ఆ మధ్య వరకు ప్రతి టీవీ చానల్‌లోనూ ఆవిడ చేసిన వంటలే... ఏ వార్తాపత్రికలో చూసినా ఆమె రుచులే... ఏ రేడియో ఆన్ చేసినా ఆమె వంటల స్వరమే...చిరునవ్వులు చిందిస్తూ, చేసే పనిని ఆస్వాదిస్తూ...కన్నతల్లిలా ఆప్యాయంగా వంట నేర్పిస్తూ... ఇంటింటా ప్రత్యక్షమయ్యారు... ‘శాకాహార వంటలు’ పరిచయం చేశారు... ఐదువేలకు పైగా కార్యక్రమాలు చేసి రికార్డు సృష్టించిన దిట్ట పాకశాస్త్ర ప్రవీణురాలువిజయారావు. ఊరంతా పురుష పుంగవులే చెఫ్‌లుగా రాణిస్తుంటే, అందుకు భిన్నంగా వనితల చేతి వంటే రుచి అని నిరూపించిన ఆమె ప్రస్థానం
  
  ఈ ‘మహిళా దినోత్సవ’ ప్రత్యేకం...
  
  
  ఆ ఇంట్లోకి అడుగుపెట్టగానే అవార్డులు, బహుమతులు స్వాగతం పలుకుతాయి. ఆ వెంటనే ఆ బహుమతులు అందుకున్న వ్యక్తి చిరునవ్వుతో లోపలకు ఆహ్వానిస్తారు. ఆ పలకరింపులో అమ్మలోని ఆప్యాయత, ఆ చేతి ముద్దల మాధుర్యం గుబాళిస్తాయి. ఆవిడ చేయి కదిపితే వంట, చిరునవ్వులో చిట్టి చిట్కాలు, పలకరింతలో పంచదారచిలుకలు... మొత్తం మీద ఆ ఇల్లు నలభీమశాల. ఏ మాత్రం భేషజం, గర్వం లేకుండా నిండుకుండలా ఉన్న ఆమె ఇంట్లో వంటింటి ఘుమఘుమలు మన నాసికను ముద్దాడతాయి. అంతటి అమృతహస్తం విజయారావుది. వరంగల్‌లో పుట్టి పెరిగిన విజయారావు, ఐడిపియల్‌లో పనిచేస్తున్న రామమోహనరావుగారితో వివాహం జరిగాక ఎన్నో రాష్ట్రాలు పర్యటించి, ప్రస్తుతం హైదరాబాద్‌లో తన ఏకైక కుమారుడితో నివాసం ఉంటున్నారు.
  
 ఇలా మక్కువ...
  ఆమె చిరునవ్వులకు ఏ మాత్రం తీసిపోని, ఆ గదికి అందం తెచ్చిన అవార్డుల గురించి ప్రశ్నిస్తే,  ‘‘మా అమ్మ వంట బాగా చేసేది. అందుకేనేమో నాకు చిన్నప్పటి నుంచీ వంట మీద మక్కువ కలిగింది. అమ్మ దగ్గర నుంచి రకరకాల వంటలు నేర్చుకున్నాను. అలా నేర్చుకున్న వంటలకే ఈ అవార్డులు. అంతేకాదు... మావారు భోజనప్రియులు. అందువల్ల వంట బాగా చేయడం నేర్చుకున్నాను. దానికితోడు ఆయనే స్వయంగా రకరకాల వంటలు తయారుచేయడం దగ్గరుండి మరీ నేర్పించారు. ఆయన శిక్షణలో మరింత రుచిగా చేయడం వచ్చింది. ఆ వంటలను మా వంటింటి నుంచి, అందరి వంటిళ్లకు చేర్చాలనుకున్నాను. కొత్తకొత్త వంటలను అక్షరీకరించి, 1998 నుంచి అన్ని ప్రముఖ వార్తాపత్రికలకు పంపడం మొదలుపెట్టాను. అవి అందరి వంటిళ్లను పలకరించాయి. ఇదంతా ఒక్కరోజులో సాధించినది కాదు.
  
 కఠోరశ్రమ...
  ‘‘నా వంటలు బాగున్నాయని చాలామంది ప్రశంసిస్తుంటారు. అదే నాకు ఆనందం, బలం. ఆ ఆనందంతోనే  అన్ని పత్రికలకూ కొన్ని వందల వంటల గురించి రాసి పంపాను.  అదే సమయంలో, ‘వంటలు చేస్తూ జీవితం గడుపుతావా?’ అని ఎందరో నన్ను నిరాశపరిచారు. ఎప్పుడైతే నేను అవార్డులు, బహుమతులు సంపాదించుకున్నానో, అప్పుడు వారి నోళ్లన్నీ మూతపడ్డాయి’’ ఒకప్పుడు అందరూ  తనను  నిరాశపరిచిన సంఘటన గుర్తుతెచ్చుకుంటూ చెప్పారు అరవైనాలుగేళ్ల విజయారావు. ఫలానా వారి అమ్మాయిగానో, ఫలానా వారి భార్యగానో కాకుండా, ‘విజయారావు’ అనగానే పాకశాస్త్ర ప్రవీణురాలు అని ఠక్కున గుర్తు వచ్చేలా చేసుకున్నారు. ఇంత గుర్తింపు వెనుక ఆమె కఠోరశ్రమ, పట్టుదల ఉన్నాయి.
  
  అన్నిటినీ ఆస్వాదిస్తారు.
 ఇన్నిరకాల వంటలు ఆవిడకు తెలియడానికి కారణం విజయారావుగారి భర్త రామమోహనరావు ఉద్యోగ రీత్యా  తమిళనాడు, కర్ణాటక, ఢిల్లీ వంటి రాష్ట్రాలలో ఉన్నప్పుడు అక్కడి వంటకాలు నేర్చుకున్నారు. ‘‘నేను ఎక్కడికి వెళితే అక్కడి రుచులను బాగా ఆస్వాదించాను. అలాగే నేను మన వంటకాలు తయారుచేసి అక్కడి వారికి రుచి చూపించాను. వారి దగ్గర నుంచి అక్కడి వంటకాలు నేర్చుకున్నాను. అలా రకరకాల వంటలలో ప్రావీణ్యం సంపాదించాను’’ అంటారు... వంటలకు భాషాభేదం లేదనే విజయారావు.
  తపన ఉండాలి...
  సుమారు ఇరవై ఏళ్ళ పాటు 23 చానల్స్‌లో 5000 పైగా వంటలు చేసిన ఆమె, స్టార్ ప్లస్ చానెల్‌లో మాస్టర్ చెఫ్ కార్యక్రమానికి వెళ్లినప్పుడు, అక్కడ నాన్ వెజ్ తయారుచేయవలసి రావడంతో వెనక్కు వచ్చేశారు. ప్రస్తుతం ఏ చానల్‌లోనూ పెద్దగా కనిపించట్లేదు. ఆ మాటే అడిగితే, ‘‘ఈమధ్యకాలంలో టీవీలో వంటల కార్యక్రమాలు చేసేవారు, టీవీలో కనిపిస్తే చాలనుకుంటున్నారు. నాకు మాత్రం వంట బాగా రావాలనే తపన ఎక్కువ. నేనే స్వయంగా తింటున్నంత ఆనందంగా కార్యక్రమాన్ని నిర్వహిస్తాను. అందువల్లే ఇన్ని ఎపిసోడ్స్ చేయగలిగాను. అంతేకాదు, ఈ కార్యక్రమాల పని మీద సుమారు ఇరవై జిల్లాల్లో పర్యటించాను. వంటల కార్యక్రమాలకు జడ్జిగా వెళ్లిన ప్రతిచోటా చాలామంది మగవాళ్లు, ‘మేం మంచి భోజనం తింటున్నాం, అని నన్ను అభినం దిస్తూ  నా ఆటోగ్రాఫ్ అడుగుతుంటే నాకు మళ్లీ ఉత్సా హం వస్తూంటుంది’’ అంటారు.
  
  తెలుగువంటలే ఇష్టం...
  ‘‘నేను ఎన్ని రకాల వంటలు చేసినా పులిహోర అంటే చాలా ఇష్టం. ఇంకా చేగోడీలు, మిర్చి బజ్జీలు కూడా ఇష్టంగా తింటాను. కొందరు నేపాలీయులు నా దగ్గర ప్రత్యేకంగా పులిహోర తయారీ నేర్చుకున్నారు.  స్వీట్స్ లో పాలతో తయారుచేసేవంటే ఇష్టం’’ అంటారు ఈ వంటలరాణి. ఇంతకాలం వివిధ ప్రాంతాలకు చెందిన రకరకాల వంటలను పరిచయం చేసిన విజయారావు, ప్రస్తుతం ఎస్‌విబిసి చానల్‌వారి ‘నైవేద్యం’ కార్యక్రమం ద్వారా ప్రసాదాలు ఎలా తయారుచేయాలో నేర్పబోతున్నారు.
  - డా. వైజయంతి
  
  
  ‘టీవీలో నా కార్యక్రమం చూసి ఇడ్లీబండి, బజ్జీల బండి పెట్టుకున్నవాళ్లు ‘అమ్మా! మీరు నాకు సహాయం చేశారు’ అంటున్నప్పుడు నా ఆనందానికి అవధులు ఉండవు. అలాగే నేను ఈ రంగంలో రాణించడానికి కారణం ప్రముఖ రచయిత్రి, వంటలు - పిండివంటలు పుస్తకం ఫేమ్ మాలతీచందూర్‌గారే. నేను ఆవిడకు ఏకలవ్య శిష్యురాలిని. ఘుమఘుమలు, మిర్చిమసాలా, ఖానా ఖజానా అనే మూడు పుస్తకాలు ప్రత్యేకంగా ప్రచురించాను. ఈ పుస్తకాలు కొత్తగా పెళ్లయినవారికి  బాగా ఉపయోగపడతాయి’
  - విజయారావు


 వంకాయ... పుచ్చులు ఏరేస్తాం.
  బెండ... వేళ్ల చివర్లు విరిచేస్తాం.
  ఆలూ... తిప్పితిప్పి చూస్తాం.
  చిక్కుళ్లు... విత్తనాల్ని ఒత్తుతాం.
  ఒక్కోదానికి ఒక్కో టెస్ట్.
  అలాగే క్యాప్సికమ్.
  కలర్ చూసి సెలక్ట్ చేసుకుంటాం.
  పచ్చిది గ్రీన్... పండింది రెడ్...
  మగ్గింది ఆరెంజ్... ఆఖర్న ఎల్లో.
  రంగు చూస్తే నోరూరుతుంది!
  ఊరితే ఓకే, మండితేనో...
  (అసలే మిర్చి కదా!).
  అంత లేదు!
  క్యాప్సికమ్... పైకి పెదరాయుడు.
  లోపల చంటిగాడు.
  సాఫ్ట్ అండ్ స్పైసీ!
  ఈ రెండూ కలిసిన ‘రుచులు’...
  ఇంచుమించు స్వర్గపుటంచులు!
  
  చాప్సీ నూడుల్స్ సూప్
  
  కావలసినవి
  నూనె - తగినంత; అల్లం పేస్ట్ - టీ స్పూను; ఉల్లితరుగు - పావు కప్పు; క్యాప్సికమ్ తురుము - కప్పు; క్యారట్ తురుము - పావు కప్పు; ఉప్పు - తగినంత; కారం - టీ స్పూను; టొమాటో సాస్ - రెండు టేబుల్ స్పూన్లు; చిల్లీసాస్ - అర టీ స్పూను; పంచదార - టీ స్పూను; వెనిగర్ - పావు టీ స్పూను; కార్న్ ఫ్లోర్ - రెండు టేబుల్ స్పూన్లు; నూడుల్స్ - కప్పు; సోయాసాస్ - అర టీ స్పూను; మిరియాలపొడి - అర టీ స్పూను
  
  తయారి
  ఒక పాన్‌లో నాలుగు టేబుల్ స్పూన్ల నూనె వేసి అందులో అల్లం పేస్ట్, ఉల్లితరుగు, క్యారట్ తురుము వేసి బాగా కలపాలి కారం, ఉప్పు జతచేయాలి
  
   మంట పెద్దది చేసి రెండు నిముషాలు కలుపుతుండాలి  
  
  టొమాటో సాస్, చిల్లీసాస్, పంచదార, వెనిగర్ వేసి కలపాలి  కొద్దిసేపు ఉడకనివ్వాలి  
  
  ఒక కప్పులో కొద్దిగా చల్లనీరు, కార్న్ ఫ్లోర్ వేసి బాగా కలిపి, ఉడుకుతున్న కూరల మిశ్రమంలో వేయాలి  
  
  మిశ్రమం చిక్కబడేవరకు కలపాలి  
  
  సోయాసాస్ వేసి బాగా కలిపితే గ్రేవీ తయారయినట్లే
  
  ఒక పాత్రలో తగినంత ఉప్పు, నీరు పోసి మరిగించాలి
  
  నూడుల్స్ వేసి రెండుమూడు నిముషాలు నూడుల్స్ మెత్తబడేవరకు ఉంచాలి  
  
  నీటిని ఒంపేసి, నూడుల్స్‌ని చన్నీటిలో రెండుమూడుసార్లు జాడించాలి
  
  కొద్దిగా నూనె జతచే యాలి (ఇలా చేయడం వల్ల నూడుల్స్ అతుక్కోకుండా ఉంటాయి)  
  
  ఒక పాన్‌లో నూనె కాగాక నూడుల్స్ వేసి వేయించి కిచెన్ టవల్ మీద ఉంచాలి (నూనె అంతా పోయి బాగా క్రిస్పీగా అవుతాయి)
  
  సర్వింగ్ బౌల్‌లో వీటిని వేయాలి. తయారుచేసి ఉంచుకున్న గ్రేవీని నూడుల్స్ మీద పోసి మిరియాలపొడి చల్లి సర్వ్ చేయాలి.
  
  స్టఫ్‌డ్ పెపర్స్ విత్ వెజిటబుల్ ఉప్మా
  
  కావలసినవి:
  నూనె - నాలుగు టేబుల్ స్పూన్లు; ఉల్లితరుగు - పావుకప్పు; బీరకాయ తరుగు - పావు కప్పు; పసుపురంగు క్యాప్సికమ్ తరుగు - పావు కప్పు; ఎరుపురంగు క్యాప్సికమ్ తరుగు - పావు కప్పు; గ్రీన్ క్యాప్సికమ్ - 10 (స్టఫ్ చేయడానికి అనువుగా పై భాగం జాగ్రత్తగా కట్ చేయాలి); పుదీనా తరుగు - పావుకప్పు; నీరు - ఒకటిన్నర కప్పులు; టొమాటో తరుగు - పావు కప్పు ; బియ్యపురవ్వ - కప్పు; టొమాటో పేస్ట్ - 4 టేబుల్ స్పూన్లు; ఉప్పు - తగినంత
  
  తయారి:
   ఒక పాత్రలో తగినంత నూనె వేసి కాగాక, ఉల్లితరుగు, బీర కాయ తరుగు, ఎరుపు + పసుపు క్యాప్సికం తరుగు, పుదీనా తరుగు, టొమాటో తరుగు వేసి బాగా కలపాలి. కొద్దిగా వేగాక, తగినంత నీరు పోసి మరిగించాలి. బాగా మరిగాక బియ్యపురవ్వ వేస్తూ కలుపుతుండాలి  
  
  టొమాటో పేస్ట్ వేసి మరోమారు కలపాలి  మంట తగ్గించి మూత పెట్టి, పది నిముషాలు ఉడికించాలి  
  
  మరొక పాత్రలో కొద్దిగా నూనె వేసి పై భాగం కట్ చేసిన క్యాప్సికమ్‌లను ఆ నూనెలో వేసి జాగ్రత్తగా కలపాలి  
  
  కొద్దిగా వేగగానే తీసేసి, అందులో పైన తయారుచేసి ఉంచుకున్న ఉప్మా మిశ్రమాన్ని స్టఫ్ చేసి మరో మారు బాణలిలో ఉన్న నూనెలో వేసి కాయ ఆకారం చెదరకుండా జాగ్రత్తగా కలిపి దించేయాలి  
  
  వాటిని అలాగే సర్వ్ చేయాలి.
  
  చీజ్ క్యాప్సికమ్ పరాఠా
  
  కావలసినవి:
  క్యాప్సికమ్ - 4 (పెద్దవి); పెరుగు - పావు కప్పు; గరంమసాలా - పావు టీ స్పూను; ఉప్పు - తగినంత; గోధుమపిండి - రెండుకప్పులు; చీజ్ స్లైసులు - తగినన్ని; నూనె - తగినంత
  
  తయారి:
  క్యాప్సికమ్‌ను శుభ్రంగా కడిగి, మిక్సీలో వేసి మెత్తటి పేస్ట్‌లా తయారుచేసుకోవాలి  
  
  ఒకపాత్రలో క్యాప్సికమ్ పేస్ట్, పెరుగు, గరం మసాలా, ఉప్పు వేసి బాగా కలపాలి
  
  ఇందాకటి మిశ్రమంలో గోధుమపిండి జతచేసి చపాతీపిండి మాదిరిగా కలపాలి  
  
  పాత్ర మీద మూతగా తడి వస్త్రం వేసి పదినిముషాలు పక్కన ఉంచాలి  
  
  చపాతీలు ఒత్తుకుని పెనం మీద వేసి, చుట్టూ నూనె వేసి కాల్చి హాట్‌ప్యాక్‌లోకి తీసుకోవాలి  
  
  ఒక్కో చపాతీ మీద ఒక్కో చీజ్ స్లైస్ వేసి చపాతీలను రోల్ చేసి, సర్వ్ చేయాలి.
  
  క్యాప్సికమ్ పికిల్
  
  కావలసినవి
  క్యాప్సికమ్ - 3 (ఏ రంగు కావాలంటే వాటిని ఎంచుకోవచ్చు); పల్లీలు - అర కప్పు; ఎండుమిర్చి - 15; నూనె - 100 గ్రా.; లవంగాలు - 3; వెల్లుల్లి రేకలు - 4; పసుపు - చిటికెడు; ఉప్పు - తగినంత; చింతపండు రసం - మూడు టేబుల్ స్పూన్లు; ఆవాలు - టీ స్పూను; జీలకర్ర - టీ స్పూను
  
  తయారి
  ఒక పాత్రలో పల్లీలు, ఎండుమిర్చి వేసి బాగా కలిపి, దించి, చల్లారాక పొడి చేయాలి  
  
  మరొక పాత్రలో నూనె వేసి కాగాక లవంగాలు, వెల్లుల్లి రేకలు వేసి వేయించాలి  
  
  అందులో క్యాప్సికమ్ ముక్కలు వేసి ఒకసారి బాగా కలిపి మెత్తబడే వరకు ఉంచాలి  పసుపు, ఉప్పు జత చేయాలి  
  
  చింతపండు రసం వేసి బాగా కలిపి ఐదు నిముషాలు ఉడికించి చల్లారాక మిక్సీలో వేసి మెత్తగా పేస్ట్ చేయాలి  
  
  పల్లీల పొడి వేసి మరోమారు మిక్సీపట్టాలి
  
  బాణలిలో నూనె వేసి, కాగాక ఆవాలు, జీలకర్ర వేసి వేయించి తయారుచేసి ఉంచుకున్న పచ్చడిలో కలపాలి.
  
  ట్రై కలర్ పెపర్ సలాడ్
  
  కావలసినవి
  నూనె - పావు కప్పు; రెడ్ క్యాప్సికమ్ - 2 (నిలువుగా సన్నగా కట్ చేయాలి); గ్రీన్ క్యాప్సికమ్ -  2 (నిలువుగా సన్నగా కట్ చేయాలి); ఎల్లో క్యాప్సికమ్ -  2 (నిలువుగా సన్నగా కట్ చేయాలి); ఉప్పు - తగినంత; జీడిపప్పు ముక్కలు - టేబుల్ స్పూను; వెల్లుల్లి రేకలు - 6; నిమ్మరసం - టీ స్పూను; ధనియాల పొడి - పావు టీ స్పూను; జీలకర్ర పొడి - పావు టీ స్పూను; మిరియాల పొడి - పావు టీ స్పూను; కొత్తిమీర తరుగు - రెండు టేబుల్ స్పూన్లు
  
  తయారి
   ఒక పాత్రలో కొద్దిగా నూనె వేసి కాగాక అందులో... తరిగి ఉంచుకున్న కూరముక్కల (రెడ్, గ్రీన్, ఎల్లో క్యాప్సికమ్)ను వేసి దోరగా వేయించాలి  
  
  ఉప్పు, జీడిపప్పు వేసి బాగా కలిపి ఐదు నిముషాలు ఉంచాలి  
  
  వెల్లుల్లి రేకలు జతచేసి బాగా కలిపాక, నిమ్మరసం వేయాలి
  
  దనియాలపొడి, జీలకర్రపొడి, మిరియాల పొడి చల్లి బాగా కలపాలి  
  
  రెండు నిముషాలు ఉంచి దించేసి, కొత్తిమీర తరుగుతో గార్నిష్ చేయాలి  
  
  ఇది సలాడ్‌లాగ తినచ్చు, లేదంటే చపాతీలోకి కూడా బాగుంటుంది.
  
  చికెన్ క్యాప్సికమ్
  
  కావలసినవి: 
 మారినేట్ చేయడానికి ... పెరుగు - టేబుల్ స్పూను; కారం - అర టీ స్పూను; మిరియాలపొడి - అర టీ స్పూను; ధనియాలపొడి - ఒకటిన్నర టీ స్పూన్లు; జీలకర్ర పొడి - అర టీ స్పూను; పసుపు - చిటికెడు; నిమ్మరసం - టీ స్పూను; సోయాసాస్ - టీ స్పూను; ఉప్పు - తగినంత; అల్లంవెల్లుల్లి పేస్ట్ - టీ స్పూను; చికెన్ - అర కేజీ (మీడియం సైజు ముక్కలుగా కట్ చేయాలి); నూనె - తగినంత; ఉల్లితరుగు - అర కప్పు; క్యాప్సికమ్ ముక్కలు - కప్పు; టొమాటో తరుగు - అర కప్పు; గరం మసాలా పొడి - (దాల్చినచెక్క, ఏలకులు, లవంగాల పొడి); టొమాటో సాస్ - ఒకటిన్నర టేబుల్ స్పూన్లు; కొత్తిమీర తరుగు - టీ స్పూను.
  
  తయారి:
  ఒక పాత్రలో పెరుగు, కారం, మిరియాలపొడి, ధనియాలపొడి, జీలకర్ర పొడి, పసుపు, నిమ్మరసం, సోయా సాస్, ఉప్పు, అల్లం వెల్లుల్లి పేస్ట్ వేసి బాగా కలిపి, ఈ మిశ్రమాన్ని చికెన్‌కి పట్టించి సుమారు రెండు గంటల సేపు మ్యారినేట్ చేయాలి  
  
  బాణలిలో సగం నూనె వేసి కాగాక, ఉల్లితరుగు వేసి వేయించాలి  
  
  క్యాప్సికమ్ తరుగు, టొమాటో తరుగు వేసి వేయించి పక్కన ఉంచాలి  
  
  అదే పాత్రలో మిగతా సగం నూనె వేసి, మ్యారినేట్ చేసిన చికెన్ వేసి సుమారు నాలుగైదు నిముషాలు ఉడికించి, పక్కన ఉంచిన కూరల మిశ్రమాన్ని జత చేయాలి   
  
  మంట తగ్గించి పది నిముషాలు ఉడకనివ్వాలి. మూత తీసి సుమారు పావు కప్పు నీరు పోసి, చికెన్ మెత్తబడేవరకు ఉడికించాలి  
  
  గరంమసాలా పొడి, టొమాటో సాస్ వేసి కలపాలి  
  
  వేయించి ఉంచుకున్న ఉల్లితరుగు, క్యాప్సికమ్, టొమాటోతరుగు వేసి కలిపి నిముషాలు ఉడికించాలి. (గ్రేవీ తక్కువగా ఉండేలా చూడాలి)
  
  సేకరణ:  డా.వైజయంతి