గ్యాంగ్‌స్టర్స్‌ భూతాలైతే..!

నటి జెనీలియాను పోలీస్‌ స్టేషన్‌కు తీసుకుని వెళ్లనున్నారట రామ్‌గోపాల్‌ వర్మ. ‘సత్య (1988), కౌన్‌ (1999), శూల్‌’ (1999) చిత్రాల తర్వాత బాలీవుడ్‌  నటుడు మనోజ్‌ బాజ్‌పాయ్, దర్శకుడు రామ్‌గోపాల్‌ వర్మ కాంబినేషన్‌లో రూపొందనున్న చిత్రం పోలీస్‌ స్టేషన్‌ మే భూత్‌’. ఈ సినిమాలోని ఓ లీడ్‌ రోల్‌ కోసం జెనీలియాను సంప్రదించగా, ఆమె ఓకే చెప్పారని బాలీవుడ్‌ సమాచారం. ఈ హారర్‌ కామెడీ సినిమా చిత్రీకరణ ఈ వారంలోనే హైదరాబాద్‌లో ప్రారంభం కానుందని తెలిసింది. ప్రస్తుతం ఈ సినిమాకు సంబంధించిన సెట్‌ వర్క్‌ జరుగుతోందట.

ఇక ఈ ఏడాది ఏప్రిల్‌లో ఈ సినిమాను ప్రకటించారు రామ్‌గోపాల్‌ వర్మ. ఓ పోలీస్‌ స్టేషన్‌లో జరిగిన భారీ ఎన్‌కౌంటర్‌లో కొంతమంది గ్యాంగ్‌స్టర్స్‌ చని పోతారు. ఆ చని పోయిన గ్యాంగ్‌స్టర్స్‌ భూతాలుగా మారడంతో ఈ పోలీస్‌ స్టేషన్‌ ఓ హాంటెడ్‌ స్టేషన్‌గా మారి పోతుంది. భూతాలైన గ్యాంగ్‌స్టర్స్‌ పోలీసులను ఎలా ఇబ్బంది పెడతారు? ఈ సమస్య నుంచి పోలీసులు ఎలా తప్పించుకోగలిగారు? అన్నదే పోలీస్‌ స్టేషన్‌ మే భూత్‌’ సినిమా కథ అని సమాచారం.