మురికివాడలో.. మేకప్ లేకుండా షూటింగ్!

సాధారణంగా సినిమా షూటింగ్ అంటే పెద్ద పెద్ద బిల్డింగులు, వాటి మధ్యలో స్విమ్మింగ్ పూల్... ఇలాంటి అందమైన వాతావరణం కనిపిస్తుంది. కానీ, మాస్ స్టార్‌గా పేరొందిన గోపీచంద్ మాత్రం తన సినిమాల్లో సహజత్వానికి దగ్గరగా చేస్తారు. ఇంతకుముందు కూడా ఒక డంపింగ్ యార్డు వద్ద సెక్యూరిటీ గార్డుగా విధులు నిర్వర్తించే పాత్రలో చేసిన గోపీచంద్.. తాజాగా సికింద్రాబాద్ స్లమ్స్‌లో షూటింగ్ చేస్తున్నాడు. అది కూడా అస్సలు మేకప్ వేసుకోకుండా!! హ్యాట్రిక్ హిట్లు సాధించిన సంపత్ నంది దర్శకత్వంలో గోపీచంద్ హీరోగా చేస్తున్న సినిమా రెండో షెడ్యూలు షూటింగ్ ఆ స్లమ్‌లో ప్రత్యేకంగా వేసిన ఇంటి సెట్లో పూర్తయింది. శ్రీ బాలాజీ సినీ మీడియా బ్యానర్‌పై జె.భగవాన్, జె పుల్లారావు ఈ సినిమాను తెరకెక్కిస్తున్నారు. ఈ సినిమా మొదటి షెడ్యూలు థాయ్‌లాండ్‌లో 32 రోజుల షూటింగ్ జరుపుకొంది.