TV
ఏపీ టాక్స్‌ బార్‌ అధ్యక్షుడిగా రామరాజు శ్రీనివాసరావు
గుంటూరు వెస్ట్‌ : ఏపీ టాక్స్‌ బార్‌ రాష్ట్ర అధ్యక్షుడిగా గుంటూరుకు చెందిన ప్రముఖ ఆడిటర్‌ రామరాజు శ్రీనివాసరావు ఏకగ్రీవంగా ఎన్నికయ్యారని ప్రస్తుత అధ్యక్షుడు ఎం.వి.జె.కె. కుమార్‌ సోమవారం ఒక ప్రకటనలో తెలిపారు. నెల్లూరు జిల్లాలో ఈ నెల 15న జరిగిన ఎన్నికల్లో ఆయన్ను ఏకగ్రీవంగా ఎన్నుకున్నట్లు పేర్కొన్నారు. జూలై 1 నుంచి పూర్తి బాధ్యతలు స్వీకరిస్తారన్నారు. ఈ పదవిలో రెండు సంవత్సరాలు పాటు కొనసాగుతారన్నారు. 2000 పైగా ప్రాక్టీషనర్స్‌, చార్డెర్డ్‌ అక్కౌంటెంట్స్‌, న్యాయవాదులు ఈ సంస్థలో సభ్యులుగా ఉన్నారని ఆయన పేర్కొన్నారు. శ్రీనివాసరావు గతంలో ఏపీ టాక్స్‌ ప్రాక్టీషనర్స్‌, కన్సల్టెంట్స్‌ అసోసియేషన్‌ రాష్ట్ర అధ్యక్షుడిగా, ఆల్‌ ఇండియా ఫెడరేషన్‌ ఆఫ్‌ టాక్స్‌ ప్రాక్టీషనర్స్‌ ( సదరన్‌ ) చైర్మన్‌గా బాధ్యతలు నిర్వహించారన్నారు. పలు సేవా కార్యక్రమాల్లో ఆయన చురుగ్గా పాల్గొన్నారని తెలిపారు. శ్రీనివాసరావు రాష్ట్ర అధ్యక్షుడిగా ఎంపిక కావడం సంస్థకు ఎంతో ప్రయోజనమని వెల్లడించారు. ఈ సందర్భంగా ఆయనకు కోట సునీల్‌, ఏ.వి.ఎస్‌. కృష్ణ మోహన్‌, చక్ర రమణ, ఫణి కుమార్‌, సురేష్‌లతోపాటు పలువురు ఆడిటర్లు, చార్టెర్డ్‌ అక్కౌంటెంట్లు అభినందనలు తెలిపారు.
రోడ్డు ప్రమాదంలో వైద్యుడు మృతి
యువతికి తీవ్ర గాయాలు
తెనాలి రూరల్‌: రోడ్డు ప్రమాదంలో వైద్యుడు మృతి చెందగా, యువతి తీవ్ర గాయాలపాలైన ఘటన సోమవారం రాత్రి చోటు చేసుకుంది. పోలీసుల కథనం మేరకు వివరాలిలా ఉన్నాయి. పట్టణానికి చెందిన వైద్యుడు బూదాటి వెంకటేష్‌(35) తెనాలి ప్రభుత్వ వైద్యశాలలోని డయాలసిస్‌ విభాగంలో పని చేస్తున్నాడు. విజయవాడకు చెందిన స్నేహితురాలు యామినీని తెనాలి నుంచి విజయవాడకు తీసుకెళ్లేందుకు బుల్లెట్‌పై బయలుదేరారు. వీఎస్సార్‌ కళాశాల దాటగానే తెనాలి–విజయవాడ రహదారిపై ట్రాక్టర్‌ను ఓవర్‌ టేక్‌ చేసే క్రమంలో ట్రెయిలర్‌ ఢీకొని ఇద్దరూ తీవ్ర గాయాలపాలయ్యారు. తెనాలిలోని ప్రైవేటు వైద్యశాలకు ఇద్దరిని తరలించగా, వెంకటేష్‌ అప్పటికే మృతి చెందాడని వైద్యులు తెలిపారు. అపస్మారస్థితిలో ఉన్న యామినికి చికిత్స అందిస్తున్నారు. రూరల్‌ పోలీసులు ఘటనాస్థలాన్ని పరిశీలించి వివరాలు నమోదు చేసుకున్నారు. ప్రమాదానికి కారణమైన ట్రాక్టర్‌ను గుర్తించేందుకు ప్రయత్నిస్తున్నారు. కేసు నమోదు చేసి దర్యాప్తు చేస్తున్నారు.
ఏపీ టాక్స్‌ బార్‌ అధ్యక్షుడిగా రామరాజు శ్రీనివాసరావు
