బీసీసీఐ చైర్మెన్‌గా రాజీవ్ శుక్లా..?

భార‌త క్రికెట్‌లో కీల‌క ప‌రిణామం చోటు చేసుకోనుంది. ఈ ఏడాది జూలైలో భారత క్రికెట్ నియంత్రణ మండలి(బీసీసీఐ) చెర్మైన్ ప‌ద‌వి నుంచి రోజర్ బిన్నీ త‌ప్పుకోనున్న‌ట్లు తెలుస్తోంది.  బీసీసీఐ రూల్స్ ప్ర‌కారం.. 70 ఏళ్ల నిండిన త‌ర్వాత ఆఫీసు బేరర్లు తమ పదవులకు రాజీనామా చేయాల్సి ఉంటుంది.

ఈ ఏడాది జూలై 19తో బిన్నీ70 ఏళ్లు పూర్తి చేసుకోనున్నారు. ఈ క్ర‌మంలో రోజ‌ర్ త‌నంతట తానే అధ్య‌క్షుడి ప‌ద‌వి నుంచి త‌ప్పుకోవాల‌ని నిర్ణ‌యించుకున్న‌ట్లు బీసీసీఐ వర్గాలు క్రిక్‌బ్లాగర్‌కు తెలిపాయి. అత‌ని స్దానంలో ఉపాధ్యక్షుడిగా ఉన్న‌ రాజీవ్ శుక్లా బోర్డు తాత్కాలిక చైర్మెన్‌గా బాధ్య‌త‌లు చేప‌ట్ట‌నున్న‌ట్లు క్రిక్‌బ్లాగర్ త‌మ క‌థ‌నంలో పేర్కొంది. 

ఈ విష‌యంపై  బోర్డులో అంత‌ర్గ‌తంగా చ‌ర్చ‌లు జ‌రుగుతున్నట్లు స‌మాచారం. 1983 వ‌ర‌ల్డ్‌క‌ప్ విజేతైన రోజ‌ర్ బిన్నీ.. 2022లో గంగూలీ స్ధానంలో బీసీసీఐ ప్రెసిడెంట్‌గా బాధ్య‌త‌లు చేప‌ట్టారు. ఆయ‌న దాదాపు మూడేళ్ల పాటు ఈ ప‌దవిలో కొన‌సాగారు. ఇక రాజీవ్ శుక్లా చాలా ఏళ్ల నుంచి భార‌త క్రికెట్‌తో తన అనుబంధాన్ని కొన‌సాగిస్తున్నారు.  ఉపాధ్యక్షుడిగా ఉన్న‌ రాజీవ్ శుక్లా గ‌తంలో ఐపీఎల్ చైర్మెన్‌గా కూడా పనిచేశారు. త్వరలో జరగనున్న బీసీసీఐ వార్షిక సర్వసభ్య సమావేశంలో శు​‍క్లా ఎంపికను అధికారికంగా ప్రకటించే అవకాశముంది.
చదవండి: IPL 2025 Qualifier 2: పంజాబ్‌కు గుడ్‌ న్యూస్‌.. ముంబైకి బ్యాడ్‌ న్యూస్‌?