సీఎం సభావేదిక పనుల పరిశీలన

భట్టిప్రోలు: వేమూరు నియోజకవర్గ పరిధిలో గురువారం ముఖ్యమంత్రి చంద్రబాబునాయుడు పర్యటన సందర్భంగా నిర్వహించనున్న మహాసభ ఏర్పాట్లను వేమూరు ఎమ్మెల్యే నక్కా ఆనందబాబు మంగళవారం సంబంధిత అధికారులతో కలిసి పరిశీలించారు. భట్టిప్రోలు–సూరేపల్లి రహదారి మార్గంలో వేమవరం వద్ద 216ఎ జాతీయ రహదారి పక్కన నిర్మితమవుతున్న సభావేదిక, ప్రజలు కూర్చునే ఏర్పాట్లు, పార్కింగ్‌, తాగునీటి సదుపాయం, రైతులకు పాస్‌ పుస్తకాల పంపిణీ కౌంటర్లు, మీడియా గ్యాలరీ, పార్టీ క్యాడర్‌ వంటి అంశాలపై ఎమ్మెల్యే అధికారులకు పలు కీలక సూచనలు చేశారు. ఆనందబాబు మాట్లాడుతూ రైతుల అభివృద్ధికి రాష్ట్ర ప్రభుత్వం అత్యంత ప్రాధాన్యతనిస్తుందని, సీఎం చంద్రబాబు చేతుల మీదుగా రైతులకు పాస్‌ పుస్తకాలు అందించడం జరుగుతుందన్నారు. అమృతలూరు, చెరుకుపల్లి, ఐలవరం, చుండూరు, వేమూరు, కొల్లూరు ప్రాంతాల నుంచి వచ్చేవారికి పార్కింగ్‌ ఏర్పాట్లు సిద్ధం చేసినట్లు అధికారులు ఎమ్మెల్యే వివరించారు. ఎమ్మెల్యే వెంట రెవెన్యూ, పోలీస్‌, రోడ్లు, భవనాలు, వ్యవసాయ శాఖల అధికారులు, స్ధానిక ప్రజా ప్రతినిధులు, కూటమి నాయకులు పాల్గొన్నారు. భట్టిప్రోలు: భట్టిప్రోలు మండలం సూరేపల్లిలో ఈనెల 9న సీఎం చంద్రబాబు నాయుడు పాల్గొనే బహిరంగ సభ నేపధ్యంలో ఏర్పాట్లను బాపట్ల జిల్లా కలెక్టర్‌ డాక్టర్‌ వి. వినోద్‌ కుమార్‌ సోమవారం రాత్రి సమీక్షించారు. హెలిప్యాడ్‌ నిర్మాణాన్ని పరిశీలించి, పనులు వేగంగా పూర్తి చేయాలని ఆదేశించారు. సభా వేదిక వద్ద ప్రజలకు ఇబ్బందులు కలగకుండా పక్కాగా ఏర్పాట్లు చేయాలని, అధికారులందరూ సమన్వయంతో పని చేయాలని కలెక్టర్‌ స్పష్టం చేశారు. ఆయన వెంట వివిధ శాఖల అధికారులు పాల్గొన్నారు.