Issued a notification

వాషింగ్టన్‌: మానవాళికి ముప్పు కాగలదన్న ఆందోళనలు వ్యక్తమవుతున్న ప్రస్తుత తరుణంలో కృత్రిమ మేధ ఓ గొప్ప సాయమే చేసింది. ప్రపంచవ్యాప్తంగా సుమారు 70 శాతం వెబ్‌సైట్లను నడిపించే కీలక ప్రోగ్రామింగ్‌ భాష పీహెచ్‌పీలోని భద్రతలోపాలను గుర్తించింది. దీంతో అటు ప్రభుత్వాలు, ఇటు ఐటీ కంపెనీలు ఈ లోపాలను సరిదిద్దే సాఫ్ట్‌వేర్‌ (ప్యాచ్‌) తయారీకి పరుగులు పెడుతున్నాయి. చాలావరకూ ప్రభుత్వ వెబ్‌సైట్లు గురువారం మామూలుగానే పనిచేశాయి కానీ.. ప్యాచ్‌ను అభివృద్ధి చేస్తున్న నేపథ్యంలో కొన్ని రకాల నెట్‌ సేవలకు అంతరాయం కలిగినట్లు సమాచారం. పీహెచ్‌పీ ప్రోగ్రామింగ్‌ లాంగ్వేజ్‌లోని భద్రతా లోపాలపై అమెరికా సంస్థ ఎఫ్‌బీఐ మొట్టమొదట బుధవారం హెచ్చరికలు జారీ చేసింది. ఈ లోపాల సాయంతో హ్యాకర్లు పీహెచ్‌పీ ఆధారంగా పనిచేసే సిస్టమ్స్‌లోకి దూరం నుంచే కోడ్‌ను ప్రవేశపెట్టి రన్‌ చేయగలరని తెలిసింది. దీనివల్ల సున్నితమైన డేటాతోపాటు నెట్‌వర్క్‌ వ్యవస్థలు సైతం ముప్పును ఎదుర్కొవాల్సి రావచ్చు. లోపాలను సరిదిద్దే ప్యాచ్‌ను వెంటనే సిద్ధం చేయడం వీలు కాని నేపథ్యంలో వెబ్‌సైట్లను తాత్కాలికంగా ఆఫ్‌లైన్‌ మోడ్‌లో ఉంచాలని ఎఫ్‌బీఐ సూచించింది. ఇదిలా ఉంటే పీహెచ్‌పీ భద్రత లోపాలకు సంబంధించి ప్యాచ్‌ను అభివృద్ధి చేస్తున్నందున బ్రిటన్‌లో కొన్ని ప్రభుత్వ సేవలు తాత్కాలికంగా నిలిపేయవచ్చునని ఆ దేశ ప్రధానమంత్రి కార్యాలయం తెలిపింది. ఓపెన్‌ ఏఐ వంటి సంస్థలతో కలిసి పరిష్కార మార్గాలను అభివృద్ధి చేస్తున్నట్లు తెలిపింది. ఫిన్లాండ్, జపాన్‌లు ఇప్పటికే ప్యాచ్‌ను విడుదల చేసి అందరూ ఇన్‌స్టాల్‌ చేసుకోవాలని ప్రకటించాయి. ఒకవేళ ప్యాచ్‌ను ఇన్‌స్టాల్‌ చేయడం కష్టమైతే వెబ్‌సైట్లను తాత్కాలికంగా నిలిపివేసే అంశాన్ని ఆయా దేశాలు పరిశీలిస్తున్నాయి. మరోవైపు క్లౌడ్‌ఫ్లేర్‌ సీఈవో మాథ్యూ ప్రిన్స్‌ సోషల్‌ మీడియాలో ఒక పోస్టు చేస్తూ పీహెచ్‌పీలోని లోపాల గురించి తెలిసిన వెంటనే దాన్ని దురి్వనియోగం చేసేందుకు లక్షల ప్రయత్నాలు జరిగాయని తెలిపారు. పీహెచ్‌పీ ఫౌండేషన్‌ కూడా భద్రత లోపాలను సరిదిద్దే ప్యాచ్‌ను బుధవారం రాత్రే విడుదల చేయడంతోపాటు, అప్‌డేషన్‌కు సంబంధించిన మార్గదర్శకాలను కూడా జారీ చేసింది. కృత్రిమ మేధ పాత్ర... పీహెచ్‌పీలోని భద్రత లోపాలను గుర్తించడంలో కృత్రిమ మేధస్సు ఏజెంట్లు కీలక పాత్ర పోషించాయి. రెండు నెలలుగా తమ ఏఐ ఏజెంట్లు ఈ లోపాలను గుర్తించేందుకు, పరిష్కార మార్గాలను సిద్ధం చేసేందుకు పనిచేశాయని ఓపెన్‌ఏఐ తన బ్లాగ్‌లో వివరించింది. ఈ పనిలో ఐటీ నిపుణులతోపాటు భద్రతా సంస్థలు ఇతర భాగస్వాములు కూడా పాలుపంచుకున్నట్లు తెలిపింది. మరోవైపు యూరోపియన్‌ యూనియన్‌ సైబర్‌ భద్రత సంస్థ ఎనిసా కూడా కంపెనీలు ఈ లోపాల పరిష్కారానికి తక్షణం చర్యలు తీసుకోవాలని సూచించింది.

న్యూఢిల్లీ: ఇకపై ప్రతిఏటా ఆగస్టు 14వ తేదీని విభజన గాయాల సంస్మరణ దినంగా పాటించనున్నట్లు ప్రధాని∙మోదీ శనివారం ప్రకటించారు. దేశ విభజన గాయాన్ని ఎప్పటికీ మర్చిపోలేమని అన్నారు. ఆ సమయంలో ప్రజలు ఎన్నో కష్టనష్టాలు అనుభవించారని, ఎన్నెన్నో త్యాగాలు చేశారని, వాటిని గుర్తు చేసుకుంటూ ప్రతి సంవత్సరం ఆగస్టు 14ను విభజన గాయాల సంస్మరణ దినం జరుపుకుందామని పిలుపునిచ్చారు. దేశ విభజన సృష్టించిన మతిలేని ద్వేషం, హింస కారణంగా లక్షలాది మంది నిరాశ్రయులయ్యారని, ఎంతోమంది ప్రాణాలు కోల్పోయారని మోదీ ఆవేదన వ్యక్తం చేశారు. సామాజిక విభజనలు తొలగిపోవాలని, సామరస్యం పెంపొందాలని, ఏకత్వం అనే స్ఫూర్తి బలోపేతం కావాలని, మానవ సాధికారత పరిఢవిల్లాలని ఆకాంక్షించారు. ఈ ఆశయాలను విభజన అకృత్యాల సంస్మరణ దినం మనకు గుర్తు చేస్తూనే ఉంటుందని పేర్కొన్నారు. కేంద్ర హోంశాఖ నోటిఫికేషన్‌ నుంచి ప్రకటన వెలువడిన కొన్ని గంటల్లోనే ఆగస్టు 14ను విభజన గాయాల సంస్మరణ దినంగా గుర్తిస్తూ కేంద్ర హోంశాఖ నోటిఫికేషన్‌ జారీ చేసింది. ప్రధానమంత్రి నిర్ణయాన్ని హోంమంత్రి అమిత్‌ షా స్వాగతించారు. దేశ విభజన గాయాన్ని, సన్నిహితులను కోల్పోయామని వారి ఆవేదనను మాటల్లో వర్ణించలేమని అన్నారు. దేశ విభజన సమయంలో ఎందరో భరతమాత బిడ్డలు తమ జీవితాలను త్యాగం చేశారని కేంద్ర హోంశాఖ శ్లాఘించింది. బ్రిటీష్‌ వలస పాలకుల దుర్నీతి కారణంగా 1947లో భారతదేశం రెండుగా విడిపోయిన సంగతి తెలిసిందే. భారత్‌ రెండు ముక్కలై పాకిస్తాన్‌ అనే కొత్త దేశం ఏర్పడింది. ఆగస్టు 14న పాకిస్తాన్‌కు స్వాతంత్య్రం రాగా, భారత్‌ ఆగస్టు 15న వలస పాలకుల చెర నుంచి విముక్తి పొందింది. భారతదేశ విభజన మానవ చరిత్రలోనే అతిపెద్ద వలసలకు బీజం చేసింది. ఈ విభజన వల్ల 2 కోట్ల మంది ప్రభావితమైనట్లు అంచనా.


 గత రెండేళ్లుగా జమకాని సబ్సిడీలు
  కొత్తగా రుణాలకోసం నోటిఫికేషన్ జారీ
  యూనిట్లు నెలకొల్పిన లబ్ధిదారుల్లో ఆందోళన
  పట్టించుకోని అధికార యంత్రాంగం
  
  శ్రీకాకుళం పాతబస్టాండ్ :జిల్లాలో బీసీ, ఎస్సీలకు ప్రభుత్వం నిర్దేశించిన రుణలక్ష్యాలు పూర్తవుతున్నా మంజూరు చేస్తున్న సబ్సిడీలు మాత్రం ఏళ్లు గడుస్తున్నా జమకావడంలేదు. దీనికి గత రెండేళ్ల గణాంకాలే నిదర్శనం. తాజాగా రుణాలకోసం వివిధ యూనిట్లు ఏర్పాటు చేసుకోమని నోటిఫికేషన్ జారీ చేయడంతో దాని ప్రభావం ఈ లక్ష్యాలపై పడవచ్చన్న అనుమానాలు వ్యక్తమవుతున్నాయి. రెండేళ్లుగా ఏర్పాటు చేసుకున్న యూనిట్లకు సంబంధించి సబ్సిడీలు జమచేయనపుడు ఈ సారి కొత్తగా రుణాలకోసం నోటఫికేషన్ విడుదల చేయడం ఎందుకని లబ్ధిదారులు ప్రశ్నిస్తున్నారు.
  
  2013-14 ఆర్థిక సంవత్సరానికి సంబంధించి జిల్లాలో వెనుకబడిన తరగతులవారికి 875 యూనిట్లు కేటాయించగా అన్నింటినీ గ్రౌండ్ చేశారు. వీటికి సబ్సిడీగా రూ. 2.68 కోట్లు కేటాయించగా ఇంకా అందులో చాలా యూనిట్లకు నిధులు జమకాలేదు. ఎస్సీ కార్పొరేషన్ పరిధిలో కూడా 746 యూనిట్లకు సబ్సిడీ రూ. 1.5 కోట్లు కేటాయించగా ఇందులో చాలావరకూ జమకాలేదు. ముఖ్యంగా ఏపీ వికాస్ బ్యాంకులో రుణాలు తీసుకున్నవారికి మాత్రమే సబ్సిడీలు జమకావట్లేదని లబ్ధిదారులు చెబుతున్నారు.
  
  2014-15 ఆర్థిక సంవత్సరంలో
   వెనుకబడిన తరగతులవారి కోసం 3138 యూనిట్లు మంజూరుకాగా అన్నింటినీ ఏర్పాటు చేశారు. వీరికి రూ. 20.9 కోట్లు రాయితీ మొత్తాలు మంజూరయ్యాయి. షెడ్యూలు కులాలవారికి 1158 యూనిట్లకు రూ. 16.41కోట్లు సబ్సిడీ విడుదలైంది. అయిదు నెలలు గడుస్తున్నా ఆ మొత్తాలు జమకాలేదు.  2015-16 ఆర్థిక సంవత్సరానికి సంబంధించి రుణాల కోసం నోటిఫికేషన్ తాజాగా విడుదల చేశారు. బీసీలు 5970 యూనిట్ల ఏర్పాటుకు రూ. 16.33 కోట్లు, ఎస్సీలు 2292 యూనిట్ల ఏర్పాటుకు రూ. 30.36 సబ్సిడీ ఇవ్వాలని లక్ష్యంగా నిర్ణయించారు. పాతవాటికే సబ్సిడీలు జమకానపుడు కొత్తవారికెలా జమవుతాయని లబ్ధిదారులు అనుమానం వ్యక్తం చేస్తున్నారు.
  
  ఇక్కడా జన్మభూమి కమిటీలకే పెద్దరికం
  ఈ ఏడాది లక్ష్యాలు జన్మభూమి కమిటీల చేతిలోనికే చేరినట్టు తెలుస్తోంది. ఇక్కడ లబ్ధిదారుల ఎంపిక బాధ్యత వారికి అప్పగించడంవల్ల నిజమైన అర్హులకు అన్యాయం జరుగుతుందనే అనుమానాలు వ్యక్తమవుతున్నాయి. కొన్ని చోట్ల అప్పుడే వీటికోసం బేరాలు కూడా సాగిస్తున్నట్టు ప్రచారం జరుగుతోంది.