25 పరుగులు చేసిన మెకల్లమ్
 రెండో ఇన్నింగ్స్‌లో కివీస్ 121/4
 ఆసీస్‌తో రెండో టెస్టు
   
 క్రైస్ట్‌చర్చ్: న్యూజిలాండ్ డాషింగ్ బ్యాట్స్‌మన్ బ్రెండన్ మెకల్లమ్ కెరీర్‌లో ఆఖరి అంతర్జాతీయ ఇన్నింగ్స్ ఆడేశాడు. తొలి ఇన్నింగ్స్ స్థాయిలో కాకపోయినా రెండో ఇన్నింగ్స్‌లో ఓ మోస్తరు ప్రదర్శనతో ఆకట్టుకున్నాడు. ఆస్ట్రేలియాతో జరుగుతున్న రెండో టెస్టులో.... సోమవారం మూడో రోజు బ్యాటింగ్‌కు వచ్చిన మెకల్లమ్  (27 బంతుల్లో 25; 3 ఫోర్లు, 1 సిక్స్) మరోసారి జోరును చూపెట్టే ప్రయత్నం చేశాడు. హాజెల్‌వుడ్ బౌలింగ్‌లో భారీ సిక్సర్‌ను బాదిన బ్రెండన్ తర్వాతి బంతిని కూడా అదే స్థాయిలో గాల్లోకి లేపాడు. అయితే వార్నర్ చక్కని క్యాచ్ అందుకోవడంతో మెకల్లమ్ ఆఖరి అంతర్జాతీయ ఇన్నింగ్స్‌కు తెరపడింది. టాప్ ఆర్డర్ వైఫల్యంతో న్యూజిలాండ్ రెండో ఇన్నింగ్స్‌లో 44 ఓవర్లలో 4 వికెట్లకు 121 పరుగులు చేసింది. ఆట ముగిసే సమయానికి విలియమ్సన్ (45 బ్యాటింగ్), అండర్సన్ (9 బ్యాటింగ్) క్రీజులో ఉన్నారు. లాథమ్ (39) ఫర్వాలేదనిపించాడు.
 
 ప్రస్తుతం కివీస్ ఇంకా 14 పరుగులు వెనుకబడి ఉంది. ప్యాటిన్సన్ 3 వికెట్లు తీశాడు. అంతకుముందు 363/4 ఓవర్‌నైట్ స్కోరుతో మూడో రోజు ఆట కొనసాగించిన ఆస్ట్రేలియా తొలి ఇన్నింగ్స్‌లో 153.1 ఓవర్లలో 505 పరుగులకు ఆలౌటైంది. దీంతో ఆసీస్‌కు 135 పరుగుల తొలి ఇన్నింగ్స్ ఆధిక్యం లభించింది. ఓవర్‌నైట్ బ్యాట్స్‌మన్ వోజెస్ (60), లయోన్ (33) నిలకడగా ఆడారు. మిచెల్ మార్ష్ (18), నీవెల్ (13), హాజెల్‌వుడ్ (13) వరుస విరామాల్లో అవుటయ్యారు. వాగ్నేర్ 6, బౌల్ట్ 2 వికెట్లు పడగొట్టారు.


 తొలి ఇన్నింగ్స్‌లో 183 ఆలౌట్  మెకల్లమ్ డకౌట్
  తొలి ఇన్నింగ్స్‌లో ఆసీస్ 147/3
 
  కుప్పకూలిన కివీస్
 వెల్లింగ్టన్: న్యూజిలాండ్ తో జరుగుతున్న తొలి టెస్టులో బౌలర్లు చెలరేగడంతో ఆస్ట్రేలియా మొదటి రోజే పూర్తి ఆధిక్యం ప్రదర్శించింది. పేసర్లు హాజెల్‌వుడ్ (4/42), సిడిల్ (3/37)తో పాటు స్పిన్నర్ లియోన్ (3/32) కలిసి కివీస్ వెన్ను విరిచారు. దీంతో శుక్రవారం ప్రారంభమైన తొలి టెస్టులో న్యూజిలాండ్ 48 ఓవర్లలో 183 పరుగులకు ఆలౌట్ అయ్యింది. కెరీర్‌లో వందో టెస్టు ఆడుతున్న బ్రెండన్ మెకల్లమ్ పరుగులేమీ చేయకుండానే నిష్ర్కమించాడు. కోరె అండర్సన్ (87 బంతుల్లో 38; 6 ఫోర్లు), మార్క్ క్రెయిగ్ (57 బంతుల్లో 41 నాటౌట్; 5 ఫోర్లు), బౌల్ట్ (22 బంతుల్లో 24; 3 సిక్సర్లు) రాణించారు. ఓవరాల్‌గా 97 పరుగులకే జట్టు ఏడు వికెట్లు కోల్పోగా చివరి మూడు వికెట్లకు 86 పరుగులు రావడం విశేషం.
 
 అనంతరం తమ తొలి ఇన్నింగ్స్‌లో బరిలోకి దిగిన ఆసీస్... రోజు ముగిసే సమయానికి 40 ఓవర్లలో మూడు వికెట్లకు 147 పరుగులు చేసింది. ఐదు పరుగులకే రెండు వికెట్లు కోల్పోయినా కెప్టెన్ స్టీవెన్ స్మిత్ (112 బంతుల్లో 71; 10 ఫోర్లు; 1 సిక్స్), ఉస్మాన్ ఖవాజా (96 బంతుల్లో 57 బ్యాటింగ్; 11 ఫోర్లు) జోడి ఆదుకుంది. వీరిద్దరి మధ్య మూడో వికెట్‌కు 126 పరుగులు వచ్చాయి. క్రీజులో ఖవాజాతో పాటు వోజెస్ (7 బ్యాటింగ్) ఉన్నాడు.