సాక్షి ప్రతినిధి, వరంగల్‌: రాష్ట్రంలో మోంథా తుపాను వల్ల నష్టపోయిన రైతులు, ప్రజలను ఆదుకుంటామని, ఎవరూ అధైర్యపడవద్దని ముఖ్యమంత్రి ఎ.రేవంత్‌రెడ్డి భరోసా ఇచ్చారు. రాష్ట్రంలో 12 జిల్లాల్లో తుపాను ప్రభావం ఉందని చెప్పారు. పంట నష్టపోయిన రైతులకు ఎకరానికి రూ.10 వేల పరిహారం ఇస్తామని ప్రకటించారు. వరదల్లో ఇల్లు మునిగిన వారికి రూ.15 వేలు, పూర్తిగా కూలిపోతే ఇందిరమ్మ పథకం కింద ఇల్లు మంజూరు చేస్తామని తెలిపారు. హనుమకొండ, వరంగల్‌ జిల్లాల్లోని వరద ప్రభావిత ప్రాంతాల్లో సీఎం శుక్రవారం ఏరియల్‌ సర్వే నిర్వహించారు.మంత్రులు పొంగులేటి శ్రీనివాస్‌రెడ్డి, కొండా సురేఖ, వరంగల్‌ పశి్చమ ఎమ్మెల్యే నాయిని రాజేందర్‌రెడ్డి, కలెక్టర్లు, అధికారులతో కలిసి నగరంలోని వరద ప్రభావిత కాలనీలు సమ్మయ్యనగర్, పోతననగర్, రంగంపేటలో పర్యటించారు. అనంతరం హనుమకొండ కలెక్టరేట్‌లో మంత్రులు పొంగులేటి శ్రీనివాస్‌రెడ్డి, కొండా సురేఖ, పొన్నం ప్రభాకర్, సీఎస్‌ రామకృష్ణారావుతో కలిసి వరదలపై సమీక్ష నిర్వహించారు. తుపాను ప్రభావిత 12 జిల్లాల కలెక్టర్లు, అధికారులకు దిశానిర్దేశం చేశారు. తక్షణమే నివేదికలు ఇవ్వండి.. తుపాను ప్రభావంపై వెంటనే పూర్తిస్థాయి నివేదికలు అందించాలని జిల్లా కలెక్టర్లను సీఎం ఆదేశించారు. ‘రాష్ట్రంలో 12 జిల్లాల్లో మోంథా తుపాను ప్రభావం ఉంది. ఏడు జిల్లాల్లో తీవ్ర నష్టం వాటిల్లింది. ఆయా జిల్లాల ఇన్‌చార్జి మంత్రులు అక్కడి కలెక్టర్లతో సత్వరం సమీక్షలు నిర్వహించి నివేదికలు సిద్ధం చేయాలి. వరదలు తగ్గుముఖం పట్టినందున వెంటనే పారిశుద్ధ్య పనులు చేపట్టాలి. చెత్తను తొలగించి, శానిటేషన్‌ చేయాలి. కలెక్టర్లు, అధికారులు క్షేత్రస్థాయిలో పర్యటించి నివేదికలు పంపాలి. వరదల వల్ల మరణించినవారి జాబితాలను పారదర్శకంగా ఇచ్చేలా పోలీసు శాఖ వెంటనే ఎఫ్‌ఐఆర్‌లు నమోదుచేసి నివేదికలు అందించాలి.మృతుల కుటుంబాలకు రూ.5 లక్షల నష్టపరిహారం ఇస్తాం. వరదల వల్ల మేకలు, గొర్రెలు మృతి చెందితే రూ.5 వేలు, పెద్ద పశువులు మృత్యువాత పడితే రూ.50 వేలు ఇచ్చేలా పశుసంవర్ధక శాఖ నివేదికలు పంపాలి. పత్తి, వరి చేతికి వచ్చే ముందు నష్టం జరిగితే ఎకరానికి రూ.10 వేలు ఇస్తాం. నీట మునిగిన పంటతోపాటు ఇసుక మేటలు వేసిన ప్రాంతాల బాధిత రైతులకు ఎన్‌ఆర్‌ఈజీఎస్‌ ద్వారా అవసరాన్ని బట్టి రూ.లక్ష వరకు సాయం చేసేందుకు పంచాయతీరాజ్‌ శాఖ అధికారులు అంచనాలు తయారు చేయాలి. ఇల్లు మునిగినవారికి రూ.15 వేలు ఇచ్చేందుకు అధికారులు చర్యలు చేపట్టాలి.వరదలకు ఇళ్లు కూలి నిరాశ్రయులైన వారికి ప్రత్యేక కోటా కింద ఇందిరమ్మ ఇల్లు ఇచ్చేందుకు జాబితా సిద్ధం చేయాలి. అర్హులకు ప్రభుత్వ స్థలంలో ఇంటి పట్టాలు ఇచ్చే అంశంపై సంబంధిత అధికారులు దృష్టి పెట్టాలి. వరద ప్రాంతాలపై అన్ని జిల్లాల నుంచి నివేదికలు వచ్చాక మరోసారి సమీక్ష నిర్వహిస్తాం’అని సీఎం తెలిపారు. కలెక్టర్లు క్షేత్రస్థాయిలో పర్యటించాలి జిల్లా కలెక్టర్లు, అధికారులు క్షేత్ర స్థాయిలో పర్యటించి పరిస్థితిని అంచనా వేయాలని సీఎం ఆదేశించారు. వార్షిక నివేదికలో అభివృద్ధి, సంక్షేమ పథకాల అమలుతోపాటు ఎన్ని క్షేత్రస్థాయి పర్యటనలు చేశారన్న వివరాలు కూడా చూస్తామని చెప్పారు. కలెక్టర్లు క్షేత్రస్థాయిలో పర్యటించేలా స్పెషల్‌ చీఫ్‌ సెక్రెటరీ చర్యలు తీసుకోవాలని ఆదేశించారు. క్షేత్రస్థాయి పరిస్థితులపై నిర్లక్ష్యం వల్లే కేంద్ర ప్రభుత్వం నుంచి నిధులు రావటంలేదని అన్నారు.ఈ విషయంలో పారదర్శకత లోపం కనిపిస్తే సహించేది లేదని హెచ్చరించారు. బాగా పనిచేసేవారికి ప్రభుత్వం నుంచి ప్రశంసలు కూడా ఉంటాయని తెలిపారు. వరదలపై వెంటనే పూర్తి నివేదికలు పంపిస్తే కేంద్ర ప్రభుత్వానికి పరిహారం కోసం పంపుతామని, ఇందు కోసం ప్రజాప్రతినిధుల సహకారం తీసుకోవాలని అధికారులకు సూచించారు. వరద నీటి నిర్వహణపై నీటిపారుదల శాఖ సిద్ధంగా ఉండాలని ఆదేశించారు. శాఖల మధ్య సమన్వయం లేక సమస్యలు పెరుగుతున్నాయని అసహనం వ్యక్తంచేశారు. అన్ని శాఖలు ఇరిగేషన్‌ శాఖతో సమన్వయం చేసుకోవాలని సూచించారు. నాలాల కబ్జాదారులపై ఉక్కుపాదం.. వరంగల్‌ నగరంలో నాలాల నిర్వహణ సరిగా లేకపోవటం వల్లే తరచూ వరదలు వస్తున్నాయని సీఎం అన్నారు. చెరువులోకి వెళ్లే నాలాలు కబ్జాకు గురైతే ఆ కబ్జాలను తప్పక తొలగించాలని ఆదేశించారు. ఎంతటివారైనా వదిలిపెట్టేది లేదని, పదిమంది కోసం పదివేల ఇళ్లు నీట మునుగుతున్నాయని అన్నారు. జీవితకాలం కష్టపడి సంపాందించుకున్న ఇంటి సామగ్రి, పిల్లల సరి్టఫికెట్లు వంటి కీలక వస్తువులు నీటి పాలవుతున్నాయని ఆవేదన వ్యక్తంచేశారు. నాలాల కబ్జాపై ఉక్కుపాదం మోపాలని అధికారులను ఆదేశించారు. క్షేత్రస్థాయిలో పరిశీలించేందుకు అధికారుల కమిటీ వేయాలని ఆదేశించారు. కాలనీవాసుల గోడు విన్న సీఎంసమ్మయ్యనగర్, పోతననగర్, రంగంపేట కాలనీల్లో పర్యటించిన సీఎం.. బాధితులతో మాట్లాడారు. బాధితులు సీఎంకు తమ సమస్యలు ఏకరువు పెట్టగా.. ప్రభుత్వం అన్నివిధాలా ఆదుకుంటుందని భరోసా ఇచ్చారు. అనంతరం వరద నష్టంపై హనుమకొండ కలెక్టరేట్‌లో ఏర్పాటు చేసిన ఫొటోల ఎగ్జిబిషన్‌ పరిశీలించారు. ఈ కార్యక్రమాల్లో మంత్రులతో పాటు సీఎం సలహాదారు వేం నరేందర్‌ రెడ్డి, ఫైనాన్స్‌ కమిషన్‌ చైర్మన్‌ సిరిసిల్ల రాజయ్య, అసెంబ్లీ డిప్యూటీ స్పీకర్‌ రామచంద్రనాయక్, వరంగల్‌ ఎంపీ కడియం కావ్య, ఎమ్మెల్సీ బస్వరాజు సారయ్య, మేయర్‌ గుండు సుధారాణి, స్టేషన్‌ఘన్‌పూర్, పరకాల, నర్సంపేట, వర్ధన్నపేట ఎమ్మెల్యేలు కడియం శ్రీహరి, రేవూరి ప్రకాష్‌ రెడ్డి, దొంతి మాధవరెడ్డి, కేఆర్‌ నాగరాజు, హనుమకొండ, వరంగల్‌ జిల్లాల కలెక్టర్లు స్నేహ శబరీష్, డాక్టర్‌ సత్య శారద, వరంగల్‌ పోలీస్‌ కమిషనర్‌ సన్‌ ప్రీత్‌ సింగ్, గ్రేటర్‌ వరంగల్‌ మున్సిపల్‌ కార్పొరేషన్‌ కమిషనర్‌ చాహత్‌ బాజ్‌ పాయ్‌ తదితరులు పాల్గొన్నారు.


 మంచాల: పంటలు ఎండి తీవ్రంగా నష్టపోయిన రైతాంగాన్ని ప్రభుత్వం అన్ని విధాలుగా ఆదుకోవాలని వైఎస్సార్‌ కాంగ్రెస్‌ పార్టీ జిల్లా ప్రధాన కార్యదర్శి మాదగోని జంగయ్యగౌడ్‌ డిమాండ్‌ చేశారు. గురువారం ఆరుట్ల గ్రామంలో ఎండిన మొక్కజొన్న పంటను ఆయన పరిశీలించారు. ఈ సందర్భంగా ఆయన మాట్లాడుతూ గ్రామాల్లో రైతాంగ సమస్యలను ప్రభుత్వం పట్టించుకోవడం లేదన్నారు. ఎన్నికల ముందు  రైతాంగాన్ని అన్ని రకాలుగా ఆదుకుంటామని కేవలం హామీలు ఇచ్చి చేతులు  దులుపుకుందన్నారు. ఐదుసార్లు ప్రకృతి వైపరిత్యాల వల్లన పంటలు దెబ్బతిన్న రైతులకు నయా పైసా కూడా పరిహారం ఇవ్వలేదన్నారు.  కేంద్రం కరువు నిధులు ఇచ్చామని చెబుతుందని.. రాష్ర్ట ప్రభుత్వం మాత్రం వాటిని రైతులకు ఇవ్వడం లేదన్నారు. పంట రుణమాఫీ విషయంలో కూడా నష్టపూరితంగానే ప్రభుత్వం వ్యవహరిస్తుందని విమర్శించారు. అప్పులు చేసి పంటలు సాగు చేసిన రైతులు పంటలు ఎండి నష్టాల్లో కూరుకుపోయి ఆత్మహత్యలు చేసుకునే దుస్థితి నెలకొందన్నారు. ప్రధానంగా ఇబ్రహీంపట్నం నియోజకవర్గంలో పంటలు పూర్తిగా చేతికి రాకుండా పోయాయన్నారు. ప్రభుత్వం నిర్లక్ష్య ధోరణి వీడి రైతులను ఆదుకోవాలని  అన్నారు. ఈ ప్రాంతాన్ని కరువు ప్రాంతంగా ప్రకటించాలని డిమాండ్‌ చేశారు. పంట నష్టపోయిన రైతులకు తక్షణమే పరిహారం ఇవ్వాలన్నారు.  ఈ కార్యక్రమంలో వైఎస్సార్‌ కాంగ్రెస్‌ పార్టీ మండల నాయకులు దాసరమోని సురేష్‌, లోంగారి యాదగిరి, ఎన్నుదుల మహేష్‌, సుంకరి దానయ్యగౌడ్‌, తాళ్ల ప్రభాకర్‌గౌడ్‌, జోగు సుధాకర్‌ తదితరులు పాల్గొన్నారు.


 జేసీ ఆమ్రపాలికి ఫిర్యాదు చేసిన బాధిత రైతులు 
 పరిగి : రాత్రికి రాత్రే రెవెన్యూ అధికారులు తమ పంట పొ లాలను దున్ని పాడు చేశారని మండలంలోని రూప్‌ఖాన్ పేట్‌కు చెందిన రైతులు తెలిపారు. వారు బుధవారం పరిగికి వచ్చిన జారుుంట్ కటెక్టర్ ఆమ్రపాలికి ఫిర్యాదు చేశారు. మండలంలోని తుంకలగడ్డ శివారులో 70 సంవత్సరాల క్రితం తమకు ప్రభుత్వం భూమిని పంపిణీ చేసిందన్నారు. ఆ భూమిలో మొక్కజొన్న పంట సాగుచేస్తున్నామని తెలిపారు. తమకు ఎలాంటి నోటీసులు కూడా ఇవ్వకుండా గత సోమవారం రాత్రి రెవెన్యూ అధికారులు ట్రాక్టర్‌తో మొక్కజొన్న పంటను దున్నేశారని బాధిత రైతులు వివరించారు. ఆ పొలం ఖచ్చితంగా తీసుకోవాల్సి వస్తే మరో చోటనైనా తమకు భూములు ఇవ్వాలని ఆమెను కోరారు. పరిశీలిస్తామని ఆమె తెలిపారు.


 పులివెందుల/తొండూరు : తీవ్ర కరువు కోరల్లో చిక్కుకున్న అన్నదాతలను ప్రభుత్వం ఆదుకోవాలని కడప ఎంపీ వైఎస్ అవినాష్‌రెడ్డి డిమాండ్ చేశారు. రబీలో సాగు చేసి ఎండిపోయిన బుడ్డశనగ, పొద్దుతిరుగుడు, ధనియాల పంటలను సోమవారం వైఎస్‌ఆర్‌సీపీ రాష్ట్ర కార్యదర్శి దేవిరెడ్డి శివశంకర్‌రెడ్డితో కలసి ఆయన పరిశీలించారు. పూర్తిస్థాయిలో రైతులకు పంట నష్టం జరిగిందని ప్రభుత్వం ఆదుకోవాలని వారు కోరారు.
 
 ముద్దనూరు వ్యవసాయ శాఖ ఏడీ వినయ్‌రెడ్డి, వ్యవసాయాధికారులు కిశోర్ నాయక్, మధుసూదన్‌రెడ్డి, తహశీల్దార్ ఎల్.వి.ప్రసాద్, ఎంపీడీవో ప్రభాకర్‌రెడ్డిలతో పంట నష్టంపై  చర్చించారు. ఈ సందర్భంగా ఎంపీ వైఎస్ అవినాష్‌రెడ్డి అధికారులతో మాట్లాడుతూ  పంటలను చూస్తే చాలా బాధాకరంగా ఉందని.. 10 ఎకరాల్లో సాగు చేస్తే కనీసం తినడానికి కూడా దిగుబడి రాలేదని విచారం వ్యక్తం చేశారు. ఉన్నతాధికారులతో మాట్లాడి ఇన్సూరెన్స్ అందేవిధంగా చూస్తానని రైతులకు అవినాష్‌రెడ్డి భరోసా ఇచ్చారు. దీనిపై లోక్‌సభలో కూడా చర్చిస్తానని హామీ ఇచ్చారు.
  
 ఇలాంటి కరువు చూడలేదు : వందేళ్ల నుండి ఇలాంటి కరువు చూడలేదని రైతులు ఎంపీ వైఎస్ అవినాష్‌రెడ్డికి విన్నవించారు. పంటలు ఎండిపోయాయి. బోరుబావుల్లో భూగర్భజలాలు ఎండిపోయి వందల అడుగుల లోతులో వేసిన బోర్లల్లో చుక్కనీరు పడలేదని.. వ్యవసాయానికి కాదు కదా తాగడానికి నీరు కూడా దొరుకుతుందో.. లేదో సార్ అంటూ రైతులు తమ గోడు విన్నవించారు. బోడివారిపల్లెకు చెందిన రైతు మల్లేల వెంకట్రామిరెడ్డి తన గోడు విన్నవించారు.
 
 10 ఎకరాల్లో బుడ్డశనగ పంటను ఎకరానికి రూ.15వేలు ఖర్చు చేసి సాగు చేస్తే  కనీసం బస్తా కూడా దిగుబడి లేదని రైతులు వాపోయారు. దీంతో రైతులు అధైర్యపడొద్దని.. ప్రభుత్వంపై వైఎస్‌ఆర్‌సీపీ తరపున పోరాటం చేసి అండగా ఉంటామని వైఎస్ అవినాష్‌రెడ్డి హామీ ఇచ్చారు. ఖరీఫ్‌లో రైతులు సాగు చేసిన వేరుసెనగ, పత్తి పంటలకు   ఇన్‌ఫుట్ సబ్సిడీ కోసం జిల్లా వ్యాప్తంగా రెవెన్యూ అధికారులు 7వేల హెక్టార్లు అంటూ  నివేదిక ఇవ్వడంపట్ల రైతులకు అన్యాయం చేశారని ఎంపీ పేర్కొన్నారు.
 
 రెవెన్యూ అధికారులు  కచ్చితమైన విస్తీర్ణం చూపి ఉంటే రైతులకు న్యాయం జరిగి ఉండేదన్నారు. ప్రభుత్వం అనంతపురం జిల్లాకు ఇన్‌ఫుట్ సబ్సిడీ కింద *1300 కోట్లు మంజూరు చేస్తే.. వైఎస్‌ఆర్ జిల్లాకు కేవలం *600కోట్లు ఇచ్చి చేతులు దులుపుకుందన్నారు. జిల్లాపై ప్రభుత్వం ఎంత వివక్షత చూపుతుందో దీన్నిబట్టి అర్థమవుతోందని వైఎస్ అవినాష్‌రెడ్డి ధ్వజమెత్తారు. 2010-11 సంవత్సరానికి ఉల్లి, బుడ్డశనగకు రావాల్సిన ఇన్సూరెన్స్ పెండింగ్‌లో ఉందని.. వెంటనే పరిష్కరించాలన్నారు.
 
 అలాగే 2011-12కు రబీలో రైతులు పంటల బీమాకు సంబంధించి ఏ పంటకు ఇన్సూరెన్స్ వర్థిస్తుందని రాష్ట్ర వ్యవసాయ శాఖ ఇన్సూరెన్స్ చీఫ్ రీజినల్ అధికారి ఎం.రాజేశ్వరి సింగ్‌తో  ఫోన్‌లో మాట్లాడారు. వెంటనే ఆమె స్పందించి పెండింగ్‌లో ఉన్న రైతులు ఇన్సూరెన్స్ డబ్బులు త్వరలో అందజేస్తామని.. జనవరి చివరికి 2012కు సంబంధించిన ఇన్సూరెన్స్ దరఖాస్తులు పరిశీలించి వివరిస్తామని ఆమె తెలిపారు.
 
 అంతకుముందు వైఎస్ అవినాష్‌రెడ్డి తొండూరుకు రాగానే పాటిమీద ఆంజనేయస్వామి ఆలయం వద్ద వైఎస్‌ఆర్ సీపీ నాయకులు, కార్యకర్తలు, అభిమానులు ఘన స్వాగతం పలికారు. తొండూరు ఎస్‌ఐ శ్రీనివాసులు బందోబస్తు నిర్వహించారు. ఈ కార్యక్రమంలో వైఎస్‌ఆర్ సీపీ మండల పరిశీలకుడు బండి రామమునిరెడ్డి, ఎంపీపీ భర్త భూమిరెడ్డి రవీంద్రనాథరెడ్డి, సీనియర్ నాయకులు ఎర్ర గంగిరెడ్డి, తాలుకా ప్రధాన కార్యదర్శి దశరథరామిరెడ్డి, ఎంపీటీసీలు పాలూరు వేణుగోపాల్‌రెడ్డి, అగడూరు శివశంకర్‌రెడ్డి, సర్పంచ్‌లు వెంకట చలమారెడ్డి, ప్రకాష్‌రావు, తుమ్మల గంగిరెడ్డి, మాజీ సర్పంచ్‌లు సురేష్‌రెడ్డి, మాజీ ఎంపీటీసీ ఈశ్వరరెడ్డి, రత్నమయ్య, గంగులయ్య, మాజీ కో.ఆప్సన్ సఫి, వాటర్ షెడ్ చెర్మైన్ సోమశేఖర్ తదితరులు పాల్గొన్నారు.


 గుంటూరు సిటీ: బాధిత రైతుల్లో మనో ధైర్యం నింపేందుకు మరోమారు రాజధాని ప్రాంతంలో పర్యటించనున్నట్టు వైఎస్సార్ సీపీ జిల్లా అధ్యక్షుడు మర్రి రాజశేఖర్ వెల్లడించారు. బుధవారం గుంటూరులోని పార్టీ జిల్లా కార్యాలయంలో ఆయన మీడియాతో మాట్లాడారు. వైఎస్సార్ సీపీ అధినేత వైఎస్ జగన్‌మోహన్‌రెడ్డి ఏర్పాటు చేసిన రాజధాని రైతులు, కౌలు రైతులు, కూలీల హక్కుల పరిరక్షణ కమిటీ గురువారం పలు గ్రామాల్లో పర్యటించి రైతులకు అండగా నిలవనున్నట్టు ఆయన తెలిపారు.
 
 ఉదయం పది గంటలకు ఉండవల్లి నుంచి ప్రారంభించి పెనుమాక, నిడమర్రు, ఉద్దండ్రాయునిపాలెం, లింగాయపాలెం గ్రామాల్లో పర్యటన జరగనున్నట్టు  వివరించారు. ఈ సందర్భంగా రైతులకు తమ అండ ఉంటుందని తెలియజేయడంతోపాటు ప్రభుత్వానికి స్పష్టమైన హెచ్చరికలు కూడా జారీ చేస్తామన్నారు. అనంతరం జిల్లా ఎస్పీని కలసి వాస్తవ పరిస్థితులపై వినతిపత్రం సమర్పిస్తామన్నారు.
  
 రాజధాని ప్రాంతంలోని అన్ని గ్రామాల్లో ఎమర్జెన్సీ వాతావరణం రాజ్యమేలుతోందని  మర్రి రాజశేఖర్ ఆందోళన వ్యక్తం చేశారు. రాజధానికి భూములివ్వని వారిని భయభ్రాంతులకు గురిచేసే విధంగా అక్కడ పచ్చచొక్కాల దమనకాండ అమలవుతోందని ఆరోపించారు.
  
 ప్రజాస్వామ్యంలో ప్రజల భూములను దౌర్జన్యంగా లాక్కునేందుకు ప్రయత్నించడమేమిటని ఆయన ప్రశ్నించారు. ఇవ్వనంటే అర్ధరాత్రి దాడి చేసి పోలీసులతో అక్రమంగా నిర్బంధిస్తారా? ఇదెక్కడి న్యాయం? అంటూ పాలకులను నిలదీశారు. దహనకాండ వ్యవహారంలో శ్రీనాథ్‌చౌదరి అనే వ్యక్తిపై అక్రమ కేసు మోపారన్నారు.
  
 బాధ్యతాయుత ప్రతిపక్షంగా అక్రమాలను ప్రతిఘటిస్తూ రైతులకు అండగా నిలుస్తున్న  వైఎస్సార్ సీపీ పైనే ఆరోపణలు చేస్తూ  తమతోపాటు రైతుల గొంతు నొక్కే ప్రయత్నం చేస్తున్నారని విమర్శించారు. అయితే వారి తాటాకు చప్పుళ్లకు బెరిరే వారు ఇక్కడ ఎవరూ లేరనే విషయాన్ని సీఎం చంద్రబాబు గుర్తుంచుకోవాలన్నారు. తాము ఇక్కడ రాజధాని నిర్మించవద్దని కానీ, ఎవరూ భూములు ఇవ్వవద్దని కానీ ఎన్నడూ వ్యాఖ్యానించలేదని ఆయన స్పష్టం చేశారు.


 పాడేరు : హుద్‌హుద్ తుఫాన్‌తో ఏజెన్సీలో ధ్వంసమైన కాఫీ, మిరియాల తోటలకు సంబంధించి బాధిత రైతులకు రూ.29.3 కోట్ల నష్టపరిహారం విడుదల చేశామని ఐటీడీఏ పీఓ వి.వినయ్‌చంద్ తెలిపారు.   తుఫాను నష్టపరిహారం చెల్లింపులపై మంగళవారం తన కార్యాలయంలో ఉపాధి హామీ పథకం ఏపీడీలు, 11 మండలాల ఉద్యానవన అధికారులతో సమీక్ష సమావేశం నిర్వహించారు.    వ  తుఫాన్‌తో 31,050 మంది గిరిజన రైతులకు చెందిన 37,665 ఎకరాల్లో కాఫీ, సిల్వర్‌ఓక్ తోటలు ధ్వంసమయ్యాయని పీఓ చెప్పారు.
 
 వీరిలో 27,157మంది రైతులకు బ్యాంకు ఖాతాలు ఉన్నాయని ఈ ఖాతాల్లో నష్టపరిహారం సొమ్మును వెంటనే జమ చేస్తామన్నారు. ఇంకా 3,893 మంది రైతులు బ్యాంకు ఖాతాలను ప్రారంభించాల్సి ఉందని, వారంతా వచ్చే నెల 3వ తేదిలోగా బ్యాంకు ఖాతాలు తెరిచే విధంగా అధికారులు చర్యలు తీసుకోవాలని  ఆదేశించారు. నష్టపరిహారం  బుధవారం నుంచి ఆయా రైతుల   ఖాతాల్లో జమ అవుతుందన్నారు.  
  
 నష్టం నమోదుకు ఫొటోలు లేనిపక్షంలో గ్రామాలకు కెమెరాలతో వెళ్లి ఫొటోలు తీయాల్సిన బాధ్యత అధికారులపై ఉందన్నారు. నేలకొరిగిన చెట్టును తొలగించిన వెంటనే ఆ చెట్టుకు రూ.100  చొప్పున పరిహారం చెల్లించాలని, జాబ్‌కార్డులు లేని రైతులకు వెంటనే జాబ్‌కార్డులు మంజూరు చేయాలని ఆదేవించారు. చింతపల్లి, కొయ్యూరు, జీకేవీధి మండలాల్లో తుఫాను నష్టాన్ని ఆన్‌లైన్ చేయడంలో వెనుకబడి ఉండటాన్ని పీఓ తప్పుపట్టారు. 3వ తేదిలోగా ఆన్‌లైన్ పనులను పూర్తి చేసి బాధిత రైతులకు పరిహారం అందించాలన్నారు.   సమావేశంలో పీహెచ్‌ఓ చిట్టిబాబు, ఉపాధి హామీ పథకం ఏపీడీలు ప్రసాద్, నాగేశ్వరరావు తదితరులు పాల్గొన్నారు.
  
 పంచాయతీ భవన నిర్మాణాలకు సర్పంచ్‌లు ముందుకురావాలి
 ఏజెన్సీలో  మంజూరైన పంచాయతీ భవన నిర్మాణాలు చేపట్టేందుకు సంబంధిత పంచాయతీల సర్పంచ్‌లంతా ముందుకు రావాలని  పీఓ వినయ్‌చంద్ కోరారు. కితలంగి, బాకూరు, సీకుమద్దిల, మఠంభీమవరం, గత్తుం, పైనంపాడు, కొరవంగి, గోమంగి, బొంగరం, సుంకరమెట్ట, పట్టాం, రంగశీల పంచాయతీల సర్పంచ్‌లతో ఆయన సమావేశం నిర్వహించారు.  వచ్చే ఏడాది మార్చి నెలలోగా పంచాయతీ భవనాల నిర్మాణాలను పూర్తి చేయాలని ఆయన సూచించారు.   ఇప్పటికే 68 చెక్‌డ్యాం పనులు పూర్తి చేశామని, మరిన్ని చెక్‌డ్యాంల నిర్మాణానికి చర్యలు తీసుకుంటామన్నారు.


  పెనుగొండ, న్యూస్‌లైన్ : పై-లీన్ తుపాను, అల్పపీడనం కారణంగా కురిసిన భారీ వర్షాలకు తీవ్రంగా నష్టపోయిన తమను ఆదుకోవాలని పలువురు రైతులు, రైతు సంఘాల నాయకులు ముఖ్యమంత్రి కిరణ్‌కుమార్‌రెడ్డిని కోరారు. శనివారం ఉదయం స్థానిక ఏఎంసీ కార్యాలయంలో సహకార సంఘాలు దీర్ఘకాలిక రుణాలపై అందించిన ట్రాక్టర్లను, ద్విచక్రవాహానాలను రైతులకు సీఎం అందజేశారు. ఈ సందర్భంగా పలువురు రైతులు ఆయనను కలిసి తమ కష్టాలను మొరపెట్టుకున్నారు.
  
   ప్రకృతి విలయాల కారణంగా ఏటా నష్టపోతున్నామని తమను అన్ని విధాలుగా ఆదుకోవాలని విజ్ఞప్తి చేశారు.  పై-లీన్ తుపాన్ కారణంగా వరి చేలు నేలనంటాయని, ఈనిక సమయంలో వర్షాలు కురిసినందున వెన్నులోని గింజలు పొల్లుగా మారాయని ములపర్రు సొసైటీ అధ్యక్షుడు టీవీసీహెచ్ నాగేశ్వరరావు  సీఎంకు విజ్ఞప్తి చేశారు. రైతులకు ఇన్‌ఫుట్ సబ్సిడీ ఇచ్చి ఆదుకోవాలని కోరారు. సహకార సంఘాల్లో రుణాలు పొందిన రైతులకు రెండేళ్లుగా పావలా వడ్డీ రాయితీ రావాల్సి ఉందని, ఈ బకాయిలను రైతుల ఖాతాల్లో జమ చేయాలని ఇలపర్రు సొసైటీ అధ్యక్షుడు చేకూరి సుబ్బరాజు కిరణ్‌కుమార్‌రెడ్డికి విజ్ఞప్తి చేశారు.
  
   సహకార సంఘాల ద్వారా రుణాలు తీసుకుంటున్న రైతులకు ఈసీలు మీ సేవ ద్వారా తీసుకోవడం వల్ల అదనపు ఆర్థిక భారమవుతోందని విన్నవించారు. అనంతరం సీఎం మాట్లాడుతూ రైతు సంక్షేమమే తమ ప్రభుత్వ ధ్యేయమని, అందుకోసం ఎన్నో పథకాలను అమలు చేసి అండగా నిలుస్తున్నామని చెప్పారు. రైతులకు లక్ష రూపాయల వరకూ వడ్డీలేని రుణాలను అందిస్తున్నామని, ఉచిత విద్యుత్, ఇతర రాయితీలు అందిస్తన్నామన్నారు. ఈ సందర్భంగా రూ. 6.30 లక్షల విలువైన 16 ట్రాక్టర్లను, 16 ద్విచక్రవాహనాలను అందజేశారు. అనంతరం సీఎం కృష్ణా జిల్లా పర్యటనకు వెళ్లారు. ఈ కార్యక్రమంలో మంత్రి పితాని సత్యనారాయణ, ఎమ్మెల్యేలు కొత్తపల్లి సుబ్బారాయుడు, బంగారు ఉషారాణి, ఈలి నాని, కారుమూరి నాగేశ్వరరావు, డీసీసీబీ చైర్మన్ ముత్యాల వెంకటేశ్వరరావు, కలెక్టర్ సిద్ధార్థజైన్ పాల్గొన్నారు. 
  
  ముఖ్యమంత్రికి వినతుల వెల్లువ
  ఈ సందర్భంగా పలువురు ముఖ్యమంత్రి కిరణ్‌కుమార్‌రెడ్డికి వినతులు అందజేశారు. అనేక గ్రామాలకు ప్రధాన కూడలిగా ఉన్న మార్టేరును మండల కేంద్రంగా ఏర్పాటు చేయాలని ఆ గ్రామానికి  చెందిన వెలగల నాగేశ్వరరెడ్డి, నల్లిమిల్లి వివేకానందరెడ్డి, తేతలి రాజారెడ్డి, కర్రి జగధీశ్వరరెడ్డి విన్నవించారు. ఎస్సీ వర్గీకరణ బిల్లు చట్టబద్ధతకు కేంద్ర ప్రభుత్వంపై ఒత్తిడి తీసుకురావాలని ఎమ్మార్పీఎస్ రాష్ట్ర ప్రధాన కార్యదర్శి ముప్పిడి మోషేమాదిగ, లీగల్ విభాగం రాష్ట్ర అధ్యక్షుడు రాపాక ప్రభాకర్ మాదిగ సీఎంను కలిసి వినతిపత్రం సమర్పించారు. 
  
  జిల్లా అధికారులను ప్రశంసించిన సీఎం 
  ఏలూరు : జిల్లా యంత్రాంగం సమన్వయంతో పనిచేసి రచ్చబండ కార్యక్రమాన్ని విజయవంతం చేయడంలో ఎంతో కష్టపడ్డారని కలెక్టర్ సిద్ధార్థ జైన్, జేసీ టి. బాబూరావునాయుడు, ఎస్పీ హరికృష్ణలను ముఖ్యమంత్రి ఎన్.కిరణ్‌కుమార్ రెడ్డి ప్రశంసించారు. కృష్ణా జిల్లా రచ్చబండ కార్యక్రమంలో పాల్గొనడానికి శనివారం మధ్యాహ్నం పెనుగొండ ఏఎంసీ గ్రౌండ్స్‌లో హెలికాప్టర్‌లో బయలుదేరే సమయంలో ముఖ్యమంత్రి జిల్లా అధికారులను ప్రశంసించారు. జేసీ బాబూరావునాయుడిని ప్రత్యేకం ము ఖ్యమంత్రి పిలిచి కరచాలనం చేసి ఇదే స్ఫూర్తితో జిల్లా అభివృద్ధికి మరింత కష్టపడాలని సూచించారు.