ఉసేన్ బోల్ట్ బీఫ్ తింటాడని, అందుకే అతడు రియో ఒలింపిక్స్‌లో పతకాలు మూటగట్టుకుని మరీ వెళ్లాడని బీజేపీ ఎంపీ ఉదిత్ రాజ్ ట్వీట్ చేయడంతో ఒక్కసారిగా దుమారం రేగింది. అసలు నిజంగా బోల్ట్ ఏం తింటాడని ఒక్కసారిగా అందరూ వెతకడం మొదలుపెట్టారు. దాంతో ఆసక్తికరమైన విషయాలు బయటపడ్డాయి. జమైకా లాంటి చిన్న దేశంలో, ఓ పేద కుటుంబంలో పుట్టిన బోల్ట్ చిన్నతనం నుంచి సన్నగానే ఉండేవాడు. 15 ఏళ్లకే ఆరు అడుగులకు పైగా పొడవు పెరిగిన బోల్ట్.. తొలుత ఆడింది క్రికెట్ అట!! ఆ తర్వాత ట్రాక్ అండ్ ఫీల్డ్ వైపు మారాడు.
 
 జమైకా నుంచి వచ్చిన అసఫా పావెల్, షెల్ ఆన్ ఫ్రేజర్, బోల్ట్.. ఈ ముగ్గురూ సాధారణ నేపథ్యం ఉన్నవాళ్లే తప్ప డబ్బున్న ఆసాములు కారు. దాంతో సర్వసాధారణంగా జమైకాలో దొరికే బియ్యం, చేపలు.. ఇవే వీరికి కూడా ఆహారం అయ్యాయి. బోల్ట్ కోచ్ కూడా ఎప్పుడూ అతడిని బీఫ్ తినమని చెప్పలేదు.
 
 
 ఇప్పుడంటే తాను ఎక్కడకు వెళ్లినా తనతో పాటు పర్సనల్ చెఫ్ ఉంటాడని బోల్ట్ చెప్పాడు. ఇప్పటికీ తన భోజనంలో మాత్రం చికెన్, కూరగాయలే ఎక్కువగా ఉంటాయన్నాడు. జమైకన్ ఆహారంలో ప్రధానంగా ఉండే బియ్యం, చికెన్, కూరగాయలే తనకు ఇప్పటికీ ఇష్టమని.. విదేశాలకు వెళ్లినప్పుడు సరైన ఆహారం దొరక్కపోతే ఏ బర్గర్ కింగ్‌కో, మెక్‌ డోనాల్డ్స్‌కో వెళ్లాల్సి ఉంటుందని అన్నాడు.  తన ఆహారంలో ప్రధానంగా చికెన్, పోర్క్, చేపలు, దుంపకూరలు ఉంటాయని తెలిపాడు. వీటివల్ల శరీరానికి కావల్సిన కార్బోహైడ్రేట్లు బాగా అందుతాయి. ఇప్పుడు కూడా అప్పుడప్పుడు మాత్రం ఫాస్ట్ ఫుడ్ తింటుంటానని, కానీ తన ఆహారంలో 90 శాతం మంచిదే ఉంటుందని వివరించాడు.
 
 ఇక ఇప్పటికి ఒలింపిక్స్‌లో 23 స్వర్ణపతకాలతో కలిపి మొత్తం 28 పతకాలు సాధించిన మైఖేల్ ఫెల్ప్ప్ కూడా బాగా ప్రోటీన్లు ఉండే ఆహారం తీసుకుంటాడు తప్ప బీఫ్ కాదు. అతడు తీసుకునే 12వేల కేలరీల ఆహారంలో చికెన్, పాస్తా, పిజ్జా, చేపలు ఉంటాయి. పీవీ సింధు లాంటి వాళ్లను ఒలింపిక్ విజేతలుగా తీర్చిదిద్దే కోచ్ పుల్లెల గోపీచంద్ కూడా తన శిష్యులను తగినంత సామర్థ్యం కోసం చికెన్ తినమని చెబుతారట.


 అతడు పరుగెడుతుంటే చిరుత కూడా ఒక్క నిమిషం అలా ఆగి చూస్తుంది. నాకన్నా ఇంతటి వేగం ఇతడికి ఎక్కడి నుంచి వచ్చిందా అని ఆశ్చర్యపోతుంది. అలాంటి నల్లచిరుత ఉసేన్ బోల్ట్.. ఇక పరుగులు ఆపేస్తున్నాడు. ఈ ఏడాది రియో డి జెనిరోలో జరగనున్న ఒలింపిక్స్‌ తర్వాత రిటైరవుతానని నిర్ధారించాడు. ఆరుసార్లు ఒలింపిక్స్‌లో స్వర్ణపతకాలు సాధించిన బోల్ట్ 2020 వరకు కూడా ఆడే అవకాశం ఉందని జనవరిలో చెప్పినా.. ఇప్పుడు మాత్రం ఇవే తన చిట్టచివరి ఒలింపిక్స్ అని స్పష్టం చేశాడు. మరో నాలుగేళ్లు ఇదే స్థాయిలో పరుగులు తీయడం చాలా కష్టమని, అందువల్ల రియోలో తాను అనుకున్నది సాధించి, ఆ తర్వాత ఇక రిటైర్ అవుతానని చెప్పాడు.
 
 లండన్‌లో 2012లో జరిగిన ఒలింపిక్స్‌లో 100 మీటర్లు, 200 మీటర్లు, 4x100 మీటర్ల రిలే రేసుల్లో బోల్ట్ స్వర్ణపతకాలు సాధించాడు. అంతకుముందు నాలుగేళ్ల క్రితం బీజింగ్‌లో జరిగిన క్రీడల్లోనూ ఈ విభాగాలన్నింటిలో అతడే విజేత. తుపాకి నుంచి బుల్లెట్ బయటకు రావడం అయినా ఆలస్యం అవుతుందేమో గానీ, ఉసేన్ బోల్ట్ ఇలా పరుగు ప్రారంభించడం, అలా గమ్యాన్ని చేరుకోవడం మాత్రం ఎట్టి పరిస్థితుల్లో ఆలస్యం కావని క్రీడా పండితులు చెబుతుంటారు.
 
 మరోసారి ఒలింపిక్స్‌లో మూడు బంగారు పతకాలు గెలవాలన్నది తన కల అని, దానిపైనే దృష్టిపెడుతున్నానని బోల్ట్ చెప్పాడు. 200 మీటర్ల పరుగులో 19.19 సెకన్లతో ప్రపంచ రికార్డు ఉసేన్ బోల్ట్ పేరుమీదే ఉన్నా.. అతడికి మాత్రం సంతృప్తి లేదు. కనీసం 19 సెకన్ల లోపు ఆ రేసు పూర్తి చేయాలని తాను కలగంటున్నట్లు తెలిపాడు. ఇలాంటి పరుగుల చిరుతను ఇక ట్రాక్ మీద చూడకపోవడం అంటే క్రీడాభిమానులకు నిరాశే.