సాక్షి, సిటీబ్యూరో: విదేశీ కొలువుల పేరుతో సైబర్‌ నేరగాళ్లు గ్రేటర్‌ యువతకు వలవేస్తున్నారు. ఇటీవల ఐటీకారిడార్‌...గచ్చిబౌలి ఫైనాన్షియల్‌ జిల్లాల పరిధిలో సుమారు 50 మంది యువత సైబర్‌నేరగాళ్ల ఉచ్చుకు చిక్కి లక్షలాది రూపాయలు నష్టపోయినట్లు సైబర్‌ నిపుణులు చెబుతున్నారు. ప్రధానంగా సింగపూర్, ఆస్ట్రేలియా, దుబాయ్, న్యూజిలాండ్‌ తదితర దేశాల్లోని బహుళజాతి కంపెనీల్లో ఐటీ సంబంధిత ఉద్యోగాలు..లక్షల్లో వేతనాలంటూ సైబర్‌ మాయగాళ్లు నిరుద్యోగులకు ఎరవేస్తున్నారు. తొలుత టెలిఫోన్‌ ఇంటర్వ్యూలు ఆతరవాత ఫేక్‌ ఆఫర్‌లెటర్లు, వీసాలు జారీ చేసి లక్షల్లో దండుకుంటుండడం గమనార్హం. మోసాలు జరుగుతున్నాయిలా... సైబర్‌నేరగాళ్లు ఐటీ, సంబంధిత రంగాల్లో ఉద్యోగాలు ఆశిస్తున్న ఫ్రెషర్స్‌ లక్ష్యంగా తమ పంజా విసురుతున్నట్లు సైబర్‌నిపుణులు చెబుతున్నారు. ప్రధానంగా నిరుద్యోగులు దేశవ్యాప్తంగా వివిధ ప్రైవేటు కంపెనీల్లో ఉద్యోగవకాశాల కోసం తమ రెజ్యూమ్‌లను షైన్‌డాట్‌కామ్, నౌక్రి.కామ్, మాన్‌స్టర్‌.కామ్, క్విక్కర్‌ డాట్‌కామ్‌ తదితర సైట్లలో అప్‌లోడ్‌చేస్తున్నారు. వీటిని ఆయా సైట్లలో పనిచేస్తున్న ఉద్యోగులకు నజరానాలు ముట్టజెప్పి రెజ్యూమ్‌లను పెద్దసంఖ్యలో కొనుగోలుచేస్తున్న ఉత్తరాది రాష్ట్రాలు, నైజీరియాకు చెందిన సైబర్‌నేరగాళ్లు ఉద్యోగార్థుల మొబైల్‌ నెంబర్లను సేకరించి వాటి ఆధారంగా వారితో కాంటాక్ట్‌ అవుతున్నారు. బహుళజాతి కంపెనీల్లో లక్షల్లో్ల వేతనాలు చెల్లించే ఉద్యోగాలు మీకోసం సిద్ధంగా ఉన్నాయంటూ మాయమాటలు చెబుతున్నారు. ఆ తర్వాత  టెలీఫోన్‌ ఇంటర్వ్యూలు నిర్వహిస్తున్నారు. అనంతరం తమ అకౌంట్లలో రూ.50 వేల నుంచి రూ.2 లక్షల వరకుడిపాజిట్‌ చేసిన తరవాత ఫేక్‌ ఆఫర్‌ లెటర్లు జారీచేస్తున్నారు. ఆ తర్వాత వీసా ప్రాసెస్‌ పేరుతో మరికొంత మొత్తాన్ని డిమాండ్‌ చేస్తున్నారు. తీరా ఉద్యోగాలు దక్కాయంటూ విదేశీబాటపట్టే సమయానికి సైబర్‌నేరగాళ్లు తమ కాంటాక్ట్‌ నెంబరును మార్చేస్తున్నారు. తీరా మోసపోయినట్లు గుర్తించిన నిరుద్యోగులు సైబర్‌క్రైం పోలీసులను ఆశ్రయించి తమ గోడు వినిపిస్తున్నారు. ఇటీవలికాలంలో మాదాపూర్, గచ్చిబౌలి ఫైనాన్షియల్‌ జిల్లా పరిధిలో ఇలాంటివే 50కి పైగా కేసులు నమోదైనట్లు సైబర్‌క్రైమ్‌ పోలీసులు చెబుతున్నారు. అప్రమత్తతే కీలకం..   ♦ టెలిఫోన్‌ ఇంటర్వ్యూల విషయంలో నిరుద్యోగులు అప్రమత్తంగా ఉండాలి. వ్యక్తిగతంగా సదరు ఆఫీసుల్లో ఇంటర్వ్యూకు హాజరయ్యేందుకు ప్రాధాన్యతనివ్వాలి. ఒకవేళ తప్పనిసరి అయితే సదరు కంపెనీ వివరాలను నిపుణుల వద్ద ఆరా తీయాలి. ♦ సదరు కంపెనీ వెబ్‌సైట్‌ను సంప్రదించి వాస్తవంగా ఆఫర్లు ఉన్నాయో లేదో చెక్‌చేసుకోవాలి. ♦ బ్యాక్‌డోర్‌ ఎంట్రీని తిరస్కరించాలి. ఎట్టి పరిస్థితుల్లోనూ ప్రాధాన్యం ఇవ్వరాదు. ♦ సదరు కంపెనీకి సంబంధించి అందుబాటులో ఉన్న రివ్యూలను క్షుణ్ణంగా చదవాలి. ♦ డబ్బులు డిమాండ్‌ చేస్తున్నారంటే మీరు సైబర్‌నేరగాళ్ల ఉచ్చులో చిక్కుకున్నట్లేనని భావించాలి. ♦ డబ్బులు చెల్లించేముందు నిపుణులతో జాబ్‌ ప్రొఫైల్, సదరు కంపెనీ వివరాలపై చర్చించాలి.    ♦ ఉత్తరాది రాష్ట్రాల నుంచి వెల్లువెత్తుతున్న సైబర్‌నేరగాళ్ల కాల్స్‌ పట్ల అప్రమత్తంగా ఉండాలి. మీ వ్యక్తిగత అంశాలు షేర్‌ చేయరాదు.

నెల్లూరు(క్రైమ్‌): ఉద్యోగం ఇప్పిస్తానని ఓ ఏఆర్‌ కానిస్టేబుల్‌ నగదు తీసుకుని మోసం చేశాడని చింతల రాగయ్య, పద్మ, పద్మాకర్‌ అనే వ్యక్తులు ఎస్పీ ఐశ్వర్యరస్తోగికి ఫిర్యాదు చేశారు. సోమవారం వారు నెల్లూరులోని పోలీసు కార్యాలయంలో ఎస్పీని కలిశారు. బాధితుల కథనం మేరకు.. ఇందుకూరుపేట మండలం సోమరాజుపల్లికి చెందిన రాగయ్య, పద్మలు దంపతుల కొడుకు పద్మాకర్‌. అతను ఇంటర్‌ పూర్తిచేశాడు. ఆర్థిక పరిస్థితులు అనుకూలించకపోవడంతో చదువు మానివేసి తల్లిదండ్రులకు చేదోడువాదోడుగా ఉండేందుకు పనులకు వెళ్లసాగాడు. తమలాగే కుమారుడు కష్టపడకూడదని, ఏదైనా ఉద్యోగం వస్తే బతుకులు మారతాయని తల్లిదండ్రులు భావించారు. ఈ క్రమంలో వారిని సమీప బంధువు కానిస్టేబుల్‌ శివాజీ కలిశాడు. పద్మాకర్‌కు పోలీసు శాఖలో జూనియర్‌ అసిస్టెంట్‌ ఉద్యోగం ఇప్పిస్తానని నమ్మబలికాడు. ఇందుకోసం రూ.4 లక్షలకుపైగా అవుతుందని బంధువులు కాబట్టి రూ.3.50 లక్షలు చెల్లిస్తే సరిపోతుందని చెప్పాడు. తలకు మించిన భారమైనా కొడుకు భవిష్యత్‌ కోసం అప్పులు చేసి నాలుగు విడతలుగా రూ.3.50 లక్షలు చెల్లించినట్లుగా రాగయ్య చెబుతున్నాడు. కానిస్టేబుల్‌ అనుమానం రాకుండా ఉండేందుకు  పద్మాకర్‌ను ఎస్పీ కార్యాలయంలోని ఎస్పీ, ఏఎస్సీ చాంబర్‌ల వద్దకు తీసుకెళ్లి అధికారులు మీటింగ్‌లో ఉన్నారని చెప్పేవాడు. నగదు ఇచ్చినా ఉద్యోగం రాకపోవడంతో బాధిత కుటుంబసభ్యులు కానిస్టేబుల్‌ను నిలదీశారు. దీంతో అతను ఏకంగా అప్పటి ఎస్పీ విశాల్‌గున్నీ, డీజీపీ సంతకాలతో నకిలీ అపాయింట్‌మెంట్‌ లెటర్‌ను రాగయ్య ఇంటికి పంపాడు. అందులో నెల్లూరు పోలీసు కార్యాలయంలో జూనియర్‌ అసిస్టెంట్‌ పోస్టు వచ్చినట్లు, జీతం రూ.15 నుంచి 20 వేల వరకు ఉంటుందని, 8 నెలల్లోగా ఉద్యోగంలో చేరాలని ఉంది. తాను చెప్పినప్పుడు లెటర్‌ను పోలీసు కార్యాలయంలో ఇచ్చి ఉద్యోగంలో చేరాలని కానిస్టేబుల్‌ చెప్పినట్లు రాగయ్య, పద్మాకర్‌ తెలిపారు. నెలల తరబడి వేచిచూసినా కానిస్టేబుల్‌ సరైన సమాధానం చెప్పకపోవడం, తిప్పించుకుంటూ ఉండడంతో మోసపోయామని గ్రహించిన బాధితులు ఎస్పీకి ఫిర్యాదు చేశారు. స్పందించిన ఆయన పూర్తిస్థాయిలో విచారించి నివేదిక సమర్పించాలని నగర డీఎస్పీ ఎన్‌బీఎం మురళీకృష్ణను ఆదేశించారు. తమను మోసం చేసిన కానిస్టేబుల్‌పై చర్యలు తీసుకోవాలని రాగయ్య, పద్మ దంపతులు కోరుతున్నారు.    

సాక్షి, సిటీబ్యూరో: సాఫ్ట్‌వేర్‌ ఇంజినీర్, ఆన్‌లైన్‌ స్కాలర్‌షిప్‌ ఫర్మ్‌ డైరెక్టర్, గ్రాఫిక్‌ డిజైనర్, టెక్కీ, ఈవెంట్‌ మేనేజర్, హెచ్‌ఆర్‌ ప్రొఫెషనల్, జాబ్‌ కన్సల్టెంట్, కృషి భవన్‌ ఉద్యోగులు... ఇలా ఎనిమిది మందితో ఏర్పడిన ముఠా.. నవరత్నాలుగా పిలిచే ఓఎన్‌జీసీ, గెయిల్, ఐఓసీ... వంటి సంస్థల్లో ఉద్యోగాల పేరుతో వల వేసింది. ఆసక్తి చూపిన వారికి ఏకంగా ఢిల్లీలోని ‘అధికారిక ప్రాంతమైన’ కృషి భవన్‌లో ఇంటర్వ్యూలు చేసింది. స్పూఫ్డ్‌ మెయిల్స్‌తో ఆఫర్‌ లెటర్స్‌ ఇచ్చి రూ.కోట్లలో దండుకుంది. ఈ అంతర్రాష్ట్ర ముఠా చేతిలో మోసపోయిన వారిలో హైదరాబాద్‌కు చెందిన వారూ ఉన్నారు. ఈ గ్యాంగ్‌లో ఐదుగురితో పాటు కృషిభవన్‌ ఉద్యోగులైన ఇద్దరిని అరెస్టు చేసిన ఢిల్లీ పోలీసులు ఓ హైదరాబాదీ కోసం ముమ్మరంగా గాలిస్తున్నారు. జాబ్‌ కన్సల్టెంట్‌ అయిన ఇతడు స్కామ్‌లో కీలక పాత్ర పోషించినట్లు చెప్తున్నారు.  వివిధ మాధ్యమాల్లో ప్రకటనలు ఇచ్చి... ఢిల్లీలోని వివిధ ప్రాంతాలకు చెందిన కిషోర్‌ కునాల్‌ (ఫర్మ్‌ డైరెక్టర్‌), జగదీష్, సందీప్‌ (కృషి భవన్‌ ఉద్యోగులు), వశీం (గ్రాఫిక్‌ డిజైనర్‌), అంకిత్‌ (ఈవెంట్‌ మేనేజర్‌), విశాల్‌ (సాఫ్ట్‌వేర్‌ ఇంజినీర్‌), సుమన్‌ (హెచ్‌ఆర్‌ ప్రొఫెషనల్‌)తో పాటు హైదరాబాద్‌కు చెందిన జాబ్‌ కన్సల్టెంట్‌ రవిచంద్ర ఓ ముఠాగా ఏర్పడ్డారు. వీరంతా కలిసి కేంద్రం ఆధీనంలో ఉండే నవరత్నాలుగా పరిగణించే ఓఎన్‌జీసీ, గెయిల్, ఐఓసీ వంటి సంస్థల్లో ఉద్యోగాల పేరుతో మోసాలకు తెరలేపారు. దీనికోసం వివిధ మాధ్యమాల్లో ప్రకటనలు ఇవ్వడంతో పాటు వ్యక్తిగతంగానూ అనేక మంది నిరుద్యోగుల్ని ఆకర్షించారు. దరఖాస్తు చేసిన వారికి ఇంటర్వ్యూ లేఖలను మెయిల్‌ చేయడంతో పాటు ఫోన్‌కాల్స్‌ చేశారు. దీనికోసం వీరు ఢిల్లీలో ఉన్న కృషి భవన్‌ను వినియోగించుకున్నారు. అత్యంత కట్టుదిట్టమైన భద్రత ఉండే ఈ భవన్‌లోనే అనేక కేంద్ర ప్రభుత్వ విభాగాల కార్యాలయాలు ఉన్నాయి. అక్కడ పని చేసే నాలుగో తరగతి ఉద్యోగుల ద్వారా అధికారులు లేని సమయంలో లోపలకు వెళ్లి ఫోన్‌ కాల్స్‌ చేసేదీ ముఠా. రవిచంద్ర హైదరాబాద్‌కు చెందిన నిరుద్యోగుల్ని ఆకర్షించి ఈ ముఠాకు పరిచయం చేసేవాడు. దీనికోసం ఇతడికి భారీ మొత్తంలో కమీషన్‌ ముడుతుండటంతో తనకు ఉన్న పరిచయాలతో ఇతర ప్రాంతాల్లో ఉన్న నిరుద్యోగులకూ టోకరా వేశాడు.  ఇంటర్వ్యూలు సైతం కృషి భవన్‌లోనే... ఒక్కో ఉద్యోగానికి రూ.10 లక్షల నుంచి రూ.25 లక్షల వరకు రేటు చెప్పే ఈ గ్యాంగ్‌ ఉద్యోగార్థుల నుంచి ప్రాథమికంగా రూ.లక్ష నుంచి రూ.2 లక్షల వరకు అడ్వాన్స్‌ తీసుకునేది. దీనికోసం కృషి భవన్‌ నుంచి ఫోన్‌కాల్స్‌ చేసి నమ్మించేది. ఆపై ఢిల్లీలో జరిగే ఇంటర్వ్యూలకు హాజరుకావాలంటూ కాల్‌ లెటర్స్‌ పంపేది. గతంలో ఈ ముఠా అక్కడి స్టార్‌ హోటల్స్‌లోని గదుల్లో ఇంటర్వ్యూలు చేసింది. అయితే నిరుద్యోగుల్ని పూర్తిగా నమ్మించడానికి తమ పంథా మార్చింది. కృషి భవన్‌లోని గ్రామీణాభివృద్ధి శాఖ కార్యాలయంలో మల్టీ టాస్కింగ్‌ ఉద్యోగాలు చేసే జగదీష్, సందీప్‌లకు అందులోని ఏ ప్రాంతానికైనా యాక్సస్‌ ఉండేది. దీన్ని దుర్వినియోగం చేసిన వారు ముఠా సభ్యుల్ని భవన్‌ లోపలకు తీసుకువెళ్లే వారు. ఆ రోజు ఏ అధికారి సెలవులో ఉంటే ఆ కార్యాలయాన్ని వీరికి అప్పగించే వారు. నిరుద్యోగుల్ని అక్కడకు పిలిపించే ముఠా సభ్యులు ఆ కార్యాలయాల్లోనే ఇంటర్వ్యూలు చేసే వారు. దీంతో ఉద్యోగార్థులు పూర్తిగా ముఠా వలలో పడిపోయేవారు. ఈ ఇంటర్వ్యూలు చేసే వ్యవహారాల్లోనూ రవిచంద్ర పాత్ర కీలకంగా ఉండేదని పోలీసులు అనుమానిస్తున్నారు.  స్పూఫింగ్‌ మెయిల్స్, ఫోన్‌కాల్స్‌... నిర్ణీత రుసుం తీసుకుని స్పూఫింగ్‌ సాఫ్ట్‌వేర్, సదుపాయాన్ని అందించే వెబ్‌సైట్లు ఇంటర్‌నెట్‌లో అనేకం ఉన్నాయి. వాస్తవానికి ఇది ఇంటర్‌నెట్‌ ద్వారా చేసే కాల్‌. దీనిలోకి ఎంటర్‌ అయిన తరవాత సదరు వ్యక్తి ఫోన్‌ నెంబర్‌తో పాటు ఫోన్‌కాల్‌ను అందుకోవాల్సిన వ్యక్తిది, ఫోన్‌ రిసీవ్‌ చేసుకునేప్పుడు ఇతడికి సెల్‌ఫోన్‌లో ఎవరి నెంబర్‌ డిస్‌ప్లే కావాలో అది కూడా పొందుపరుస్తారు. ఇదేరకంగా ఈ–మెయిల్‌ ఐడీ స్పూఫింగ్‌ వెబ్‌సైట్లలో మెయిల్‌ ఐడీలను రిజిస్టర్‌ చేస్తారు. ఇ లా చేయడం వల్ల ఓ వ్యక్తి ప్రముఖ కంపెనీ నుంచి కాల్‌ చేసినట్లు, ఈ–మెయిల్‌ పంపినట్లు మరో వ్యక్తిని బుట్టలో వేసుకునే అవకాశం ఉంటుంది. ఈ స్పూఫింగ్‌ సాఫ్ట్‌వేర్‌ను ఎడాపెడా వినియోగించేస్తున్న మోసగాళ్లు నిరుద్యోగులకు ప్రముఖ కంపెనీల్లో ఉద్యోగాల పేరుతో టోకరా వేశారు. ఈ అంతర్రాష్ట్ర గ్యాంగ్‌ స్పూఫింగ్‌ ద్వారా ఓఎన్‌జీసీ నుంచి ఫోన్‌కాల్స్, ఈ–మెయిల్స్‌ వచ్చినట్లు సృష్టించారు. ఇంటరŠూయ్వలు పూర్తయిన వారికి ఇలానే నియామక కబురు అందించి మిగిలిన మొత్తం డిమాండ్‌ చేశారు. తమకు ఓఎన్‌జీసీ నుంచే లేఖ/కాల్‌ వచ్చిందని నమ్మిన నిరుద్యోగులు మిగిలిన మొత్తం ఆ ముఠాకు చెల్లించేసేవారు.  వ్యవహారం వెలుగులోకి వచ్చిందిలా... కొన్నాళ్లుగా ఈ పంథాలో మోసాలు చేస్తున్న ఈ ముఠాపై తొలిసారిగా రెండు నెలల క్రితం ఢిల్లీ పోలీసులకు ఫిర్యాదు అందింది. హైదరాబాద్, ఢిల్లీతో పాటు వివిధ ప్రాంతాలకు చెందిన కొందరు విద్యార్థులకు ఈ ముఠా ఓఎన్‌జీసీలో అసిస్టెంట్‌ ఇంజినీర్‌ ఉద్యోగాలంటూ ఎర వేసింది. ఇంటర్వ్యూల వరకు పూర్తి చేసి వీరి నుంచి రూ.22 లక్షలు తీసుకుంది. ఆపై బోగస్‌ లేఖలు అందించింది. వీటిని పట్టుకున్న నిరుద్యోగులు ఓఎన్‌జీసీ కార్యాలయానికి వెళ్లారు. దీంతో తాము మోసపోయామని గుర్తించిన బాధితులు అక్కడి వసంత్‌కుంజ్‌ పోలీసులకు ఫిర్యాదు చేశారు. ఈ వ్యవహారాన్ని సీరియస్‌గా తీసుకున్న ఢిల్లీ పోలీసులు ప్రత్యేక బృందాన్ని ఏర్పాటు చేశారు. లోతుగా దర్యాప్తు చేసిన ఈ స్పెషల్‌ టీమ్‌ సోమ వారం కిషోర్‌ కునాల్, జగదీష్, సందీప్, వశీం, అంకిత్, విశాల్, సుమన్‌లను అరెస్టు చేసింది. వీరి నుంచి 27 సెల్‌ఫోన్లు, రెండు ల్యాప్‌టాప్స్, 10 చెక్‌ బుక్స్, నకిలీ గుర్తింపుకార్డులు, 45 సిమ్‌కార్డులు స్వాధీనం చేసుకుంది. వీరి విచారణ నేపథ్యంలోనే రవిచంద్ర పాత్ర వెలుగులోకి రావడంతో వేట ము మ్మరం చేసింది. ఇతడిని పట్టుకోవడం కోసం ఓ ప్రత్యేక బృందం హైదరాబాద్‌లోనూ గాలిస్తోంది. 


 కరీంనగర్ : ఉద్యోగాలు ఇప్పిస్తానంటూ నిరుద్యోగులను మోసం చేస్తున్న మఠాగుట్టును కరీంనగర్ పోలీసులు రట్టు చేశారు. అందుకు సంబంధించి ముగ్గురు వ్యక్తులను పోలీసులు గురువారం అరెస్ట్ చేశారు. వారిపై పలు సెక్షన్ల కింద పోలీసులు కేసులు నమోదు చేశారు. అయితే ముఠాలోని మరో ఇద్దరు వ్యక్తులు పరారీలో ఉన్నారని పోలీసులు తెలిపారు.
 వారి కోసం గాలింపు చర్యలు చేపట్టినట్లు చెప్పారు. ఉద్యోగాలు ఇప్పిస్తామంటూ 18 మంది నిరుద్యోగుల నుంచి దాదాపు రూ.70 లక్షలు వసూలు చేసినట్లు నిందితులు ఒప్పుకున్నారని పోలీసులు వివరించారు.