parking spaces

రియల్‌ ఎస్టేట్‌లో పెట్టుబడులు మంచి రాబడులను ఇస్తాయని చాలా మందికి తెలుసు. పెట్టిన ప్రతి రూపాయికి ఎంతో కొంత లాభమైతే ఉంటుంది. అందుకే చాలా మంది ఇళ్లు, స్థలాలు కొనేస్తుంటారు. కానీ కాస్త భిన్నంగా ఆలోచించడం, భవిష్యత్తును అంచనా వేయడం తెలివైన సంపాదనకు మార్గం. ఇలా ఆలోచించే రియల్‌ ఎస్టేట్‌లో సంపాదించాలంటే భారీగా ఇళ్లు, స్థలాలపై మాత్రమే పెట్టుబడి పెట్టాల్సిన పని లేదని నిరూపించారు ఓ మహిళ.చైనాలో ఓ మహిళ రియల్‌ ఎస్టేట్‌ మార్కెట్‌పై తన అంచనాలతో ఏకంగా 196 పార్కింగ్‌ స్థలాలను కొనుగోలు చేశారు. అప్పట్లో కొనుగోలుదారుల నుంచి పెద్దగా స్పందన లేని ఈ స్థలాలపై రూ.14.48 కోట్లకు సమానమైన మొత్తాన్ని పెట్టుబడిగా పెట్టారు. కాలక్రమేణా ఆ ప్రాంతం అభివృద్ధి చెందడంతో పార్కింగ్‌కు డిమాండ్‌ పెరిగింది. దీంతో ఆమె అద్దెలను రెట్టింపు చేయడంతో స్థానిక నివాసితులతో వివాదం మొదలైంది. చివరకు ఈ వ్యవహారం కోర్టుకు చేరగా, ఆమె కొనుగోలు చట్టబద్ధమైనదేనని న్యాయస్థానం తీర్పునిచ్చింది.196 పార్కింగ్‌ స్థలాల కొనుగోలుచైనాలోని హునాన్‌ ప్రావిన్స్‌ రాజధాని చాంగ్షాలో వూ అనే ఇంటిపేరు కలిగిన మహిళ 2018లో ఓ నివాస సముదాయంలో 196 పార్కింగ్‌ స్థలాలను ఒకేసారి కొనుగోలు చేశారు. ఇందుకోసం 1.4 కోట్ల యువాన్లు వెచ్చించారు. అప్పటి సగటు మారకపు విలువ ప్రకారం ఇది సుమారు రూ.14.48 కోట్లు. ఆ ప్రాజెక్టులోని మొత్తం పార్కింగ్‌ స్థలాల్లో దాదాపు 40 శాతం ఆమె సొంతం చేసుకున్నారు.సౌకర్యాలు లేనిచోట పెట్టుబడి2018లో ఈ నివాస ప్రాజెక్టు అందుబాటులోకి వచ్చినప్పుడు అక్కడ దుకాణాలు, పాఠశాలలు, మెరుగైన ప్రజా రవాణా సదుపాయాలు అందుబాటులో లేవు. దీంతో ఇళ్లతో పాటు పార్కింగ్‌ స్థలాల కొనుగోలుపైనా ఎవరూ పెద్దగా ఆసక్తి చూపించలేదు.అయితే, భవిష్యత్తులో ఆ ప్రాంతం అభివృద్ధి చెందుతుందని వూ అంచనా వేశారు. అందుకు అనుగుణంగా పెట్టుబడి పెట్టారు. మరోవైపు, ఆర్థిక ఇబ్బందులు ఎదుర్కొంటున్న డెవలపర్‌కు ఒకేసారి పెద్ద సంఖ్యలో స్థలాలను కొనుగోలు చేసేందుకు వూ ముందుకు రావడం ఊరటనిచ్చింది. ఆమె అంచనాలకు తగ్గట్టుగానే కాలక్రమేణా పరిసర ప్రాంతం అభివృద్ధి చెందింది. నివాస సముదాయంలోకి ఎక్కువ మంది కుటుంబాలు రావడంతో పార్కింగ్‌ స్థలాలకు డిమాండ్‌ పెరిగింది.రెట్టింపు అద్దె..డిమాండ్‌ పెరగడంతో వూ తన పార్కింగ్‌ స్థలాల్లో కొన్నింటిని నెలకు 500 యువాన్ల చొప్పున అద్దెకు ఇవ్వడం ప్రారంభించారు. భారతీయ కరెన్సీలో ఇది సుమారు రూ.7,200. 2018లో డెవలపర్‌ నిర్ణయించిన అసలు నెలవారీ అద్దెతో పోలిస్తే ఇది దాదాపు రెట్టింపు.అద్దెను నెలకు 300 యువాన్లకు (సుమారు రూ.4,300) తగ్గించాలని కొందరు నివాసితులు కోరినా ఆమె అంగీకరించలేదు. అంతేకాదు, కొన్ని పార్కింగ్‌ స్థలాలను ఒక్కొక్కటి లక్ష యువాన్ల (సుమారు రూ.14.5 లక్షలు) ధరకు విక్రయించేందుకు సిద్ధమయ్యారు. కొన్ని స్థలాలకు వాటి అసలు విలువతో పోలిస్తే 80 శాతం వరకు అధిక ధరలు నిర్ణయించినట్లు నివేదికలు పేర్కొన్నాయి. ఇతరులు తన స్థలాలను అనధికారికంగా వినియోగించకుండా పార్కింగ్‌ లాక్‌లను కూడా ఏర్పాటు చేశారు.కోర్టులోనూ అనుకూల తీర్పు పార్కింగ్‌ స్థలాలు రోజువారీ అవసరాలకు కీలకమైనవని, ఒకే వ్యక్తి పెద్ద సంఖ్యలో వాటిని కొనుగోలు చేసి అధిక ధరలకు అద్దెకు ఇవ్వడం వల్ల మిగతా నివాసితులకు ఇబ్బందులు ఎదురవుతున్నాయని కొందరు అభ్యంతరం వ్యక్తం చేశారు. వూ, డెవలపర్‌ మధ్య కుదిరిన కొనుగోలు ఒప్పందాన్ని రద్దు చేయాలని కోరుతూ కోర్టును ఆశ్రయించారు. కానీ వూకు అనుకూలంగానే కోర్టు తీర్పు వచ్చింది.ఇదీ చదవండి: జీఎస్టీ కొత్త రూల్స్‌.. రియల్‌ ఎస్టేట్‌కు రిలీఫ్‌ ఇదే..


 విజయవాడ సెంట్రల్ :  ‘సందడి ఎక్కువ.. సంపాదన తక్కువ’ చందంగా ఎస్టేట్స్ విభాగం పనితీరు తయారైంది. కోట్లాది రూపాయల ఆదాయానికి అక్రమార్కులు వ్యూహాత్మకంగా గండికొడుతున్నారు. పూర్తిస్థాయి అధికారి లేకపోవడంతో కింది సిబ్బంది ఇష్టారాజ్యంగా వ్యవహరిస్తున్నారనే ఆరోపణలు వెల్లువెత్తుతున్నాయి. కోర్టు కేసులు ఏళ్ల తరబడి కొనసాగుతున్నాయి. షాపింగ్ కాంప్లెక్స్‌ల్లోని షాపులు, కూరగాయల మార్కెట్, కమ్యూనిటీ హాళ్లు, పార్కింగ్ ప్రదేశాలకు టెండర్లు పిలిచేందుకు  కమిషనర్ జి.వీరపాండియన్ కసరత్తు చేస్తున్నారు. ఈ మేరకు అధికారులు ఫైల్‌ను సిద్ధం చేశారు. ఎప్పటివలే ఈసారీ టెండర్లు ఓ ఫార్సుగా మిగులుతాయా.. ఆశించిన స్థాయిలో ఆదాయాన్ని తెచ్చిపెడతాయా అనే చర్చ నడుస్తోంది.  
 
 నీరసంగా వసూళ్లు..
 మూడు సర్కిళ్ల పరిధిలో డిమాండ్ రూ.15,53,90,305 కాగా  కలెక్షన్ రూ. 3,10,48,513. రావాల్సిన బకాయిలు రూ.12,43,41,792.26 కేసులకు సంబంధించి 593 షాపులు కోర్టులో పెండింగ్‌లో ఉన్నాయి. వస్త్రలతకు సంబంధించిన కేసులే అధికంగా ఉన్నాయి.నగరంలోని వివిధ కాంప్లెక్స్‌ల్లో 183 షాపులు ఖాళీగా ఉన్నట్లు సమాచారం.
  
 తెగని వివాదం
 వస్త్రలత కాంప్లెక్స్ నుంచి రూ.11 కోట్లు బకాయిలు రావాల్సి ఉంది. అసోసియేషన్ ప్రతినిధులతో ఎంపీ కేశినేని నాని, మేయర్ కోనేరు శ్రీధర్ రెండు విడతలుగా చర్చలు సాగించారు. రూ.4 కోట్లకు మించి ఒక్క రూపాయి కూడా కట్టలేమని అసోసియేషన్ ప్రతినిధులు స్పష్టం చేశారు. ఈ ప్రతిపాదనను కమిషనర్ తిరస్కరించారు. 90 శాతం బకాయిలు చెల్లిస్తే 10 శాతం రాయితీ ఇస్తామని చెప్పారు. అయినా బకాయిల బండ ముందుకు కదలడం లేదు.
 
 దిక్కులేని దివాణం
  అధికారులు విజిటింగ్ ప్రొఫెసర్లలా ఎస్టేట్స్‌కు వచ్చిపోతున్నారు.  పూర్తిస్థాయి అధికారి లేకపోవడంతో ఈ విభాగం దిక్కులేని దివాణంలా మారింది. గతంలో నగరపాలక సంస్థ ప్రధాన కార్యాలయంలో ఉండే ఎస్టేట్స్ సెక్షన్‌ను గదుల కొరత కారణంగా సర్కిల్-2 కార్యాలయానికి తరలించారు. కమిషనర్, మేయర్ల పర్యవేక్షణ కొరవడింది. ఎస్టేట్స్ అధికారి విక్టర్‌బాబు నాలుగు నెలలుగా సెలవులో ఉన్నారు. అసలు వస్తారో రారో కూడా తెలియని పరిస్థితి. డిప్యూటీ కమిషనర్ (రెవెన్యూ) డి.వెంకటలక్ష్మి కొన్ని నెలలు ఇన్‌చార్జిగా వ్యవహరించారు. మొక్కుబడిగానే ఆమె ఎస్టేట్స్ ఫైళ్లు చూసేవారని సమాచారం. కేజీ మార్కెట్ సెల్లార్ విషయంలో అక్రమాలకు పాల్పడడంతో సూపరింటెండెంట్, ఆర్‌ఐలను కమిషనర్ సస్పెండ్ చేశారు. ఆ తర్వాత డీసీఆర్‌ను ఇన్‌చార్జి బాధ్యతల నుంచి తప్పించారు. రీజినల్ ఫైర్ ఆఫీసర్ చౌదరికి ప్రస్తుతం ఇన్‌చార్జి బాధ్యతలు అప్పగించారు. ఎస్టేట్స్ పద్మవ్యూహాన్ని ఛేదించడం ఆషామాషీ వ్యవహారం కాదు. గాడిలో పెట్టేందుకు విక్టర్‌బాబు తనవంతు కృషి చేశారు. షాపుల ఖాళీలు, కోర్టు కేసులపై దృష్టిసారించారు. శృతిమించి రాజకీయ ఒత్తిళ్లు రావడంతో  దీర్ఘకాలిక సెలవుపై వెళ్లిపోయారని తెలుస్తోంది.  పూర్తిస్థాయి అవగాహన ఉంటే కానీ కింది ఉద్యోగులతో పనిచేయించలేని పరిస్థితి. ఎస్టేట్స్ రాజకీయాల్లో చౌదరి ఎంతవరకు నెగ్గుకొస్తారో వేచిచూడాలి.
  
  


 సాక్షి,సిటీబ్యూరో: ప్రస్తుతం నిర్మాణంలో ఉన్న మెట్రో స్టేషన్లలో సీసీటీవీల ఏర్పాటుతో పాటు బెంగళూరు, ఢిల్లీ నగరాలకు దీటుగా  కట్టుదిట్టమైన భద్రతా ఏర్పాట్లు చేయనున్నట్టు హెచ్‌ఎంఆర్ ఎండీ ఎన్వీఎస్.రెడ్డి తెలిపారు. బుధవారం నగర పోలీసు కమిషనర్ కార్యాలయంలో మెట్రో స్టేషన్లలో భద్రత పరంగా తీసుకోవాల్సిన చర్యలపై పోలీసు ఉన్నతాధికారులు, ఎల్‌అండ్‌టీ అధికారులతో సమీక్షా సమావేశం నిర్వహించారు.
 
 మెట్రో స్టేషన్లు, ట్రాక్, ఫ్లాట్‌ఫారాలు, టిక్కెట్ కేంద్రాలు, పార్కింగ్ స్థలాలు, స్కైవాక్‌లు, వయాడక్ట్ సెగ్మెంట్లు, మెట్రో ట్రాక్ పరిసరాలు, ఆపరేషన్ కంట్రోల్ సెంటర్ విభాగాల వద్ద సీసీటీవీల నిఘాతోపాటు, భద్రతా బలగాలతో నిరంతర పహారా ఏర్పాటు చేస్తామన్నారు. పహారా లేని ప్రాంతాల్లో సెన్సార్లు, బ్యాగేజీ తనిఖీ యంత్రాలు, మెటల్ డిటెక్టర్లు, సెక్యూరిటీ అలారాల ఏర్పాటు చేయనున్నట్టు వెల్లడించారు. రైలు బోగీల్లోనూ వీడియో రికార్డు ఉంటుందన్నారు.
 
 నగరంపై ఉగ్రవాద పడగనీడ ఉన్న నేపథ్యంలో ఎక్కడా అవాంఛనీయ ఘటనలు జరగకుండా ముందస్తు చర్యలు తీసుకోనున్నట్టు చెప్పారు. ఈ సమావేశంలో నగర పోలీసు కమిషనర్ మహేందర్‌రెడ్డి, కౌంటర్ టైజం నిపుణుడు కె.సి.రెడ్డి, అడిషనల్ కమిషనర్ అంజనీకుమార్, జితేందర్, సందీప్ శాండిల్య, మహేశ్ భగవత్, ఎల్‌అండ్‌టీ ప్రాజెక్టు డెరైక్టర్ ఎం.పి.నాయుడు తదితరులు పాల్గొన్నారు.