న్యూఢిల్లీ: రష్యాతో వాణిజ్యం చేస్తున్నదనేసాకు చూపుతూ భారత్‌పై అమెరికా అధ్యక్షుడు డొనాల్డ్‌ ట్రంప్‌ టారిఫ్‌లు విధించడంపై ఎంఐఎం చీఫ్‌ అసదుద్దీన్‌ ఒవైసీ తీవ్రంగా మండిపడ్డారు. భారత ప్రభుత్వాన్ని వేధిస్తున్న ట్రంప్‌ను ఆయన ‘బఫూన్‌ ఇన్‌ చీఫ్‌’గా అభివర్ణించారు. ‘వైట్‌ హౌస్‌లోని బఫూర్‌ ఇన్‌ చీఫ్‌ నా దేశ ప్రభుత్వాన్ని వేధిస్తుండటం విచారం కలిగిస్తోంది. ఇలాంటి బెదిరింపులకు లొంగటానికి సామంత రాజ్యం కాదు.. భారత్‌ సార్వభౌమత్వం కలిగిన దేశం అని స్పష్టం చేశారు. అత్యధిక టారిఫ్‌లతో మన ఆర్థిక వ్యవస్థకు తీరని నష్టం వాటిల్లుతుందని ఒవైసీ ఆందోళన వ్యక్తం చేశారు. ట్రంప్‌ టారిఫ్‌ల పెంపుపై ప్రధాని మోదీ మౌనంగా ఉండటాన్ని కూడా ఆయన తప్పుబట్టారు. మోదీ వైఖరి దారుణమన్నారు.


 రాజకీయ నాయకులను ఎద్దేవా చేసేందుకు వారిని బఫూన్లుగా అభివర్ణించడం కద్దు. బ్రెజిల్ రాజకీయ చరిత్రలో ఒక బఫూన్ సంచలనం సృష్టించాడు. ‘గ్రంపీ ది క్లౌన్’ అనే బఫూన్‌కు పార్లమెంటులో ఎంపీలంతా ఏం చేస్తారోననే కుతూహలం పుట్టింది. అంతే, 2010 ఎన్నికల్లో బరిలోకి దూకాడు. రాజకీయ నేతలైన మిగిలిన అభ్యర్థులంతా ఓటర్లను ఇవి చేస్తాం, అవి చేస్తాం అంటూ హామీలతో ఊదరగొడితే, గ్రంపీ మాత్రం తాను అసలేమీ చేయాలనుకోవడం లేదని ఓటర్లకు నిజాయితీగా చెప్పేశాడు. పార్లమెంటులో ఎంపీలంతా ఏం చేస్తారో తెలుసుకోవడానికి ప్రయత్నిస్తానని చెప్పాడు. బ్రెజిల్ ఓటర్లకు అతడి నిజాయితీ నచ్చినట్లుంది. ఘన విజయం కట్టబెట్టారు. అతడి సమీప ప్రత్యర్థికి లభించిన ఓట్లకు రెట్టింపు కంటే ఎక్కువగా, గ్రంపీకి ఏకంగా 13 లక్షలకు పైగా ఓట్లు వచ్చాయి.