అనంతపురం ఎడ్యుకేషన్‌: సమ్మెటివ్‌–1(సంగ్రహణాత్మక మదింపు) పరీక్షలు వాయిదా వేస్తూ పాఠశాల విద్య కమిషనర్‌ సంద్యారాణి గురువారం సాయంత్రం ఉత్తర్వులు జారీ చేశారు. రాష్ట్రంలోని వివిధ జిల్లాల్లో ప్రశ్నపత్రాలు లీకవడంతో ఈ నిర్ణయం తీసుకున్నారు. ఈ నెల 11 నుంచి పరీక్షలు ప్రారంభమయ్యాయి. 8–10 తరగతులకు 11 నుంచి గురువారం వరకు నిర్వహించిన పరీక్షలన్నీ రద్దు చేశారు. అలాగే శుక్రవారం నుంచి ఈ నెల 18 వరకు 6–10 తరగతులకు నిర్వహించే తక్కిన అన్ని పరీక్షలు వాయిదా వేశారు. తర్వాత ఎప్పుడు నిర్వహించేది షెడ్యూల్‌ ప్రకటిస్తామని కమిషనర్‌ ఉత్తర్వుల్లో పేర్కొన్నారు.
 
 ఇదిలా ఉండగా యూటూబ్‌ ద్వారా ప్రశ్నపత్రాలు లీకయ్యాయి. సోషియల్‌ పరీక్ష వరకు అన్ని ప్రశ్నపత్రాలు సోషియల్‌ మీడియాలో దర్శనమిస్తున్నాయి. తేరుకున్న విద్యాశాఖ అన్ని జిల్లాల్లోనూ తనిఖీలకు ఆదేశించింది. ఇందులో భాగంగా గురువారం ఉదయం జిల్లాలో విద్యాశాఖ అధికారి లక్ష్మీనారాయణ, సర్వశిక్ష అభియాన్‌ ప్రాజెక్ట్‌ అధికారి సుబ్రమణ్యం నేతృత్వంలో పలు బృందాలను నియమించి జిరాక్స్, బుక్‌స్టాళ్లలో తనిఖీలు చేపట్టారు. 


 అనంతపురం ఎడ్యుకేషన్‌: జిల్లాలోని అన్ని యాజమాన్యాల కింద పని చేస్తున్న ఉన్నత పాఠశాలల్లో 6–10వ తరగతి విద్యార్థులకు సమ్మేటివ్‌–1 (సంగ్రహణాత్మక  మదింపు) పరీక్షలు మంగళవారం  ప్రారంభమయ్యాయి. ఈ సంవత్సరం నిరంతర సమగ్ర మూల్యాంకనం (సీసీఏ) విధానం అమలు చేస్తుండడంతో రాష్ట్ర వ్యాప్తంగా ఒకే ప్రశ్నపత్రం ఉంటుంది. గతంలో జరిగిన సంఘటనల  నేపథ్యంలో ఈసారి విద్యాశాఖ కట్టుదిట్టమైన ఏర్పాట్లు చేసినట్లు చెబుతోంది. అన్ని మండలాల్లోనూ ఎమ్మార్సీ కేంద్రాల్లో ప్రశ్నపత్రాలు భద్రపరిచారు. పరీక్ష ప్రారంభానికి గంట ముందు అక్కడి నుంచి పాఠశాల కేంద్రాలకు తరలించేలా చర్యలు తీసుకుంటున్నారు. దూరప్రాంతాల్లో ఉన్న స్కూళ్లకు సీఆర్పీల ద్వారా పంపుతున్నారు.
 
 దీంతో కాస్త దూరంగా ఉన్న స్కూళ్లకైతే కేవలం 5 నిముషాల ముందు ప్రశ్నపత్రాలు చేరాయి. డీఈఓ లక్ష్మీనారాయణ మాట్లాడుతూ, పరీక్షల నిర్వహణలో ఎలాంటి లోటుపాట్లు లేకుండా చర్యలు తీసుకున్నామన్నారు. ముఖ్యంగా ప్రశ్నపత్రాలు తరలింపు విషయంలో చాలా జాగ్రత్తలు తీసుకున్నామన్నారు. కొన్ని స్కూళ్లకు ప్రశ్నపత్రాలు కొరత వచ్చిన సంగతి వాస్తవమేననీ, అయితే బఫర్‌ స్టాకు నుంచి సర్దామన్నారు. ఇక ఈనెల 18న పరీక్షలు ముగుస్తాయనీ, 19 నుంచి అక్టోబర్‌ 2 వరకు దసరా సెలవులు ఉంటాయని ఆయన వెల్లడించారు.