గోల్కొండ: తనను వెంబడిస్తున్న పోకిరీకి ఓ యువతి చెప్పుతో బుద్ధి చెప్పిన సంఘటన ఆదివారం  మెహిదీపట్నం ప్రాంతంలో చోటు చేసుకుంది. వివరాల్లోకి వెళితే..  అత్తాపూర్‌కు చెందిన ఓ యువతి బైక్‌పై మెహిదీపట్నం వైపు వస్తుండగా, తనను ఓ యువకుడు బైక్‌పై వెంబడిస్తున్నట్లు గుర్తించింది. రేతిబౌలి మీదుగా ఆసిఫ్‌నగర్‌ ఏసీపీ కార్యాలయం వద్దకు రాగానే ఆమె నడిరోడ్డుపై బైక్‌ను ఆపి  తనను వెంబడిస్తున్న యువకుడి వాహనానికి అడ్డుకుని అతడిపై చెప్పుతో దాడి చేసింది. దీంతో రోడ్డుపై వెళుతున్న వాహనదారులు ఆమెను అడ్డుకున్నారు. దీంతో సదరు యువకుడు అక్కడినుంచి పరారయ్యాడు. తనను అడ్డుకున్న వారిపై ఆమె ఆగ్రహం వ్యక్తం చేస్తూ, దుండగుడిని పట్టుకోకపోగా, తనను ఎందుకు ఆపారని నిలదీసింది. 


 బెంగళూరు(కర్ణాటక): చుట్టూ జనం ఉన్నారనే భయం లేకుండా ఓ వ్యక్తి మహిళతో అసభ్యంగా ప్రవర్తించి చివరకు జైలు పాలయ్యాడు. ఈ ఘటన బుధవారం జాలహళ్లి పోలీస్‌స్టేషన్‌ పరిధిలో చోటు చేసుకుంది. బుధవారం జాలహళ్లి క్రాస్‌ సిగ్నల్‌ వద్ద ఓ మహిళ రోడ్డు దాటడానికి ఎదురు చూస్తుండగా అదే సమయంలో అక్కడే ఉన్న టీ.దాసరహళ్లికి చెందిన నారాయణప్ప ఆమెను పదే పదే తాకుతూ అసభ్యంగా ప్రవర్తించసాగాడు. దీంతో ఓపిక నశించిన మహిళ నారాయణప్పను చేతితో కొట్టింది.
 
 దీంతో షాక్‌కు గురైన అతడు ఏదో పొరపాటున చేయి తగిలిందంటూ తిరిగి మహిళను బెదిరించడానికి ప్రయత్నించాడు. ఆమె నారాయణప్పను చెప్పుతో కొట్టడం ప్రారంభించడంతో అక్కడే ఉన్న ట్రాఫిక్‌ కానిస్టేబుల్‌ భైరేగౌడ మద్దతుగా నిలిచారు. విషయం తెలుసుకున్న పింక్‌ హొయ్సళ వాహనం అక్కడికి చేరుకొని మహిళను, నారాయణప్పను స్టేషన్‌ తరలించారు. మహిళ ఫిర్యాదు మేరకు పోలీసులు కేసు నమోదు చేసుకుని నారాయణప్పను అదుపులోకి తీసుకున్నారు. ఈ సందర్భంగా ట్రాఫిక్‌ కానిస్టేబుల్‌ భైరేగౌడను డీసీపీ శోభారాణి అభినందించి నగదు బహుమానాన్ని అందించారు.