గోరంట్ల: శ్రీసత్యసాయి జిల్లా వైఎస్సార్‌సీపీ అధ్యక్షుడు, పెనుకొండ ఎమ్మెల్యే మాలగుండ్ల శంకరనారాయణ వాహనంపై ఆదివారం ఓ వ్యక్తి ఎలక్ట్రికల్‌ డిటోనేటర్‌తో దాడిచేశాడు. అది పేలకపో­వడంతో పెనుప్రమాదం తప్పింది. పోలీసులు వెంటనే అతడిని అదుపులోకి తీసుకున్నారు. సీఐ సుబ్బ­రాయుడు తెలిపిన మేరకు.. ఎమ్మెల్యే శంకర­నారాయణ పెనుకొండ నియోజకవర్గంలోని గోరంట్ల మండలం గడ్డంతండా పంచాయతీ కల్లి­తండాలో గడపగడపకు మన ప్రభుత్వం కార్య­క్రమం చేప­ట్టారు. అదే సమయంలో సోమందేపల్లి మండలం గుడిపల్లికి చెందిన హరిజన గణేశ్‌ తన జేబులో ఉన్న ఎలక్ట్రికల్‌ డిటోనేటర్‌ తీసుకుని ఎమ్మెల్యే వాహనంపై విసిరాడు. అది పేలలేదు. గమనించిన సీఐ సుబ్బరాయుడు, పోలీసు సిబ్బంది వెంటనే గణేశ్‌ను అదుపులోకి తీసుకున్నారు. గోరంట్ల పోలీసు స్టేష­న్‌కు తరలించి విచారణ చేపట్టారు. నిందితుడు గోరంట్ల మండలం పాలసముద్రం సమీపంలోని నాసన్‌ కంపెనీలో డ్రైవర్‌ విధులతోపాటు డిటో­నేటర్లు పేల్చేపని చేసేవాడు. ఆదివారం అతిగా మద్యం తాగడంతో కాంట్రాక్టర్‌ పనుల్లో పెట్టుకో­కుండా వెళ్లిపొమ్మన్నాడు. దీంతో అతడు నేరుగా ఎమ్మెల్యే ఆధ్వ­ర్యంలో చేపట్టిన బైక్‌ ర్యాలీ, గడపగ­డపకు మన ప్రభుత్వం కార్యక్రమంలో పాల్గొ­న్నాడు. మద్యం మత్తులో ఎమ్మెల్యే వాహనంపైకి డిటోనేటర్‌ విసి­రాడు. విషయం తెలిసిన వెంటనే ఎస్పీ మాధ­వ­రెడ్డి, పెను­కొండ డీఎస్పీ ఉసేన్‌పీరా గోరంట్ల స్టేషన్‌కు చేరు­కుని ఘటనపై ఆరా తీశారు. మరింత లోతుగా విచారించి నిజానిజాలు నిగ్గుతేలుస్తామని ఎస్పీ తెలిపారు. ఘటన దురదృష్టకరం  నియోజకవర్గంలో ఎలాంటి ఫ్యాక్షన్‌ ప్రభావం లేకుండా ప్రజలకు సేవచేస్తున్నా. డిటోనేటర్‌ పేలకపోవడంతో ప్రమాదం తప్పింది. ఈ ఘటన దురదృష్టకరం. పోలీసులు సమగ్ర విచారణ జరిపి ఘటనకు బాధ్యులపై చర్యలు తీసుకోవాలి. – ఎమ్మెల్యే శంకరనారాయణ

సాక్షి, సోమందేపల్లి: సింగిల్‌గా ఎన్నికల్లో పోటీ చేసి గెలవలేని చంద్రబాబు... ప్యాకేజీ స్టార్‌ పవన్‌ కల్యాణ్‌ను పావుగా వాడుకుంటున్నారని వైఎస్సార్‌ సీపీ జిల్లా అధ్యక్షుడు మాలగుండ్ల శంకరనారాయణ అన్నారు. సోమవారం ఆయన సోమందేపల్లిలోని వైఎస్సార్‌ సర్కిల్‌ వద్ద ప్రజా సంకల్ప పాదయాత్ర నాలుగేళ్లు పూర్తయిన సందర్భంగా కేక్‌ కట్‌ చేశారు. అనంతరం విలేకరులతో మాట్లాడుతూ... రాష్ట్రంలో అభివృద్ధికి అడ్డుపడుతూ, శాంతిభద్రతల సమస్యలు సృష్టిస్తున్న చంద్రబాబు, పవన్‌ కల్యాణ్‌ను ప్రజలు నమ్మే స్థితిలో లేరన్నారు.  ప్రజల ప్రాణాలను కాపాడేందుకు ప్రభుత్వం తీసుకొచ్చిన జీఓ–1 పై ప్రతిపక్షాలు రాద్ధాంతం చేయడం తగదన్నారు. తమ ప్రచారం కోసం చంద్రబాబు కందుకూరులో 8 మంది, గుంటూరులో ముగ్గురి ప్రాణాలను బలిగొన్నారన్నారు. ప్రశ్నించేందుకు రాజకీయాల్లోకి వచ్చానని చెప్పుకునే పవన్‌కల్యాణ్‌... ఈ రెండు ఘటనల్లోని బాధిత కుటుంబాలను ఎందుకు పరామర్శించ లేదని ప్రశ్నించారు. పవన్‌కల్యాణ్‌ 2019లో ప్రభుత్వ వ్యతిరేక ఓటు చీల్చి చంద్రబాబుకు  ప్రయోజనం చేకూర్చారని, ఇప్పుడు మళ్లీ 2024 ఎన్నికల్లో బాబుకు లబ్ధి కల్పించడానికి తహతహ లాడుతున్నారన్నారు. కార్యక్రమంలో వైఎస్సార్‌ సీపీ మండల కన్వీనర్‌ నారాయణరెడ్డి, మాజీ కనీ్వనర్‌ వెంకటరత్నం, జెడ్పీటీసీ సభ్యుడు అశోక్, ఎస్సీ సెల్‌ రాష్ట్ర సంయుక్త కార్యదర్శి     గజేంద్ర, వైస్‌ ఎంపీపీ వెంకట నారాయణరెడ్డి, మైనార్టీ సెల్‌ కనీ్వనర్‌ ఇమాం వలీ, మండల ప్రచార కార్యదర్శి నరసింహ మూర్తి, కో ఆప్షన్‌ సభ్యుడు రఫీక్, సర్పంచ్‌ అంజి నాయక్, కేజీబీవీ పేరెంట్స్‌ కమిటీ చైర్మన్‌ రామాంజి, సీనియర్‌ నాయకులు ఎల్లారెడ్డి తదితరులు పాల్గొన్నారు.    (చదవండి: స్టేషన్‌కి చేరిన దున్నపోతు పంచాయితీ! మాదంటే..మాది అని గొడవ)

సాక్షి, న్యూఢిల్లీ: కేంద్ర మంత్రి నితిన్‌ గడ్కరీతో రాష్ట్ర రహదారులు, భవనాల శాఖ మంత్రి శంకరనారాయణ సమావేశమయ్యారు. ఢిల్లీలో గురువారం వైఎస్సార్‌ కాంగ్రెస్‌ పార్లమెంటరీ పార్టీ నేత విజయసాయిరెడ్డి, లోక్‌సభ పక్ష నేత మిథున్‌రెడ్డి, ఎంపీ మార్గాని భరత్‌తో కలిసి గడ్కరీని కలిశారు. అనంతరం మంత్రి శంకరనారాయణ మీడియాతో మాట్లాడుతూ విజయవాడ తూర్పు బైపాస్, విశాఖ–భోగాపురం ఎయిర్‌పోర్టుకు ఆరు లేన్ల రహదారి, కడప–రేణిగుంట రహదారి నిర్మాణాలకు అవసరమైన నిధుల గురించి గడ్కరీకి విజ్ఞప్తి చేశామని తెలిపారు. అనంతపురం, చిత్తూరుతోపాటు ఇతర జిల్లాల్లోని ముఖ్యమైన అంతర్రాష్ట్ర రహదారులను జాతీయ రహదారులుగా గుర్తించాలని కోరామన్నారు. తాము కోరిన అన్నింటికీ కేంద్ర మంత్రి సానుకూలంగా స్పందించారని చెప్పారు.    

సాక్షి, సోమందేపల్లి: రాష్ట్రంలో మహిళలపై దాడులు, లైంగిక వేధింపులకు పాల్పడటం టీడీపీ వర్గీయులకు మామూలేనని రాష్ట్ర రోడ్లు, భవనాల శాఖమంత్రి మాలగుండ్ల శంకర నారాయణ అన్నారు. సోమందేపల్లిలో టీడీపీ కార్యకర్త పద్మాచారి వేధింపులకు గురైన యువతి కుటుంబ సభ్యులను మంత్రి శంకరనారాయణ శుక్రవారం పరామర్శించారు. ఈ సందర్భంగా ఆయన బాధిత యువతికి ధైర్యం చెప్పారు. అనంతరం విలేకరులతో మాట్లాడుతూ 2015లో తహసీల్దార్‌ వనజాక్షిని టీడీపీ నేతలు ఇబ్బందులు పెట్టిన విషయం అందరికీ తెలుసన్నారు. ఆ పార్టీ నేతలు మహిళలపై దౌర్జన్యాలకు పాల్పడితే వాటిని కప్పి పుచ్చుకునేందుకు వైఎస్సార్‌సీపీ ప్రభుత్వంపై నిందలు వేయడం ఏంటని ప్రశ్నించారు. నారా లోకేష్‌ అవగాహనారాహిత్యంతో ట్వీట్‌లు, ఫేక్‌ వీడియోలు పెడుతున్నాడని.. ఓ యువతి పట్ల సానుభూతి చూపించాల్సింది పోయి ప్రేమోన్మాదులకు మద్దతు పలకడం ఆయనకే చెల్లిందని ఎద్దేవా చేశారు. 2018లోనే తాను లైంగిక వేధింపులకు గురవుతున్నానని బాధిత యువతి పోలీసులకు ఫిర్యాదు చేస్తే మాజీ ఎమ్మెల్యే బి.కె.పార్థసార«థి అండతో స్ధానిక టీడీపీ నాయకుల సహకారంతో పద్మాచారి ఒక్క రోజులోనే స్టేషన్‌ బెయిల్‌ తీసుకుని బయటకు వచ్చాడన్నారు. అప్పుడే కఠిన చర్యలు తీసుకొని ఉంటే మూడేళ్లుగా ఆ కుటుంబం మానసిక క్షోభకు గురయ్యేది కాదన్నారు. ప్రస్తుతం పోలీసులు యువతి కుటుంబానికి న్యాయం చేయాలని చూస్తుంటే మరో టీడీపీ కార్యకర్త కళాచారి బ్లాక్‌ మెయిల్‌ చేయడానికి ఆత్మహత్యాయత్నం డ్రామా చేస్తే బీకే పార్థసారథి అలాంటి వారిని పరామర్శించడం ఏమిటని నిలదీశారు. అదే ప్రాంతంలో ఉంటున్న యువతి కుటుంబానికి కనీస సానుభూతి తెలపకుండా వెళ్లడం సమంజసం కాదన్నారు. నిలదీసిన మహిళలపై టీడీపీ నాయకులు అసభ్యంగా ప్రవర్తించి దౌర్జన్యం చేయడం ఆ పార్టీ తీరుకు నిదర్శనమన్నారు. ఆ తర్వాత అక్కడే ఉన్న డీఎస్పీ మహబూబ్‌బాషా, సీఐ శ్రీహరితో మంత్రి మాట్లాడుతూ బాధిత కుటుంబానికి రక్షణ కల్పించి బాధ్యులపై కఠిన చర్యలు తీసుకోవాలని ఆదేశించారు. మంత్రి వెంట వైఎస్సార్‌సీపీ మండల కన్వీనర్‌ వెంకటరత్నం, మాజీ సర్పంచ్‌లు డి.సి.ఈశ్వరయ్య, సుధాకర్‌రెడ్డి, జెడ్పీటీసీ అభ్యర్థి అశోక్‌ తదితరులు పాల్గొన్నారు.   మూడేళ్లుగా నరకం చూస్తున్నా సార్‌!   మూడేళ్లుగా టీడీపీ కార్యకర్త పద్మాచారి వేధింపులతో నరకం అనుభవిస్తున్నా. గత టీడీపీ ప్రభుత్వ హయాంలో కేసు పెట్టినా పలుకుబడితో ఒక్కరోజులోనే బయటకు వచ్చి లైంగిక వేధింపులకు గురి చేశాడు. గతంలో ఇక్కడ పనిచేసిన ఇద్దరు కానిస్టేబుళ్లు కూడా అతనికి సహకరించడంతో నాకు అన్యాయం జరిగింది. అతని వేధింపులు భరించలేక ఎంబీఏ మధ్యలోనే ఆపేశాను. పెళ్లి చేసుకుని ఇక్కడి నుంచి వెళ్లిపోదామంటే సంబంధాలు చెడగొడుతున్నాడు. మా ఇంటి ఎదురుగా గాలి మిషన్‌ ఏర్పాటు చేసి నిత్యం మా కుటుంబ సభ్యులను ఈవ్‌టీజింగ్‌ చేస్తున్నాడు. వెంటనే ఆ గాలి మిషన్‌ తొలగించేలా చూడండి.   – మంత్రి శంకరనారాయణతో బాధిత యువతి ఆవేదన 

అనంతపురం: ఆంధ్రప్రదేశ్‌ అభివృద్ధికి ప్రతిపక్ష నేత చంద్రబాబు నాయుడే అడ్డుపడుతున్నారని మంత్రి శంకరనారాయణ విమర్శించారు. ఏపీ సీఎం వైఎస్‌ జగన్‌మోహన్‌ రెడ్డి అమలు చేస్తున్న సంక్షేమ పథకాలను చూసి చంద్రబాబు జీర్ణించుకోలేకపోతున్నారని, ఆ కారణంగా ప్రభుత్వంపై విమర్శలు చేస్తూ అభివృద్ధికి విఘాతం కల్గిస్తున్నారని మండిపడ్డారు. మంత్రి శంకరనారాయణ శుక్రవారం మాట్లాడుతూ.. ‘14 ఏళ్లు సీఎంగా చేసిన చంద్రబాబు ప్రజావ్యతిరేకత మూటుగట్టుకున్నారు. 14 నెలల పాలనలోనే సీఎం జగన్ తనేంటో నిరూపించుకున్నారు. ఏడాదిలోనే 90 శాతం హామీలు నెరవేర్చిన ఏకైక సీఎం వైఎస్ జగన్.చంద్రబాబు ఫోన్ ట్యాపింగ్ డ్రామాలు ఆపాలి. సాక్ష్యాలు చూపాలని డీజీపీ లేఖ రాస్తే చంద్రబాబు ఎందుకు స్పందించరు.పేదలకు ఇళ్ల పట్టాలు రాకుండా టీడీపీ అడ్డుకుంది’ అని విమర్శించారు.