తొలి సినిమా ‘అష్టా చెమ్మా’తోనే తన నటనతో తెలుగు ప్రేక్షకుల్ని కట్టిపారేశాడు అవసరాల శ్రీనివాస్. కామెడీతో కడుపుబ్బ నవ్వించాడు అందరినీ. సరదాగా కాసేపు, పిల్ల జమిందార్, అంతకుముందు ఆ తర్వాత, చందమామలో అమృతం వంటి చిత్రాలతో తన నట ప్రతిభను కళ్లకు కట్టిన శ్రీనివాస్... మంచి రచయిత, దర్శకుడు కూడా. ఇప్పుడు సరికొత్తగా... టీవీ హోస్ట్ కూడా కాబోతున్నాడు.
  
 ఓ టీవీ చానెల్ రూపొందిస్తోన్న క్విజ్ ప్రోగ్రామ్ ద్వారా టెలివిజన్ రంగంలోనూ అడుగిడుతున్నాడు శ్రీనివాస్. నిజానికిది పెద్ద వెరైటీ షో ఏం కాదు. హైస్కూల్ స్థాయి విద్యార్థుల పరిజ్ఞానాన్ని పరీక్షించే ఓ క్విజ్ షో. అయితే శ్రీనివాస్ ఈ మామూలు క్విజ్ షోకి, తన స్టయిల్లో వినోదాన్ని మేళవించి ప్రత్యేకతను తీసుకొచ్చే ప్రయత్నం చేస్తున్నాడని వినికిడి. ఇప్పటికే కొన్ని ఎపిసోడ్లు షూటింగ్ కూడా పూర్తి చేసుకున్న ఈ షో, త్వరలోనే మొదలవ బోతోందట. చూద్దాం... ఆ షోకి శ్రీనివాస్  ప్లస్ అవుతాడో, లేక అతడి కెరీర్‌కి ఈ షో ప్లస్ అవుతుందో!