కూరగల్లు: పెట్టుబడిదారులకు ఇచ్చే ప్రాధాన్యత భూములిచ్చిన తమకు ఇవ్వడం లేదని రైతులు ఆవేదన వ్యక్తం చేస్తున్నారు. తమకు ఇచ్చిన ప్లాట్లు అభివృద్ది చేయకుండానే ఇచ్చారని, లోన్‌ కోసం బ్యాంకులకు వెళ్తే అవి ఎందుకు పనికిరావని వారు తిరస్కరిస్తున్నారని రైతులు ఆందోళన వ్యక్తం చేశారు. ఈ మేరకు శుక్రవారం(మే 22వ తేదీ) గుంటూరు జిల్లా మంగళగిరి మండలం కూరగల్లులో సీఆర్‌డీఏ గ్రామసభ నిర్వహించారు. ఈ గ్రామ సభకు హాజరైన రైతులు.. సీఆర్‌డీఏ అడిషనల్‌ కమిషనర్‌ భార్గవ్‌ను నిలదీశారు. మాకే ఎందుకిలా చేస్తున్నారంటూ ఆగ్రహం వ్యక్తం చేశారు. పెట్టుబడిదారులకు ఇచ్చే ప్రాధాన్యత తమకు ఇవ్వడం లేదన్నారు. తమకు డెవలప్‌ చేయని ప్లాట్లు ఇస్తున్నారని, అభివృద్ధి చేసిన ప్లాట్లు ఎందుకు ఇవ్వడం లేదని రైతులు నిలదీశారు. లోన్‌ కోసం బ్యాంకులకు వెళ్తే అవి పనికిరావని చెబుతున్నారని, తమకు అభివృద్ధి చేసిన ప్లాట్లు ఇవ్వాలంటూ డిమాండ్‌ చేశారు.


 మాకు గ్రామాన్ని రాజధాని భూసమీకరణ నుంచి మినహాయించండి
 సీఆర్‌డీఏ అసిస్టెంట్ కమిషనర్‌ను పురుగుమందు డబ్బాలతో చుట్టుముట్టిన కురగల్లువాసులు
 
 మంగళగిరి: గుంటూరు జిల్లా మంగళగిరి మండలం కురగల్లు గ్రామంలో భూసమీకరణను పరిశీలించేందుకు వచ్చిన సీఆర్‌డీఏ అసిస్టెంట్ కమిషనర్ గంధం చంద్రుడుకు గ్రామస్తులు బుధవారం రాత్రి చుక్కలు చూపించారు. ఇప్పటి వరకు భూములు మాత్రమే రాజధానికి తీసుకుంటామని చెబుతున్న అధికారులు ఇళ్లు సైతం తీసుకుంటారనే ప్రచారం జరుగుతున్న నేపథ్యంలో ఉన్నతాధికారి వచ్చిన విషయం తెలిసిన గ్రామస్తులు, రైతులు, మహిళలు, పిల్లలతో సహా పంచాయతీ కార్యాలయానికి పురుగుమందు డబ్బాలతో చేరుకుని ఒక్కసారిగా అధికారులపై విరుచుకుపడ్డారు.
 
 ‘మాకు రాజధాని వద్దు.. మా గ్రామాన్ని రాజధాని నిర్మాణంలో తొలగించాలి..’ అని డిమాండ్ చేశారు. లేకపోతే పురుగుమందు తాగి ఆత్మహత్య చేసుకుంటామని హెచ్చరించారు. వారికి ఎలాగో నచ్చచెప్పిన ఆయన కారులో వెళ్లేందుకు ప్రయత్నించారు. దీంతో మహిళలు తమను చంపి రాజధాని నిర్మించుకోండంటూ కారును చుట్టుముట్టి రెండుగంటలు ఆయన్ని ఘెరావ్ చేశారు.
 
 భూసమీకరణ డిప్యూటీకలెక్టర్ వరభూషణరావు, తహశీల్దార్ చంద్రశేఖర్ నచ్చచెప్పినా గ్రామస్తులు వినకపోవడంతో కారుదిగిన చంద్రుడు గ్రామస్తులు, రైతుల సమస్యలను ప్రభుత్వం దృష్టికి తీసుకెళ్తానని చెప్పారు. ఒకదశలో రైతులు మహిళలు బాబుపై తీవ్రస్థాయిలో మండిపడ్డారు. చివరకు అధికారులు వారికి ఎలాగోలా నచ్చజెప్పి అక్కడినుంచి బయటపడ్డారు.