గాలె: శ్రీలంకతో ప్రారంభమైన తొలి టెస్టులో దక్షిణాఫ్రికా నిలకడగా ఆడుతోంది. టాస్ గెలిచి బ్యాటింగ్ కు దిగిన మొదటి ఆట ముగిసే సమయానికి 5 వికెట్లు కోల్పోయి 268 పరుగులు చేసింది. ఓపెనర్ డీన్ ఎల్గార్ సెంచరీ సాధించాడు. పేస్, స్పిన్ బౌలింగ్ ను సమర్థవంతంగా ఎదుర్కొన్న అతడు 187 బంతుల్లో 11 ఫోర్లు, 3 సిక్సర్లతో 103 పరుగులు చేసి అవుటయ్యాడు. టెస్టుల్లో అతడికి ఇది రెండో సెంచరీ.
 
 డూ ఫ్లెసిస్(80) అర్థ సెంచరీతో రాణించాడు. పీటర్సన్ 34, ఆమ్లా 11, డీవిలియర్స్ 21 పరుగులు చేసి అవుటయ్యారు. శ్రీలంక బౌలర్లలో లక్మాల్, పెరీరా రెండేసి వికెట్లు తీశారు. హిరాత్ ఒక వికెట్ దక్కించుకున్నాడు.


 ఆక్లాండ్ : ఆక్లాండ్‌ టెస్ట్‌లో రెండో ఇన్సింగ్స్లో న్యూజిలాండ్ 105 పరుగులకు ఆలౌట్ అయ్యింది. దీంతో 407 పరుగుల విజయలక్ష్యాన్ని భారత్ ముందు ఉంచింది. కాగా మూడో రోజు పిచ్‌ స్వభావం దారుణంగా మారిపోయింది. ఫలితంగా పదహారు వికెట్లు టప టప రాలిపోయాయి.  టీమిండియా మూడో రోజు అనూహ్య రీతిలో 202 పరుగులకు ఆలౌటైతే, ఆ తర్వాత న్యూజిలాండ్‌ రెండో ఇన్నింగ్స్లో 105 పరుగులకు కుప్ప కూలింది.
 
 టీమిండియా బ్యాట్స్‌మెన్‌ నిలదొక్కుకుంటే తప్ప ఈ పిచ్‌ మీద విజయం సాధించడం కష్ట సాధ్యమే. ఇండియా మొదటి ఇన్నింగ్స్‌లో రోహిత్‌ శర్మ 72 మినహా మిగతా వారెవరూ చెప్పుకోదగ్గ పరుగులు చేయలేదు. వాగ్నర్‌ నాలుగు వికెట్లు తీసుకుంటే, బౌల్ట్‌, సౌతీ మూడేసి వికెట్లు పడగొట్టారు. అనంతరం న్యూజిలాండ్‌ రెండో ఇన్నింగ్స్‌లో టేలర్‌ 41 పరుగులు మినహాయిస్తే ఎవరూ చెప్పుకోదగ్గ స్కోర్లు చేయలేదు. షమీ మూడు, జహీర్‌ రెండు, ఇశాంత్‌ రెండు వికెట్లు పడగొట్టారు.


 ఆక్లాండ్: న్యూజిలాండ్తో జరుగుతున్న తొలి టెస్టు మొదటి ఇన్నింగ్స్లో భారత్  202 పరుగులకు ఆలౌటయింది. దీంతో న్యూజిలాండ్కు 301 ఆధిక్యం లభించింది. కివీస్ కెప్టెన్ మెకల్లమ్ ఒక్కడే 224 పరుగులు చేయగా, ధోని సేన మాత్రం ఒక్కడు సాధించిన స్కోరు కూడా చేయలేక చతికిలపడింది.
 
 130/4 ఓవర్ నైట్ స్కోరుతో మూడో రోజు ఆట ప్రారంభించిన భారత్ కేవలం 72 పరుగులు జోడించి మిగతా వికెట్లు కోల్పోయింది. రోహిత్ శర్మ 72, ధోని 10, జహీర్ ఖాన్ 14 పరుగులు చేసి అవుటయ్యారు. జడేజా 3 పరుగులతో నాటౌట్గా మిగిలాడు. కివీస్ బౌలర్లో వాగ్నేర్ 4, బౌల్ట్ 3, సౌతీ 3 వికెట్లు పడగొట్టారు. రెండో ఇన్నింగ్స్ ప్రారంభించిన న్యూజిలాండ్ 15 పరుగులకే 4 వికెట్లు కోల్పోయింది. ఫుల్టన్(5), రూథర్‌ఫోర్డ్(0), విలియమ్సన్(3), మెకల్లమ్(0) అవుటయ్యారు.