చెన్నై: తమిళనాడు లోని మహిళా కోర్టు సంచలన తీర్పు వెలువరించింది.  బాలిక(15)ను లైంగికంగా వేధించిన కేసులో ధన్హీర్ (30) అనే యువకుడికి జీవితఖైదు విధిస్తూ కోర్టు తీర్పు చెప్పింది.  దీంతో పాటుగా బాలికపై  బెదిరింపులకు పాల్పడినందుకు గాను  ఏడు సంవత్సరాల కఠినకారాగారశిక్షను విధించింది. ఈ రెండు  శిక్షలను ఏకకాలంలో అమలు చేయాలని జిల్లా మహిళా కోర్ట్ న్యాయమూర్తి ఎన్ తిరువక్కనరసు  సోమవారం  ఆదేశించారు.
 వివరాల్లోకి వెళితే..ఇంటి సమీపంలో నిలబడి  ఉన్న  బాలిక పట్ల  ధన్హీర్ అనుచితంగా  ప్రవర్తించాడు. ఆ చర్యలను బాధితురాలు ప్రతిఘటించడంతో.. ఈ విషయాన్ని ఎవరికైనా చెబితే చంపేస్తానంటూ బెదిరించాడు.  దీంతో  అమ్మాయి తల్లిదండ్రులు గోబిచెట్టిపాల్యం (గోబి) లో  ఫిర్యాదు చేశారు.  ఈ నేపథ్యంలో ధన్హీర్ పై కేసు నమోదు చేసిన మహిళా విభాగం పోలీసులు గత జులైలో అతగాడిని అరెస్ట్ చేశారు.   ప్రాసిక్యూషన్ వాదనలను సమర్థించిన కోర్టు ఈ  తీర్పును వెలువరించింది.