‘హృదయం ఎక్కడున్నది’ చిత్రం ద్వారా తెలుగు తెరకు పరిచయమవుతున్న మరో కొత్త హీరో కృష్ణ మాధవ్. తను మహేష్‌బాబుకి దగ్గర బంధువు. ఎ.ఆర్. మురుగదాస్ శిష్యుడు వి.ఐ. ఆనంద్ దర్శకత్వంలో పవన్, సంజయ్ నిర్మించిన ఈ చిత్రం ఈ నెల 15న విడుదల కానుంది. ఈ సందర్భంగా కృష్ణమాధవ్ మాట్లాడుతూ -‘‘త్రివిక్రమ్, శ్రీను వైట్ల దర్శకత్వంలో మహేష్‌బాబు నటించిన సినిమాలకు దర్శకత్వ శాఖలో పని చేశాను. ఆ సమయంలోనే నటనలో కొన్ని మెళకువలు నేర్చుకున్నా. అలాగే, సూర్య, విక్రమ్‌వంటి ఆర్టిస్టులకు శిక్షణ ఇచ్చిన గురువు దగ్గర చెన్నయ్‌లో నేనూ శిక్షణ తీసుకున్నా.
  
   చిన్నప్పట్నుంచీ హీరో అవ్వాలనే నా కల ఈ చిత్రంతో నెరవేరుతోంది. నటుడవ్వాలనే నా కోరికను ఓసారి మహేష్‌బాబుకి చెబితే, ‘సవాల్‌గా తీసుకుని, గట్స్‌తో నటిస్తే రాణించగలుగుతావ్’ అన్నారు. ఆ సలహాని పాటిస్తున్నా. అలాగే సెట్స్‌లో మహేష్‌బాబు నటనను దగ్గరగా చూడటం ఉపయోగపడింది. ఓ నటుడికి ఎలాంటి లక్షణాలుండాలో ఆయన్ను చూసి తెలుసుకున్నా’’ అని చెప్పారు. ‘హృదయం ఎక్కడున్నది’లో చేసిన పాత్ర గురించి చెబుతూ -‘‘ఒక అమ్మాయికి మనసిచ్చి వేరే అమ్మాయిపట్ల ఆకర్షితుణ్ణయ్యే కుర్రాడి పాత్రను ఇందులో చేశా. ప్రతి గల్లీల్లోనూ ఇలాంటి కుర్రాడు ఉంటాడు. ప్రేమలో స్ధిరత్వం ఉండాలని అంతర్లీనంగా సందేశం ఇచ్చే సినిమా ఇది’’ అన్నారు కృష్ణమాధవ్.
  


 రాష్ర్ట మంత్రి గల్లా అరుణకుమారి మేనల్లుడు కృష్ణమాధవ్ హీరోగా సంస్కృతి షినయ్, అనూష హీరోయిన్లుగా పవన్ మంత్రి ప్రగడ, సంజయ్ ముప్పనేని నిర్మించిన చిత్రం ‘హృదయం ఎక్కడున్నది’. వి.ఐ.ఆనంద్ దర్శకత్వం వహించిన ఈ చిత్రానికి విశాల్ చంద్రశేఖర్ స్వరాలందించారు. ఈ ఆడియో సీడీని మహేష్‌బాబు ఆవిష్కరించి గల్లా అరుణకుమారికి ఇచ్చారు. మాధవ్ సినిమాల్లోకి వెళ్తానంటే వద్దన్నానని, కానీ తన తపన చూసి చివరకు అంగీకరించానని అరుణకుమారి చెప్పారు.