TV
వృద్ధ జంటను కలిపిన జడ్జి
పెండింగులో ఉన్న విడాకుల అర్జీపై జిల్లా అదనపు న్యాయమూర్తి పి.సుబ్రమణ్యకుమార్ ప్రత్యేక చొరవ చూపారు.
అనంతపురం లీగల్ : కుటుంబ న్యాయస్థానంలో చాలాకాలంగా పెండింగులో ఉన్న విడాకుల అర్జీపై జిల్లా అదనపు న్యాయమూర్తి పి.సుబ్రమణ్యకుమార్ ప్రత్యేక చొరవ చూపారు. తమ బిడ్డలకు వివాహాలు కూడా చేసేసిన దంపతులు ఆ తర్వాత మనస్పర్థలకు లోనై విడాకులు కోరుతున్న విషయం తెలుసుకున్న ఆయన వారికి ప్రత్యేకంగా కౌన్సిలింగ్ ఇచ్చారు. ఫలితంగా వారిద్దరూ ఒకరినొకరు క్షమించుకుని కలిసి జీవించటానికి సమ్మతించారు.
సంతోషించిన న్యాయమూర్తి వారిద్దరికీ పట్టువస్త్రాలు సారెగా ఇచ్చారు. ఈ సందర్భంగా న్యాయమూర్తి కుటుంబ వ్యవస్థ భారతీయతకు చిహ్నమని, వివాహ ధర్మాన్ని కాపాడటం, ధర్మం ప్రకారం నడుచుకోవటం ప్రతి ఒక్కరి భాధ్యత అని చెబుతూ భావోద్వేగానికి లోనయ్యారు.
