ఆమోదం తెలిపిన ఖమ్మం కార్పొరేషన్‌ కౌన్సిల్‌
 
 ఖమ్మం: సుదీర్ఘకాలం తర్వాత ఖమ్మం నగర పాలక సంస్థ కౌన్సిల్‌ సమావేశం మంగళవారం జరిగింది. రూ.125 కోట్ల విలువైన 63 పనులు చేపట్టేందుకు ఆమోదం తెలిపింది. తీర్మానాలకంటే ముందు కాంగ్రెస్, సీపీఐ, సీపీఎం పక్షాలకు చెందిన కార్పొరేటర్లు ముందుగా ఖేదం తెలిపినా.. ఆ తర్వాత తీర్మానాలు చదువుతుండగా.. మౌనంగా ఉండటంతో అన్నీ ఆమోదం పొందాయి. ప్రతి డివిజన్‌కు రూ.50లక్షల చొప్పున మొత్తం రూ.26కోట్ల కేటాయింపు; సీఎం కేసీఆర్‌ ప్రకటించిన రూ.100 కోట్లకు సంబంధించిన ప్రతిపాదనల్లో గోళ్లపాడు చానల్‌ ఆధునికీకరణకు రూ.60 కోట్లు, నూతన కూరగాయల మార్కెట్‌ నిర్మాణానికి రూ.10 కోట్లు, కార్పొరేషన్‌ కార్యాలయ నిర్మాణానికి రూ.11 కోట్లు, లకారం చెరువు ఆధునికీకరణకు రూ.4కోట్లు, ప్రస్తుత షాదీఖానా మరమ్మతులు.. కొత్త షాదీఖానా నిర్మాణానికి రూ.4కోట్లు, కళానికేతన్‌ నుంచి సంభానినగర్, గాంధీచౌక్‌ రోడ్డు, డీఆర్‌డీఏ రోడ్డు అభివృద్ధికి రూ.11కోట్లు కేటాయిస్తూ తీర్మానాలను ఆమోదించింది. తీర్మానాలను ప్రవేశపెడుతున్నప్పుడు అభ్యంతరం చెప్పి, నిరసన వ్యక్తం చేసి, పోడియం ముందు బైఠాయించిన ప్రతిపక్ష సభ్యులు.. వాటికి ఆమోదం తెలిపేటప్పుడు మాత్రం మౌనంగా ఉన్నారు.
 కోఆప్షన్‌ సభ్యుల ఎన్నిక సమయంలో అందుబాటులో లేని కోఆప్షన్‌ సభ్యుడు అన్వర్‌పాషా.. ఈ సమావేశంలో ప్రమాణ స్వీకారం చేశారు. స్టాండింగ్‌ కమిటీ సభ్యులుగా చావా నారాయణరావు, కుమ్మరి ఇందిర, హనుమాన్, మాటేటి నాగేశ్వరరావు, రజియాబేగంను ఏకగ్రీవంగా ఎన్నుకున్నట్టు మేయర్‌ డాక్టర్‌ పాపాలాల్‌ ప్రకటించి, వారిని సభకు పరిచయం చేశారు.
 కౌన్సిల్‌ సమావేశం ప్రారంభమవగానే సీపీఎం కార్పొరేటర్‌ అఫ్రోజ్‌సమీనా మాట్లాడుతూ.. పారిశుద్ధ్యానికి సంబంధించి గత కౌన్సిల్‌ నిర్ణయాలను ఇప్పటివరకు అమలు చేయలేదని, కార్మికుల వేతనాల అమలులో నిర్లక్ష్యంగా వ్యవహరిస్తున్నారని విమర్శించారు. కాంగ్రెస్‌ కార్పొరేటర్‌ బాలగంగాధర్‌ తిలక్‌ మాట్లాడుతూ.. ప్రతి రోజు తాగునీరు అందిస్తామన్న హామీ అమలవడం లేదని, రెండు మూడు రోజులకోసారి నీళ్లు వస్తుండడంతో ప్రజలు ఇబ్బందులు పడుతున్నారని అన్నారు. సీపీఐ కార్పొరేటర్‌ బి.జి.క్లెమెంట్‌ మాట్లాడుతూ.. కార్పొరేషన్‌లోని ఔట్‌సోర్సింగ్‌ కార్మికులకు సరైన వేతనాలు ఇవ్వాలని డిమాండ్‌చేశారు. మరో కార్పొరేటర్‌ వడ్డెబోయిన నరసింహారావు మాట్లాడుతూ.. ఐదు నెలల తర్వాత ప్రజాసమస్యలు ప్రస్తావించేప్పుడు, తీర్మానాలు చేసేటప్పుడు సభ్యుల అభిప్రాయం తెలుసుకోవాల్సిన అవసరం ఉందన్నారు. వారిని టీఆర్‌ఎస్‌ కార్పొరేటర్లు కమర్తపు మురళి, కర్నాటి కృష్ణ తదితరులు వారించేందుకు ప్రయత్నించారు. తీర్మానాలను ప్రవేశపెట్టాలని మేయర్‌ డాక్టర్‌ పాపాలాల్‌ చెప్పడంతోనే పోడియం వద్ద ప్రతిపక్ష సభ్యులు బైఠాయించారు. ఎమ్మెల్యే పువ్వాడ అజయ్‌కుమార్‌ జోక్యం చేసుకుని, ‘‘సభను సజావుగా నడిపించేందుకు సహకరించాలి. అందరి సమస్యలను తప్పకుండా వింటారు. తీర్మానాల తర్వాత సమస్యలను చర్చించుకునే అవకాశం ఉంటుంది’’ అని నచ్చచెప్పడంతో పరిస్థితి సద్దుమణిగింది.
  


 ఇప్పుడు ఒక్క క్లిక్ తో గాంధీజీ రచనల వంద సంపుటాలు చదివెయ్యొచ్చు. ఢిల్లీలోని గాంధీజీ  పీస్ ఫౌండేషన్ ప్రాంగణంలో మహాత్మా గాంధీ రాసిన వంద సంపుటాల కలెక్షన్ ను ప్రపంచ డిజిటల్ వేదిక సహాయంతో నెట్టింట్లో పొందు పరచారు. ఈ 'ఈ వెర్షన్' ను  ఢిల్లీలో కేంద్ర మంత్రి  అరుణ్ జైట్లీ ఎలక్ట్రానిక్ ఫార్మాట్ లో  ప్రారంభించారు. ప్రపంచం నలుమూలల నుంచీ సేకరించిన మహాత్మా గాంధీ రచనలను, ఉత్తరాలను డిజిటల్ ఫార్మాట్ లోకి మలచి విజయవంతంగా పుస్తకాభిమానులకు అందుబాటులోకి తెచ్చారు.
 
 సీడబ్ల్యూ ఎంజీ సిరీస్ ఛీఫ్ ఆర్కిటెక్ట్..  ప్రొఫెసర్ కె. స్వామినాథన్ మరికొందరు సంపాదకుల బృందం  ఈ కార్యక్రమాన్ని దిగ్విజయంగా పూర్తి చేశారు. ఈ సంకలనాల  మొత్తాన్ని సేకరించేందుకు 38 సంవత్సరాలు పట్టింది. దీనిలో మొత్తం 55 వేల పేజీలను పొందుపరిచారు. సీడబ్ల్యూయమ్జీ సంపాదకీయ బృందం... మహాత్మా గాంధీకి సన్నిహితంగా ఉండే వ్యక్తులను కనుగొని వారి వద్ద ఉన్న లేఖలను, గాంధీ వారితో జరిపిన సంభాషణలను సమర్పించమని విజ్ఞప్తి చేసింది. 2005 లో  సీడబ్ల్యూయమ్జీ సంపుటాల్లో 100 ఎంట్రీలు చేసినప్పటికీ.. . కొన్ని మిస్ అవడంతో అప్పట్లో మళ్ళీ  వారి ప్రయత్నాన్ని ఉపసంహరించుకున్నారు. అనంతరం మిస్ అయిన సంపుటాలను, ఉత్తరాలను గాంధీజీ జర్మన్ స్నేహితుడు హెర్మాన్ కల్లెన్ బాక్ నుంచీ సేకరించారు. వీటిలోని లోపాలను  నిపుణుల బృందం సరిచేసి, వాటితోపాటు మిగిలిన అన్నింటిని ఐదు సంవత్సరాల్లో తప్పులను దిద్ది మొత్తం వంద వాల్యూమ్ లను పునరుద్ధరించారు.  ఈ సంపుటాలను సీడీ రూపంలో రాజ్యసభకు సమర్పించారు.
 
 ఈ... ఈ ప్రాజెక్టుకు అహ్మదాబాద్ లోని గుజరాత్ విద్యాపీఠ్ మద్దతుతో సమాచార, ప్రసారాల మంత్రిత్వ శాఖ ప్రచురణ విభాగం ప్రొఫెసర్ సుదర్శన్ అయ్యంగార్, గుజరాత్ విద్యాపీఠ్ మాజీ వైస్ ఛాన్సలర్ దీనాబెన్ పటేల్, ఓ ప్రముఖ గాంధేయ వాది, పండితుడు త్రిదీప్ సుహృద్, దర్శకుడు సబర్మతి ఆశ్రమ ప్రిజర్వేషన్, మెమోరియల్ ట్రస్ట్ నాయకత్వం వహించారు. ముగ్గురు సభ్యుల కమిటీ పర్యవేక్షణలో ఈ-వెర్షన్ ను డివిడిల రూపంలో విడుదల చేశారు.  మహాత్మాగాంధీ హెరిటేజ్ పోర్టల్ లోనూ ఇప్పుడు ఈ వంద సంపుటాలు అందుబాటులో ఉన్నాయి.