iron fists

సాక్షి, న్యూఢిల్లీ: దేశంలో ప్రభుత్వాన్ని ప్రశ్నించే వారిపై కేంద్రం ఉక్కుపాదం మోపుతోందని కాంగ్రెస్‌ అధ్యక్షుడు మల్లికార్జున ఖర్గే ధ్వజమెత్తారు. మోదీ ప్రభుత్వం సామాన్యుల గొంతు నొక్కేస్తూ అప్రజాస్వామికంగా వ్యవహరిస్తోందని మండిపడ్డారు. దేశాన్ని ‘మదర్‌ ఆఫ్‌ డెమోక్రసీ’(ప్రజాస్వామ్యానికి తల్లి) నుంచి ‘మజిల్డ్‌ డెమోక్రసీ’(గొంతు నొక్కేసిన ప్రజాస్వామ్యం)గా మార్చేశారని విమర్శించారు. యువత, విద్యార్థులు, న్యాయవాదులు, జర్నలిస్టులు, సామాజిక కార్యకర్తలు, రైతు సంఘాల నేతలతో పాటు యూట్యూబర్లు, కంటెంట్‌ క్రియేటర్లు.. ఇలా ఎవరైతే ప్రభుత్వ విధానాలను, లోపాలను ప్రశి్నస్తున్నారో వారందరినీ అక్రమంగా నిర్బంధిస్తున్నారని ఖర్గే శనివారం ఎక్స్‌లో ఆరోపించారు. కేంద్ర ప్రభుత్వ తీరుతో బీజేపీ, ఆర్‌ఎస్‌ఎస్‌ల పిరికితనం నేడు పూర్తిస్థాయిలో బట్టబయలైందని విమర్శించారు. కక్షసాధింపు చర్యలతో ప్రశ్నించే గొంతులను అణచివేయాలని చూడటం నియంతృత్వానికి నిదర్శనమని పేర్కొన్నారు. నిర్బంధాలు, అరెస్టులు, జైళ్లు, లాఠీలు, తూటాలతో ప్రజలను భయపెట్టలేరని ఖర్గే స్పష్టం చేశారు. స్వాతంత్య్ర పోరాట కాలం నుంచి దేశ భవితవ్యాన్ని తీర్చిదిద్దడంలో యువత ఎప్పుడూ ముందువరసలోనే ఉంటూ వస్తోందని ఆయన గుర్తుచేశారు. ఈ దేశ భవిష్యత్తును నిర్ణయించే యువతను నిర్బంధాలతో కట్టడి చేయలేరని హెచ్చరించారు. నియంత పాలనపై కాంగ్రెస్, ప్రతిపక్షాలతో కలిసి పోరాటం సాగిస్తుందని ఖర్గే స్పష్టం చేశారు.


 - ఎర్రచందనం అక్రమరవాణాలకు పాల్పడితే 10 ఏళ్ల జైలు శిక్ష, రూ. 10 లక్షల జరిమానా
 - ఆస్తులను జప్తు చేసే అధికారం, బెయిల్‌కు వీలుకాని విధంగా కేసులు
 - ఆంధ్రప్రదేశ్ ఫారెస్ట్ యాక్ట్‌లో సమూల సవరణలు.. ఆమోదం తెలిపిన రాష్ట్రపతి
 
 
 విజయవాడ: ఎర్రచందనం దొంగల తాటతీసేందుకు రాష్ట్ర ప్రభుత్వం ఆంధ్రప్రదేశ్ ఫారెస్ట్ యాక్ట్ -1967లో సమూల సవరణలు తీసుకువచ్చింది. చట్టాన్ని అడ్డుపెట్టుకుని ఇన్నాళ్లూ తప్పించుకు తిరుగుతున్న వారిపై ఈ సవరణలతో కొరఢా ఝుళిపించనుంది. ఎర్రచందనం దొంగలకు కళ్లెం వేసేందుకు సవరణలు తెచ్చిన ప్రభుత్వం ఎర్రచందనం చెట్ల నరికివేత, తొలగింపు, రవాణా, నిల్వ చేయడం, దొంగలకు సహకరించడం, వాహనాన్ని వినియోగించడం వంటి వాటిని తీవ్రనేరాలుగా పరిగణిస్తుంది.
 
 ఈ నేరాలలో పట్టుబడితే పదేళ్ల వరకు జైలు శిక్షతో పాటు, పది లక్షల రూపాయల జరిమానా విధించేలా సవరణలు తీసుకువచ్చింది. వీరికి బెయిల్ కూడా మంజూరు కాదు.
 తొలిసారి ఈ చట్టం కింద పట్టుబడితే 5 సంవత్సరాలు తగ్గకుండా జైలు శిక్ష, 3 లక్షల రూపాయలు తగ్గకుండా జరిమానా విధిస్తారు. ఇదే నేరం కింద రెండోసారి పట్టుబడితే 7 ఏళ్లు తగ్గకుండా జైలు శిక్ష, 5 లక్షల రూపాయలకు పైబడి జరిమానా విధిస్తారు. స్మగ్లింగ్ కు వినియోగించే వాహనాల యజమానులకు ఇవే శిక్షలు అమలు చేస్తారు. గతంలో ఎర్రచందనం స్మగ్లింగ్ కేసులో పట్టుబడిన నేరస్తుల ఆస్తులను జప్తు చేసేలా ప్రభుత్వం చట్టంలో సవరణలు చేసింది. స్మగ్లర్లు తమ కుటుంబసభ్యులు, స్నేహితుల పేరున ఆస్తుల కూడబెట్టినా వాటిని కూడా జప్తు చేసే అధికారం వుంటుంది. ఆంధ్రప్రదేశ్ ఫారెస్ట్ యాక్ట్ 1967 సవరణలకు రాష్ట్రపతి ఇప్పటికే ఆమోదం తెలిపారు.
 20 కేజీలకు మించి ఎర్రచందనం నిల్వ చేసిన ప్రతీవారిపై కొత్త సవరణ చట్టం కింద కేసులు నమోదు చేస్తారు. ప్రస్తుతం ఎవరైనా 20 కేజీలకు మించి ఎర్రచందనం కలప వుంటే వెంటనే తమ పరిధిలోని డీఎఫ్ఓకు సమాచారం అందించాల్సి వుంటుంది. ఎర్రచందనం కేసులను డీఎస్పీ స్థాయి అధికారి, చీఫ్ కన్జర్వేటర్ ఆఫ్ ఫారెస్ట్ విచారిస్తారు. ఇకపై ఎర్రచందనం స్మగ్లింగ్‌కు సంబంధించిన అన్ని కేసులను సివిల్ కోర్టుల్లో విచారించేందుకు వీలుకాకుండా సవరణలు చేయడంతో సంవత్సరాల తరబడి తప్పించుకునే వీలు లేకుండా పోయింది.
 శుక్రవారం విజయవాడలోని సీఎంలో ముఖ్యమంత్రి శ్రీ నారా చంద్రబాబు నాయుడుని కలిసిన డీజీపీ శ్రీ జేవీ రాముడు ఆంధ్రప్రదేశ్ ఫారెస్ట్ యాక్ట్-1967లో సవరణలపై వివరించారు. ఇక నుంచి ఎర్రచందనం స్మగ్లర్ల ఆటలు సాగకుండా కట్టడి చేయాలని ఈ సందర్భంగా ముఖ్యమంత్రి డీజీపీ సూచించారు. స్మగ్లర్లు, వారికి సహకరించేవారిపైనా కఠినంగానే వ్యవహరించాలని చెప్పారు.