ఉపాధ్యాయుల చేతుల్లోనే పిల్లల భవిష్యత్తు

ఉపాధ్యాయుల చేతుల్లోనే పిల్లల భవిష్యత్తు

హొసపేటె: పాఠశాలల అభివృద్ధితో సహా అవసరమైన మౌలిక సదుపాయాలను ప్రభుత్వం కల్పిస్తుంది. పిల్లలకు నాణ్యమైన విద్యను అందించే బాధ్యత ఉపాధ్యాయులపై ఉందని హోస్పేట్‌ ఎమ్మెల్యే హెచ్‌ఆర్‌ గవియప్ప తెలిపారు. శుక్రవారం నగరంలోని సాయిలీల కళ్యాణ మందిరంలో పాఠశాల విద్యాశాఖ ఆధ్వర్యంలో జిల్లా స్థాయి ఉపాధ్యాయ దినోత్సవం నిర్వహించారు. ఈ సందర్భంగా ఎమ్మెల్యే మాట్లాడుతూ.. హోస్పేట్‌ ప్రాంతంలో 2 సంవత్సరాల కాలంలో 90 పాఠశాల గదులు నిర్మించామని తెలిపారు. శిథిలావస్థలో ఉన్న 350 తరగతి గదులను పునరుద్ధరించామని వెల్లడించారు. విద్యా పురోగతికి అత్యంత ప్రాధాన్యత ఇవ్వబడిందన్నారు. అథ్లెట్లకు శిక్షణ, వసతి, టాయిలెట్‌ సౌకర్యాలు అందించడానికి నగరంలోని జిల్లా స్టేడియం సమీపంలో రూ.5 కోట్ల వ్యయంతో ఒక క్రీడా పాఠశాలను నిర్మిస్తారని తెలిపారు. జిల్లా స్టేడియం అభివృద్ధికి రూ.5 కోట్ల గ్రాంట్‌ ఇవ్వబడిందని పేర్కొన్నారు. ఈ ప్రాంతంలోని అన్ని పాఠశాలల క్రీడా మైదానాలను అభివృద్ధి చేయడానికి ఒక ప్రణాళికను రూపొందించినట్లు పేర్కొన్నారు. ఈ ప్రాంతంలో మొత్తం 117 ప్రభుత్వ పాఠశాలలు ఉన్నట్లు తెలిపారు. రాష్ట్ర స్థాయిలో ఉత్తమ ఉపాధ్యాయులు, జిల్లా స్థాయిలో ఉత్తమ ఉపాధ్యాయులతో సహా పదవీ విరమణ చేసిన ఉపాధ్యాయులను సత్కరించారు. కార్యక్రమంలో హోస్పేట్‌ అర్బన్‌ డెవలప్‌మెంట్‌ అథారిటీ చైర్మన్‌ హెచ్‌ఎన్‌ఎఫ్‌ నియాజీ, గ్యారంటీ ఇంప్లిమెంటేషన్‌ చైర్మన్‌ కే.శివమూర్తి, పాఠశాల విద్యాశాఖ డైట్‌ డిప్యూటీ డైరెక్టర్‌ జేఎం తిప్పేస్వామి, డీడీపీఐ వెంకటేష్‌ రామచంద్రప్ప, బీఈఓ శేఖరప్ప హొరపేట, ఉపాధ్యాయ సంఘాల నేతలు వివిధ పాఠశాల ఉపాధ్యాయులు తదితరులు పాల్గొన్నారు.