ముంబై: బలహీన వ్యాపార విధానాలే అమెరికాలో బ్యాంకింగ్‌ సంక్షోభానికి కారణమై ఉండొచ్చని ఆర్‌బీఐ గవర్నర్‌ శక్తికాంతదాస్‌ అన్నారు. ఈ నేపథ్యంలో దేశీయ బ్యాంకుల వ్యాపార విధానాలను తాము సునిశితంగా పరిశీలిస్తున్నట్టు చెప్పారు. అదే సమయంలో భారత బ్యాంకులు బలంగానే ఉన్నట్టు స్పష్టం చేశారు. అమెరికాలో ఇటీవలే సిలికాన్‌ వ్యాలీ బ్యాంకులో నిధుల సమస్య తలెత్తడం తెలిసిందే. డిపాజిటర్లలో అభద్రతకు దారితీసి, ఆ ప్రభావం ఇతర బ్యాంకులకూ విస్తరించడం తెలిసిందే. ఈ క్రమంలో శక్తికాంతదాస్‌ వ్యాఖ్యలకు ప్రాధాన్యం ఏర్పడింది. ‘‘అమెరికాలో ఇటీవలి పరిణామాలు చూస్తే అక్కడ విడిగా ఒక్కో బ్యాంకుల వారీ వ్యాపార విధానాలు సరిగ్గానే ఉన్నాయా? లేవా? అన్న ప్రశ్న తలెత్తుతోంది. భారత బ్యాంకుల వ్యాపార విధానాలను ఆర్‌బీఐ మరింత పరిశీలనగా చూడడం మొదలు పెట్టింది. ఒకవేళ లోపాలు ఉంటే అది సంక్షోభానికి దారితీయవచ్చు’’అని శక్తికాంతదాస్‌ చెప్పారు. ముంబైలో ఓ అంతర్జాతీయ సదస్సును ప్రారంభించిన సందర్భంగా దాస్‌ ఈ అంశంపై మాట్లాడారు. ‘‘బ్యాంకులు అనుసరించే వ్యాపార విధానాల వల్ల కొన్ని సందర్భాల్లో వాటి బ్యాలెన్స్‌ షీట్లలోని కొన్ని భాగాల్లో సమస్యలు ఏర్పడొచ్చు. అవి ఆ తర్వాత పెద్ద సంక్షోభానికి కారణం కావచ్చు. అమెరికా, యూరప్‌ బ్యాంకింగ్‌లో ఇటీవలి పరిణామాలు గమనిస్తే వాటి బ్యాలెన్స్‌ షీట్లలో సురక్షిత ఆస్తులు అనుకున్న వాటి నుంచే సమస్యలు ఎదురవుతున్నాయని తెలుస్తోంది’’అని దాస్‌ పేర్కొన్నారు. అమెరికాలో సిలికాన్‌ వ్యాలీ బ్యాంకు సంక్షోభానికి ఆస్తుల, అప్పుల మధ్య అసమతుల్యత వల్లేనన్న అభిప్రాయం వ్యక్తం అవుతుండడం తెలిసిందే.


 నాడున్నది బలహీన వ్యవస్థలు.. నేడవన్నీ బలోపేతమయ్యాయి
 * ఎమర్జెన్సీకి వ్యతిరేకంగా పోరాడి 19 నెలలు జైల్లో గడిపా
 * ఆర్థిక మంత్రి అరుణ్‌జైట్లీ ఎమర్జెన్సీ జ్ఞాపకాలు
 శాన్ ఫ్రాన్సిస్కో: ప్రజాస్వామ్య భారతదేశాన్ని నియంతృత్వ పాలనవైపు తీసుకువెళ్లడం ఇప్పుడున్న పరిస్థితుల్లో అసాధ్యమని కేంద్ర ఆర్థికమంత్రి అరుణ్ జైట్లీ స్పష్టం చేశారు. న్యాయవ్యవస్థ, మీడియా, పోలీసులు, అధికార వర్గం అప్పుడు బలహీనంగా ఉన్నాయని.. ఇప్పుడా పరిస్థితి లేదని అన్నారు.
 
 రాజ్యాంగంలోని కొన్ని నిబంధనలను ఉపయోగించుకుని ప్రజాస్వామ్యాన్ని నియంతృత్వంగా మార్చడం సాధ్యమవుతుందని.. అలాంటి పరిస్థితుల్లో మీడియా, న్యాయవ్యవస్థ సహా అన్ని వ్యవస్థలు కుప్పకూలుతాయని ఎమర్జెన్సీ రుజువు చేసిందని పేర్కొన్నారు. విద్యార్థి నేతగా 1975 నాటి అత్యవసర పరిస్థితిని వ్యతిరేకించి  19 నెలల పాటు జైల్లో గడిపిన జైట్లీ.. నాటి జ్ఞాపకాలను బుధవారం పీటీఐతో పంచుకున్నారు. ఇంటర్వ్యూ ముఖ్యాంశాలు..
 ♦ 40 ఏళ్ల క్రితం నాటి ప్రధాని ఇందిర దేశంలో ఎమర్జెన్సీ విధించినప్పటి పరిస్థితులు వేరు. అప్పుడు మీడియా దుర్బలంగా ఉంది. పోలీసులు, అధికారులు కీలుబొమ్మలు. సుప్రీంకోర్టుకు కూడా ఎమర్జెన్సీ ఒక చీకటి అధ్యాయం. ఆ పరిస్థితిని మళ్లీ పునఃసృష్టించడం సాధ్యమా? నాకైతే అనుమానమే.
 ♦ ఎమర్జెన్సీ సమయంలోనే నేను ఢిల్లీ వర్సిటీలో విద్యార్థి నేతను. 1975, జూన్ 25 రాత్రి పోలీసులు నన్ను అరెస్ట్ చేసేందుకు మా ఇంటికి వచ్చారు. మా నాన్న వారితో మాట్లాడుతుండగానే నేను తప్పించుకుని ఓ స్నేహితుడి ఇంటికి వెళ్లాను. ఆ మర్నాడు నిరసన ప్రదర్శన నిర్వహించాం. ఎమర్జెన్సీకి వ్యతిరేకంగా నిర్వహించిన మొదటి ధర్నా అది. అక్కడే నన్ను పోలీసులు అదుపులోకి తీసుకున్నారు. నాపై మీసా కింద కేసు పెట్టారు. 19 నెలలు జైల్లో ఉన్నాను.
 ♦ ఆ సమయంలో వేలాది మందిని అక్రమంగా అరెస్ట్ చేశారు. లక్షలాది మందిపై డిటెన్షన్ ఆర్డర్లు జారీ అయ్యాయి. అక్రమ కేసులు పెట్టబోమని ఏ ఒక్క పోలీసు, అక్రమంగా డిటెన్షన్ ఆర్డర్లు ఇవ్వబోమని ఏ ఒక్క కలెక్టరు ధైర్యంగా చెప్పలేని పరిస్థితి. ది ఇండియన్ ఎక్స్‌ప్రెస్, ద స్టేట్స్‌మేన్ మినహా పత్రికలన్నీ నియంతృత్వానికి దాసోహమన్నాయి.