తదుపరి సూర్య చిత్రానికి సిద్ధం అవుతున్నట్లు దర్శకుడు రంజిత్ తెలిపారు. కబాలి చిత్రంతో పెద్ద దర్శకుల వరుసలో చేరిపోయిన దర్శకుడు రంజిత్. అట్టకత్తి అనే చిన్న చిత్రంతో పరిచయమై మంచి విజయాన్ని అందుకున్న ఈ యువ దర్శకడికి నటుడు కార్తీ మెడ్రాస్ చిత్రానికి దర్శకుడిగా అవకాశం ఇచ్చి ఆయన స్థాయిని మరింత పెంచారు. ఆ చిత్రం విజయంతో సూర్య రంజిత్‌కు మరో అవకాశం ఇవ్వడానికి ముందుకొచ్చారు. ఈ చిత్రాన్ని స్టూడియో గ్రీన్ సంస్థ నిర్మించడానికి రెడీ అయ్యింది.
 
 సరిగ్గా అలాంటి పరిస్థితిలో రంజిత్‌కు సూపర్‌స్టార్‌ను దర్శకత్వం వహించే బిగ్ అవకాశం వరించింది. దీంతో అందివచ్చిన అవకాశాన్ని గప్పున పుచ్చుకుని కబాలి చిత్రాన్ని తెరకెక్కించారు. ఈ చిత్రంపై అంచనాలు తారస్థాయికి చేరుకున్నాయి. రంజిత్‌ను ఉన్నత స్థాయిలో కూర్చోబెట్టాయి. కబాలి చిత్రం వచ్చే నెల 15న ప్రపంచ వ్యాప్తంగా భారీ ఎత్తున విడుదలకు సిద్ధం అవుతోంది. కాగా రంజిత్ తదుపరి చిత్రం ఏమిటన్న ప్రశ్నకు కబాలి తెలుగు వెర్షన్ ఆడియో ఆవిష్కరణ కార్యక్రమంలో ఆయన క్లారిఫై ఇచ్చారు.
 
 తదుపరి చిత్రాన్ని సూర్య హీరోగా రూపొందించనున్నట్లు రంజిత్ స్పష్టం చేశారు. 24 చిత్ర విజయాన్ని ఆస్వాదిస్తూ ఎస్-3 చిత్రాన్ని పూర్తి చేసే పనిలో ఉన్న సూర్య టాలీవుడ్ దర్శకుడు త్రివిక్రమ్ శ్రీనివాస్ దర్శకత్వంలో తమిళం, తెలుగు భాషలలో నిర్మించే చిత్రం గురించి చర్చలు జరుగుతున్న తరుణంలో రంజిత్ మాటలు ఆయన అభిమానుల్ని ఆనందంలో ముంచెత్తుతున్నాయి. రంజిత్ సూర్యతో చేసే చిత్రానికి కథను ఇంతకు ముందే రెడీ చేశారట.


 అంజాన్, మాస్ వంటి చిత్రాలతో కాస్త తడబడ్డ నటుడు సూర్య ఇటీవల విడుదలైన 24 చిత్రంతో అద్భుత విజయాన్ని సాధించి తన సత్తా చాటుకున్నారు. సూర్య, దర్శకుడు హరిల కలయికలో ఇంతకు ముందు రూపొందిన సింగం, దానికి సీక్వెల్ చిత్రాలు ఘన విజయాన్ని సాధించిన విషయం తెలిసిందే. తాజాగా వాటికి సీక్వెల్‌గా ఎస్-3 తెరకెక్కుతున్న విషయం విదితమే. స్టూడియోగ్రీన్ సంస్థ నిర్మిస్తున్న ఈ చిత్రంపై ఇప్పటికే భారీ అంచనాలు నెలకొన్నాయి. అధిక భాగం విదే శాల్లో చిత్రీకరణ జరుపుకుంటున్న ఎస్-3 చిత్రం షూటింగ్ చివరి దశకు చేరుకుంది.
 
 దీనికి హరీష్‌జయరాజ్ సంగీతాన్ని అందిస్తున్నారు. ప్రస్తుతం పాటలకు బాణీలు కడుతున్న ఆయన జులై తొలి వారానికి పాటల రికార్డింగ్‌ను పూర్తి చేసి అందిస్తాననడంతో జులై రెండో వారంలో చిత్ర ఆడియో ఆవిష్కరణ కార్యక్రమాన్ని నిర్వహించడానికి చిత్ర యూనిట్ సన్నాహాలు చేస్తున్నట్లు సమాచారం. ఎస్-3 చిత్రంలో సూర్యకు జంటగా అనుష్క, శ్రుతిహసన్ నటిస్తున్నారు. రాధారవి, వివేక్, నాజర్, రాధిక, సూరి ముఖ్య పాత్రలను పోషిస్తున్న ఎస్-3 చిత్ర విడుదలను ఆగస్ట్‌లో ఎదురు చూడవచ్చునన్నమాట.