న్యూయార్క్‌ : అది అమెరికా. మిచిగాన్‌లోని ఓ ప్రధాన రహదారి. వాయు వేగంతో వాహనాలు దూసుకుపోతున్నాయి. వాతావరణంలో తీవ్ర మార్పుల కారణంగా ప్రస్తుతం అక్కడ మంచు కూడా విపరీతంగా పడుతోంది. రోడ్లపైన అక్కడక్కడా పేరుకుపోయింది. ఇది గమనించకుండానే వేగంగా వెళుతున్న వాహనాలు అక్కడక్కడా ప్రమాదానికి గురవుతున్నాయి. ఆ క్రమంలోనే మిచిగాన్‌లోని రహదారిలో పేరుకు పోయిన మంచుకారణంగా ఓ కారు రోడ్డు ప్రమాదానికి గురికాగా దానిని తొలగించే వాహనంతో ఓ డ్రైవర్‌ అక్కడికి చేరుకున్నాడు. ప్రమాదానికి గురైన కారు దగ్గరకు వెళ్లి దానిని పరిశీలిస్తుండగానే బుల్లెట్‌కంటే వేగంగా తనవైపు మరో కారు దూసుకొచ్చింది. కళ్లుమూసి తెరిచేలోపే వేగంగా వచ్చి అప్పటికే ప్రమాదానికి గురైన కారును, అక్కడే ఉన్న తన ట్రక్కును బలంగా ఢీకొట్టడమే కాకుండా ఆ ట్రక్కుపైకి ఎక్కింది. రెప్పపాటులో అక్కడ పరిశీలనలో ఉన్న రిలీఫ్‌ ట్రక్కు డ్రైవర్‌ చావునుంచి తప్పించుకున్నాడు. ఇప్పుడు ఆ వీడియో సోషల్‌ మీడియాలో హల్ చల్‌ చేస్తోంది. మీరు కూడా ఓ లుక్కేయండి మరీ!


 కొట్టాయం: కేరళ ముఖ్యమంత్రి ఊమెన్ చాందీకి ముప్పు తప్పింది. రోడ్డు ప్రమాదం నుంచి ఆయన సురక్షితంగా బయటపడ్డారు. ఆయన ప్రయాణిస్తున్న కారు రోడ్డుపై జారిపోయింది. డ్రైవర్ నియంత్రణ కోల్పోవడంతో రోడ్డు పక్కనే ఉన్న గోతిలోకి దూసుకెళ్లింది.కొట్టాయంలో ఆదివారం తెల్లవారుజామున ఈ ఘటన చోటుసుకుంది.
 
 అయితే ఈ ప్రమాదం నుంచి ఎటువంటి గాయాలు కాకుండా ముఖ్యమంత్రి ఊమెన్ చాందీ బయటపడ్డారు. ఆయన క్షేమంగా ఉన్నారని అధికారులు వెల్లడించారు.  సీఎం గన్ మేన్ కు స్వల్ప గాయాలయ్యాయి. అతడిని సమీపంలోని ఆస్పత్రికి తరలించారు. ప్రమాదానికి గల కారణాలు వెంటనే వెల్లడికాలేదు. తాను సీటు బెల్టు పెట్టుకోవడంతో తనకు ఎటువంటి గాయాలు కాలేదని ఊమెన్ చాందీ తెలిపారు. ఎత్తుమనూర్ ప్రాంతం సమీపంలో ఈ ఘటన జరిగిందని చెప్పారు.