంటోంది.


 భూమికి 2,350 అడుగుల ఎత్తులో.. పర్వతం అంచున.. కింద మొత్తం పారదర్శకంగా ఉన్న గాజు రహదారి.. అక్కడ్నుంచి కిందకు చూస్తే.. వామ్మో.. ఎవరికైనా కళ్లు తిరగడం ఖాయం. ఫొటో చూస్తే తెలియడంలే.. చైనాలోని లాంగ్‌గ్యాంగ్ నేషనల్ జియోలాజికల్ పార్కులో ఇటీవల ప్రారంభించిన ఈ గ్లాస్‌వే ప్రపంచంలోనే అతి పెద్దదట. గుర్రపు నాడా ఆకారంలో కొండంచున 87.5 అడుగుల మేర విస్తరించి ఉంటుంది. రూ.35 కోట్ల వ్యయంతో నిర్మించిన ఈ గ్లాస్‌వేపై మనం లెగ్ పెట్టాలంటే రూ. 600 కట్టాల్సి ఉంటుంది. 30  నిమిషాలపాటు దీనిపై తిరగొచ్చు.. మన తల తిరగకుంటేనే సుమా..