CSS

సాక్షి, హైదరాబాద్‌: మార్గదర్శి చిట్‌ఫండ్‌ ప్రైవేట్‌ లిమిటెడ్, డాల్ఫిన్‌ హోటల్స్‌ లిమిటెడ్‌కు తెలంగాణ హైకోర్టులో చుక్కెదురైంది. ప్రైవేటు విద్యుత్‌ ఉత్పత్తి సంస్థల నుంచి విద్యుత్‌ కొనుగోలు చేసిన వినియోగదారులకు క్రాస్‌ సబ్సిడీ సర్‌చార్జీ (సీఎస్‌ఎస్‌) చెల్లింపు నుంచి మినహాయింపు ఇవ్వలేమని పేర్కొంది. మార్గదర్శి రూ.81,12,110, డాల్ఫిన్‌ హోటల్స్‌ రూ.3,85,02,564 బకాయిలు చెల్లించాల్సిందేనని స్పష్టం చేసింది. ప్రభుత్వ అనుమతితో విద్యుత్‌ ఉత్పత్తి సంస్థ నుంచి విద్యుత్‌ పొందినట్లు నిరూపించే చెల్లుబాటయ్యే అనుమతి పత్రాన్ని సమర్పించలేకపోయినందున మినహాయింపు కోరే అర్హత లేదని తేల్చిచెప్పింది. 2005–06 నుంచి 2014–15 వరకు విద్యుత్‌ వినియోగానికి సంబంధించి దక్షిణ తెలంగాణ విద్యుత్‌ పంపిణీ సంస్థ (ఎస్‌పీడీసీఎల్‌) జారీ చేసిన డిమాండ్‌ నోటీసులను సమర్థించింది. విద్యుత్‌ సరఫరా చట్టం కింద ప్రభుత్వం ప్రైవేటు విద్యుత్‌ ఉత్పత్తి సంస్థలకు అనుమతులు మంజూరు చేసిన సందర్భాల్లో మాత్రమే క్రాస్‌ సబ్సిడీ సర్‌చార్జీ నుంచి మినహాయింపు పొందే అవకాశం ఉంటుందని పేర్కొంది. కేవలం ప్రోత్సాహక ఉత్తర్వుల ఆధారంగా ఈ మినహాయింపు కోరడానికి వీల్లేదని స్పష్టం చేసింది. ఈ మేరకు న్యాయమూర్తి జస్టిస్‌ నగేష్‌ భీమపాక గురువారం తీర్పు వెలువరించారు. బకాయిలు చెల్లించాలంటూ ఎస్‌పీడీసీఎల్‌ జారీ చేసిన డిమాండ్‌ నోటీసులు, దానిని సమర్థిస్తూ ఇచ్చిన ఉత్తర్వులను సవాలు చేస్తూ మార్గదర్శి, డాల్ఫిన్‌ హోటల్స్‌ దాఖలు చేసిన పిటిషన్‌ను కొట్టివేశారు. పదేళ్ల విద్యుత్‌ వినియోగానికి బకాయిలు మార్గదర్శి చిట్‌ఫండ్‌ సంస్థ హెచ్‌టీ వినియోగదారుగా 450 కేవీఏ కాంట్రాక్టు డిమాండ్‌తో విద్యుత్‌ పొందుతోంది. 2003, ఏప్రిల్‌ నుంచి 2014 జూన్‌ వరకు సుధా ఆగ్రో అండ్‌ కెమికల్‌ ఇండస్ట్రీస్‌ అనే ప్రైవేటు విద్యుదుత్పత్తి సంస్థ నుంచి కూడా విద్యుత్‌ సరఫరా పొందింది. ఈ నేపథ్యంలో 2005–06 నుంచి 2014–15 ఆర్థిక సంవత్సరాలకు సంబంధించి క్రాస్‌ సబ్సిడీ సర్‌చార్జీ కింద రూ.81.12 లక్షలు చెల్లించాలంటూ ఎస్‌పీడీసీఎల్‌ 2025, జనవరి 31న డిమాండ్‌ నోటీసు జారీ చేసింది. ఇదే అంశంపై రూ.3.85 కోట్లు చెల్లించాలని 2025, జూన్‌ 16న ‘డాల్ఫిన్స్‌’ కు నోటీసులిచ్చింది. దీనిపై మార్గదర్శి, డాల్ఫిన్‌ హోటల్స్‌ అభ్యంతరాలు వ్యక్తం చేయగా, వాటిని పరిశీలించిన అనంతరం అదే ఏడాది విద్యుత్‌ సంస్థ ఉత్తర్వులు జారీ చేసింది. వీటిని సవాలు చేస్తూ ఆ సంస్థలు హైకోర్టును ఆశ్రయించాయి.విద్యుత్‌ చట్టం–2003 అమల్లోకి రాకముందు క్రాస్‌ సబ్సిడీ సర్‌చార్జీ విధానం లేదని మార్గదర్శి తరఫు న్యాయవాదులు వాదించారు. అమల్లోకి వచ్చిన తర్వాత తలెత్తిన సమస్యలను పరిష్కరించేందుకు కేంద్ర ప్రభుత్వం 2005లో ఎలక్ట్రిసిటీ (రిమూవల్‌ ఆఫ్‌ డిఫికల్టీస్‌) సెకండ్‌ ఆర్డర్‌ జారీ చేసిందని, దాని ప్రకారం క్రాస్‌ సబ్సిడీ సర్‌చార్జీ నుంచి తమకు మినహాయింపు వర్తిస్తుందన్నా­రు. విద్యుత్‌ సంస్థ.. దీన్ని వ్యతిరేకించింది. 1997, 1998లో జారీచేసిన జీవోలు ప్రైవేటు విద్యుత్‌ ఉత్పత్తిదారులను ప్రోత్సహించేందుకు, మూడో వ్యక్తులకు విద్యుత్‌ విక్ర­యించే సౌకర్యం కల్పించేందుకు ఉద్దేశించినవేనని తెలిపారు. వాటిని అప్పటి విద్యుత్‌ సరఫరా చట్టం కింద ప్ర­భు­త్వం జారీ చేసిన సమ్మతిగా పరిగణించలేమన్నారు. క్రాస్‌ సబ్సిడీ చార్జెస్‌ అంటే...మన దేశంలో విద్యుత్తు పంపిణీ సంస్థలు వ్యవసాయానికి, పేదలకు లేదా గృహ వినియోగదారులకు తక్కువ ధరకు కరెంట్‌ అందిస్తుంటాయి. ఈ సబ్సిడీల భారాన్ని భరించడానికి పరిశ్రమలు, వాణిజ్య సంస్థల నుంచి ఎక్కువ టారిఫ్‌లు వసూలు చేస్తాయి. వీరు చెల్లించే అధిక మొత్తంతోనే సబ్సిడీలు నడుస్తాయి. అయితే, ఈ పెద్ద పరిశ్రమలు స్థానిక డిస్కంల నుంచి కరెంట్‌ కొనకుండా, బయట ప్రైవేట్‌ నుంచి లేదా ఇతర మార్గాల ద్వారా నేరుగా విద్యుత్తును కొనుగోలు చేస్తే, స్థానిక డిస్కంలకు రావాల్సిన అధిక ఆదాయం కోల్పోతుంది. ఈ విధంగా పెద్ద వినియోగదారులు బయట నుంచి కరెంట్‌ కొనుగోలు చేయడంతో డిస్కం నష్టపోయే క్రాస్‌–సబ్సిడీ ఆదాయాన్ని భర్తీ చేయడానికి, ఆ వినియోగదారులపై విధించే అదనపు చార్జీనే క్రాస్‌ సబ్సిడీ సర్‌చార్జీ అంటారు. అనుమతి పత్రం సమర్పించడంలో విఫలం వాదనలు పరిశీలించిన న్యాయమూర్తి జస్టిస్‌ నగేష్‌ భీమపాక.. విద్యుత్‌ సరఫరా కొరతను అధిగమించేందుకు ప్రైవేటు విద్యుత్‌ ఉత్పత్తి సంస్థలను ప్రోత్సహించాలనే ఉద్దేశంతో రాష్ట్ర ప్రభుత్వం 1997లో జీవో 93, 1998లో జీవో 112 జారీ చేసింది. ఈ ఉత్తర్వుల ద్వారా సంప్రదాయేతర ఇంధన వనరుల ఆధారంగా విద్యుత్‌ ఉత్పత్తి చేసే సంస్థలకు ఇతర వినియోగదారులకు విద్యుత్‌ విక్రయించుకునే అవకాశం కల్పించింది. అయితే, ఈ జీవోలు కేవలం ప్రోత్సాహక ఉత్తర్వులుగానే పరిగణించాలి తప్ప.. ప్రభుత్వం ఇచ్చిన చట్టబద్ధమైన అనుమతులుగా భావించలేమని న్యాయస్థానం అభిప్రాయపడింది. క్రాస్‌ సబ్సిడీ సర్‌చార్జీ మినహాయింపు పొందాలంటే విద్యుత్‌ ఉత్పత్తి సంస్థకు సంబంధిత చట్ట నిబంధన కింద రాష్ట్ర ప్రభుత్వం జారీ చేసిన చెల్లుబాటయ్యే అనుమతి ఉందని నిరూపించాల్సిన బాధ్యత వినియోగదారుడిపైనే ఉంటుందన్నారు. వ్యక్తిగత విచారణ సమయంలో సంబంధిత అనుమతి పత్రాలను సమర్పించేందుకు మార్గదర్శి అదనపు సమయం కోరినా.. వాటిని విద్యుత్‌ సంస్థకు గానీ, హైకోర్టుకు గానీ అందించలేకపోయిందని గుర్తు చేశారు. గతంలో ఇదే అంశంపై వచ్చిన తీర్పులు కూడా మార్గదర్శి వాదనకు మద్దతుగా నిలవవని పేర్కొన్నారు. ఈ నేపథ్యంలో విద్యుత్‌ సంస్థ జారీ చేసిన డిమాండ్‌ నోటీసులు, తదనంతర ఉత్తర్వుల్లో జోక్యం చేసుకోవాల్సిన అవసరం లేదని పేర్కొంటూ మార్గదర్శితో పాటు డాల్ఫిన్‌ హోటల్స్‌ దాఖలు చేసిన రిట్‌ పిటిషన్‌ను కొట్టివేశారు.

సాక్షి, హైదరాబాద్‌: వచ్చే ఆర్థిక సంవత్సరానికి (2025–26) గాను వార్షిక బడ్జెట్‌ తయారీ కోసం అన్ని ప్రభుత్వ శాఖలు తమ అంచనాలను జనవరి 4వ తేదీలోగా పంపాలని ఆర్థిక శాఖ ఆదేశించింది. ఈ మేరకు బడ్జెట్‌ రూపకల్పన మార్గదర్శకాలతో కూడిన ఉత్తర్వులను ఆర్థిక శాఖ ప్రత్యేక ప్రధాన కార్యదర్శి కె. రామకృష్ణారావు మంగళవారం జారీ చేశారు. ఈ ఉత్తర్వుల ప్రకారం... » అన్ని ప్రభుత్వ విభాగాలు ఈనెల 4వ తేదీలోగా ఐఎఫ్‌ఎంఐఎస్‌ పోర్టల్‌ ద్వారా ఆన్‌లైన్‌లో తమ బడ్జెట్‌ ప్రతిపాదనలను ఆయా శాఖలకు పంపాల్సి ఉంటుంది. అదే రోజున ఆయా శాఖాధిపతులు వాటిని పరిశీలించి మార్పులు, చేర్పులు చేసిన అనంతరం ఆర్థిక శాఖకు పంపాల్సి ఉంటుంది. » ఊహాజనిత అంచనాలకు పోకూడ దు. తమకు అవసరమయ్యే వాస్తవిక నిధుల కంటే ఎక్కువ లేదా తక్కువ మొత్తాలను ప్రతిపాదించకూడదు. » గ్రాంట్‌ ఇన్‌ ఎయిడ్‌ పద్దుల కింద చేసే ఖర్చును అన్ని శాఖలు తగ్గించుకోవాలి. »ప్రతి శాఖ విధిగా వ్యవస్థీకృత వ్యయాన్ని ప్రతిపాదించాలి. ఆఫీసుల నిర్వహణ, వాహనాలు, అద్దెలు, విద్యుత్, తాగునీటి ఖర్చులు, ఔట్‌సోర్సింగ్‌ సర్వీసులు, సంక్షేమ, సబ్సిడీ పథకాలకు అయ్యే వ్యయ అంచనాలను పంపాల్సి ఉంటుంది. » డిసెంబర్‌ 31, 2024 వరకు ఉన్న నికర అప్పుల వివరాలను పంపాలి. ప్రతి శాఖలో ఉన్న శాశ్వత ఉద్యోగులు, తాత్కాలిక ఉద్యోగుల వివరాలు పంపాలి. » అన్ని శాఖలు 2024–25 ఆర్థిక సంవత్సరపు సవరించిన అంచనాలను కూడా పంపాలి. ఆదాయ మార్గాలను పెంచుకునే అవకాశాలను రాబడి శాఖలు ప్రతిపాదించాలి. » వచ్చే ఆర్థిక సంవత్సరంలో కొత్త పథకాలను ప్రారంభించాల్సి ఉంటే అందుకు సంబంధించిన వివరాలు, అయ్యే ఖర్చును విధిగా ప్రతిపాదించాలి. »ప్రభుత్వ శాఖల్లో అమలు పరిచేందుకు వీలున్న కేంద్ర ప్రాయోజిత పథకాలను (సీఎస్‌ఎస్‌) గుర్తించడం ద్వారా కేంద్రం నుంచి ఎక్కువ నిధులు రాబట్టుకునే వీలున్నందున కేంద్ర, రాష్ట్ర ప్రభుత్వాల వాటా నిష్పత్తిని పేర్కొంటూ ప్రతిపాదనలు పంపాలి.

సాక్షి, హైదరాబాద్‌: ఆంధ్రప్రదేశ్‌కు బదలాయించిన కేంద్ర ప్రాయోజిత పథకాలకు (సీఎస్‌ఎస్‌) సంబంధించిన రూ.495 కోట్లు తిరిగి ఇప్పించాలని రాష్ట్ర ఆర్థిక శాఖ మంత్రి టి.హరీశ్‌రావు డిమాండ్‌ చేశారు. 2014–15లో సీఎస్‌ఎస్‌ కింద తెలంగాణకు హక్కుగా రావాల్సిన నగదును పొరపాటున ఆంధ్రప్రదేశ్‌లో ఖాతాలో జమచేశారని, దాన్ని తిరిగి తెలంగాణకు ఇప్పించాలని కోరారు. ఈ మేరకు హరీశ్‌రావు కేంద్ర ఆర్థిక మంత్రి నిర్మలా సీతారామన్‌కు లేఖ రాశారు. ఈ విషయమై ఇప్పటికే పలుమార్లు విజ్ఞప్తి చేసినా, కేంద్రానికి లేఖలు రాసినా ఫలితం లేకుండా పోయిందని చెప్పారు. రాష్ట్ర విభజన జరిగిన తర్వాత మొదటి సంవత్సరంలో (2014–15) కేంద్రం నుంచి వచ్చే నిధులను ఆంధ్రప్రదేశ్, తెలంగాణ మధ్య జనాభా ప్రాతిపదికన విభజించారని, అయితే పొరపాటు­గా మొత్తం సీఎస్‌ఎస్‌ నిధులను ఆంధ్రప్రదేశ్‌కు జమ చేశారని గుర్తుచేశారు. దీంతో తెలంగా­ణ నష్ట పోయిందన్నారు. ఈ విషయాన్ని తాము ఇప్పటికే ఏపీ, కేంద్ర ప్రభుత్వాలతోపాటు అకౌంటెంట్‌ జనరల్‌ దృష్టికి తీసుకువెళ్లినట్లు వివరించా­రు. ఎనిమిదేళ్లు గడుస్తున్నా ఆ రూ.495 కోట్లను తెలంగాణకు ఇంకా సర్దుబాటు చేయలేదన్నారు. ఇప్పటికైనా ఆ మొత్తాన్ని తిరిగి ఇప్పించేలా కృషి చేయాలని, వ్యక్తిగతంగా చొరవ తీసుకొని తెలంగాణకు జరిగిన అన్యాయాన్ని సరిదిద్దాలని సీతారామన్‌ను కోరారు. 

సాక్షి, అమరావతి: రూ.పది కోట్ల లోపు ఒప్పంద విలువ కలిగి ఇప్పటికే మొదలైన పనులన్నింటినీ కొనసాగించేందుకు రాష్ట్ర ప్రభుత్వం గ్రీన్‌సిగ్నల్‌ ఇచ్చింది. ఈ పనులకు బిల్లులు చెల్లించేందుకు కూడా అనుమతిస్తూ ఆర్ధికశాఖ ఇటీవల మెమో జారీ చేసింది. ఈమేరకు బిల్లుల చెల్లింపు, పనులకు సంబంధించి ఈ ఏడాది మే 29వ తేదీన జారీ చేసిన ఉత్తర్వుల్లో సవరణలు చేస్తూ ఆర్థిక శాఖ ముఖ్య కార్యదర్శి ఎస్‌.ఎస్‌.రావత్‌ మెమో జారీ చేశారు. ఒప్పందం కుదిరి, ప్రారంభం కాని రూ.పది కోట్ల లోపు విలువగల నాబార్డు, కేంద్ర ప్రాయోజిత పథకాల (సీఎస్‌ఎస్‌) పనులను కూడా కొనసాగించాలని, ఇందుకు సంబంధించిన బిల్లులను చెల్లించాల్సిందిగా ఆర్థికశాఖ స్పష్టం చేసింది. సహాయ పునరావాస, భూసేకరణ బిల్లుల చెల్లింపునకు కూడా ఆర్థిక శాఖ పచ్చ జెండా ఊపింది. ఈ నేపథ్యంలో రూ.పది కోట్ల లోపు విలువగల పనులన్నీ ప్రారంభం కానున్నాయి. తాగునీరు, రహదారులు, ఇతర అన్ని రకాల పనులు ఇందులో ఉన్నాయి. ఈ విషయంలో అన్ని శాఖలు ద్రవ్యజవాబుదారీ బడ్జెట్‌ నిర్వహణ నిబంధనలకు అనుగుణంగా తదుపరి చర్యలు తీసుకోవాలని ఆర్ధికశాఖ సూచించింది.  పురోగతి ఆధారంగా నిర్ణయం.. సంబంధిత శాఖలు పనుల పురోగతితోపాటు అగ్రిమెంట్‌ విలువను పరిగణనలోకి తీసుకుని ఎంత పని పూర్తయిందనే అంశం ఆధారంగా పనులు కొనసాగించడమా? లేదా? అనే విషయంపై నిర్ణయం తీసుకోవాలని మెమోలో ఆర్థిక శాఖ స్పష్టం చేసింది. ఈ ఏడాది మే 29 నాటికి చేసిన పనుల పురోగతి ఆధారంగా బిల్లుల చెల్లింపులను పరిగణనలోకి తీసుకోవాలని పేర్కొంది. సహాయ పునరావాస ప్యాకేజీ, భూసేకరణ విషయంలో బిల్లుల చెల్లింపునకు మిన హాయింపు ఇస్తున్నట్లు ఆర్థిక శాఖ స్పష్టం చేసింది.  సమీక్షించనున్న మంత్రులు.. ఈ ఏడాది ఏప్రిల్‌ 1వతేదీ నాటికి విదేశీ, నాబార్డు, కేంద్ర ప్రాయోజిత పథకాలు మినహా మిగిలిన పనులు మంజూరై ఉంటే ప్రారంభించని వాటిని రద్దు చేయాలని మెమోలో పేర్కొన్నారు. రూ.పది కోట్లకుపైగా విలువగల విదేశీ, నాబార్డు, కేంద్ర ప్రాయోజిత పథకాల నిధులతో మంజూరై ప్రారంభించని పనులపై సంబంధిత శాఖ మంత్రులు సమీక్షించాలి. విదేశీ, నాబార్డు, కేంద్ర ప్రాయోజిత పథకాల నిధులతో రూ.పది కోట్లకు పైగా విలువగల పనులు ప్రారంభమై అగ్రిమెంట్‌ విలువలో 25 శాతం తక్కువ వ్యయం అయిన పనులను కూడా సంబంధిత శాఖల మంత్రులు సమీక్షించాలని ఆర్థిక శాఖ సూచించింది. సమీక్ష  సమయంలో అంచనాల వ్యయ ప్రతిపాదనలు సక్రమంగా ఉన్నాయా? సింగిల్‌ బిడ్‌లు ఏమైనా దాఖలయ్యాయా? అంచనా వ్యయం కంటే ఎక్కువ మొత్తానికి టెండర్‌ కోట్‌ చేశారా? టెండర్లతో నిమిత్తం లేకుండా పనులేమైనా ఇచ్చారా? అనే అంశాలను పరిశీలించడంతోపాటు ప్రస్తుత పరిస్థితుల్లో ఆ పనుల అవసరం ఉందా? లేదా? అనేది పరిగణనలోకి తీసుకోవాలని పేర్కొంది. అనంతరం అనుమతి కోసం ఆర్థికశాఖ మంత్రికి పంపాలని మెమోలో సూచించారు.


 న్యూఢిల్లీ: కేంద్ర ప్రాయోజిత పథకాలు (సీఎస్‌ఎస్) 30కి మించకుండా కుదించాలంటూ ముఖ్యమంత్రుల కమిటీ చేసిన కీలక సిఫార్సును కేంద్ర కేబినెట్ ఆమోదించింది. అలాగే ఈ పథకాల ఫ్లెక్సీ నిధులను 10 శాతం నుంచి 25 శాతానికి పెంచాలన్న సూచనకూ పచ్చజెండా ఊపింది.
 
 దీంతో నిధులను వెచ్చించడంలో నిర్ధిష్ట లక్ష్యాన్ని అందుకోవడానికి రాష్ట్రాలకు స్వేచ్ఛ లభిస్తుంది. కేంద్రపాలిత ప్రాంతాలకు మాత్రం ఫ్లెక్సీ నిధులను 30 శాతానికి పెంచారు. సీఎంల కమిటీ మొత్తం 66 కేంద్ర పథకాలను సమీక్షించింది.