బెల్‌గ్రేడ్‌ (సెర్బియా): కోవిడ్‌–19 కారణంగా అమెరికాలో నెలకొని ఉన్న తాజా పరిస్థితుల నేపథ్యంలో వరల్డ్‌ నంబర్‌వన్‌ నొవాక్‌ జొకోవిచ్‌ యూఎస్‌ ఓపెన్‌ గ్రాండ్‌స్లామ్‌ టెన్నిస్‌ టోర్నీ నుంచి తప్పుకోవాలనే ఆలోచనలో ఉన్నాడు. దానికంటే ఫ్రెంచ్‌ ఓపెన్‌లో పాల్గొనడమే మంచిదని అతను భావిస్తున్నాడు. జూన్‌లో జరగాల్సిన ఫ్రెంచ్‌ ఓపెన్‌ను నిర్వాహకులు కరోనా కారణంగా సెప్టెంబర్‌కు వాయిదా వేశారు. మరోవైపు షెడ్యూల్‌ ప్రకారం యూఎస్‌ ఓపెన్‌ ఆగస్టు 31 నుంచి న్యూయార్క్‌లో జరగాల్సి ఉంది. ఈ టోర్నీపై నిర్వాహకులు ఇంకా తుది నిర్ణయం తీసుకోలేదు. అయితే అమెరికాతో పోలిస్తే ఫ్రాన్స్‌లో ప్రస్తుతం మెరుగైన పరిస్థితులు ఉన్నాయని జొకోవిచ్‌ వ్యాఖ్యానించాడు. హోం క్వారంటైన్‌ మొదలు అనేక షరతుల మధ్య అమెరికాలో గ్రాండ్‌స్లామ్‌ టోర్నీ ఆడటం తన వల్ల కాదని తేల్చే శాడు. ‘ప్రస్తుత పరిస్థితులు చూస్తే సెప్టెంబర్‌ నుంచి క్లే సీజన్‌ జరిగే అవకాశం కనిపిస్తోంది. కాబట్టి ఫ్రెంచ్‌ ఓపెన్‌తోనే బరిలోకి దిగడం సరైన ఆలోచన. నేను మాట్లాడిన చాలా మంది ఆటగాళ్లు కూడా యూఎస్‌ ఓపెన్‌లో ఆడేందుకు ఆసక్తి చూపించడం లేదు. అక్కడి నిబంధనల ప్రకారం బయట నుంచి అమెరికాలో అడుగు పెట్టేవారు 14 రోజులు క్వారంటైన్‌లో ఉండాలి. అది నా వల్ల కాదు. కోర్టుల్లో అడుగు పెట్టడానికి కూడా షరతులు పెడుతున్నారు. ఆటగాడితోపాటు ఒకరినే అనుమతిస్తామంటే ప్రాక్టీస్‌ ఎలా సాధ్యమవుతుంది. న్యూయార్క్‌లో తిరిగేందుకు అవకాశం లేదు. ఇలాంటివాటి మధ్య నేను ఆడలేను’ అంటూ జొకోవిచ్‌ స్పష్టం చేశాడు.


 పారిస్‌: గ్రాండ్‌స్లామ్‌ టోర్నీ ఫ్రెంచ్‌ ఓపెన్‌లో రష్యా టెన్నిస్‌ తార మరియా షరపోవాకు వైల్డ్‌ కార్డ్‌ ఎంట్రీ లభిస్తుందా లేదా అనే అంశంపై మే 15న స్పష్టత రానుంది. ఈ విషయాన్ని ఫ్రెంచ్‌ టెన్నిస్‌ సమాఖ్య (ఎఫ్‌టీఎఫ్‌) గురువారం ప్రకటించింది. ‘రోలండ్‌ గారోస్‌ టోర్నీ క్వాలిఫయర్స్‌కు వారం రోజుల ముందు మే15న షరపోవా విషయంలో మా నిర్ణయాన్ని ప్రకటిస్తాం. ఒకవేళ మేం వైల్డ్‌కార్డ్‌ అనుమతి ఇవ్వకపోయినా క్వాలిఫయర్స్‌ ఆడి ఆమె ఈ టోర్నీలో పాల్గొనవచ్చు’ అని ఎఫ్‌టీఎఫ్‌ అధ్యక్షుడు బెర్నార్డ్‌ గుడిసెలి అన్నారు.
 
 మే 28 నుంచి జూన్‌ 11 వరకు ఫ్రెంచ్‌ ఓపెన్‌ టోర్నీ జరగనుంది. మరోవైపు సెరెనా విలియమ్స్‌ కూడా ప్రెగ్నెన్సీ కారణంగా ఈ సీజన్‌ టోర్నీల నుంచి తప్పుకున్నట్లు ప్రకటించడంతో షరపోవాకు వైల్డ్‌కార్డ్‌ ఎంట్రీ దొరుకుతుందని అభిమానులు ఆశించారు. అయితే సెరెనా, షరపోవాలిద్దరివి విభిన్నమైన కేసులు. ఒకరి గైర్హాజరీతో మరొకరికి సంబంధం లేదని బెర్నార్డ్‌ స్పష్టం చేశారు.