భారత యువ క్రికెట్‌ జట్టు టీ–20 అండర్‌– 19 మహిళల ప్రపంచకప్‌ను గెలుచుకుని చరిత్ర సృష్టించింది. ఈ విజయంలో విశాఖకు చెందిన పేస్‌ బౌలర్‌ షబ్నమ్‌ కీలక పాత్ర పోషించింది. షబ్నమ్‌ తన అద్భుతమైన బౌలింగ్‌తో ప్రత్యర్థులను కట్టడి చేసింది. కీలకమైన ఫైనల్‌ మ్యాచ్‌లో ఆమె కచ్చితమైన లైన్‌, లెంగ్త్‌ బంతులు విసిరి బ్యాటర్లను ఇబ్బంది పెట్టింది. ఎనిమిదేళ్ల ప్రాయంలో సరదాగా తండ్రితో రన్నింగ్‌ చేయడానికి వెళ్తూ అక్కడ క్రికెట్‌ ఆడుతున్న అమ్మాయిల్ని చూసింది షబ్నమ్‌. అలా క్రికెట్‌పై మక్కువ పెంచుకుంది. ఆమె తండ్రి షకీల్‌ క్రికెట్‌ ఆటగాడు కావడంతో.. షబ్నమ్‌ ఆసక్తిని గమనించి ఆటలో ప్రాథమిక మెళకువలు నేర్పించారు. అనంతరం జాతీయ క్రికెట్‌ అకాడమీలో మెళకువలు తోడవడంతో అంతర్జాతీయ స్థాయిలో చెలరేగే బంతులేసే స్థాయికి ఎదిగింది. కెరీర్‌ ప్రారంభించి పదేళ్లలోనే జాతీయ అండర్‌–19 జట్టులో స్థానం సంపాదించిన షబ్నమ్‌.. భారత్‌ పర్యటనలో భాగంగా న్యూజిలాండ్‌ మహిళా అండర్‌–19 జట్టు సిరీస్‌లో తొలి అంతర్జాతీయ మ్యాచ్‌ ఆడింది. నేడు మహిళల టీ–20 అండర్‌ 19 వరల్డ్‌కప్‌ను రెండోసారి భారత్‌ జట్టు అందుకోగా.. రెండుసార్లు విశాఖకు చెందిన షబ్నమ్‌ పేస్‌తో బెంబేలెత్తించిన పాత్ర గర్వించదగ్గది.క్వాడ్రేంగులర్‌ సిరీస్‌లో భాగంగా శ్రీలంక, వెస్టిండీస్‌తో తలపడిన భారత్‌ బి జట్టు తరఫున రెండు మ్యాచ్‌లు ఆడింది. అనంతరం టీ–20 భారత్‌ మహిళా అండర్‌–19 జట్టు తరఫున ఆడే అవకాశం దక్కింది. 2023 అండర్‌ 19 మహిళల టీ–20 వరల్డ్‌కప్‌లో మూడు మ్యాచ్‌లకే పరిమితమైనా.. అప్పుడు లభించిన అనుభవాన్ని తాజా వరల్డ్‌కప్‌లో చూపించింది. కోలాలంపూర్‌లో జరిగిన వరల్డ్‌కప్‌లో అన్ని మ్యాచ్‌ల్లోనూ ఆడి నాలుగు కీలక వికెట్లు తీసింది. ఫైనల్‌లో దక్షిణాఫ్రికా ఓపెనర్‌ను నిలదొక్కుకోనివ్వకుండా పెవిలియన్‌కు పంపడంతో పాటు జట్టును తక్కువ స్కోర్‌కే పరిమితం చేయడంలో కీలకపాత్ర పోషించింది. ‘అండర్‌–19 మహిళా జట్టుకు ఎంపిక కాగానే నేషనల్‌ క్రికెట్‌ అకాడమీలో పేస్‌కు మరింత వేగం పెంచుకునే విధంగా శిక్షణ పొందాను. ఐసీసీ ట్రోఫీని జట్టు అందుకోవడంలో తోటి క్రీడాకారిణుల సహకారంతో నా వంతు పాత్ర పోషించాను.’అని షబ్నమ్‌ తెలిపింది.2019లో జిల్లాకు ప్రాతినిధ్యంశిక్షణ శిబిరంలో నేర్చుకున్న ఆటతో 2019లో అండర్‌–16లో జిల్లాకు ప్రాతినిధ్యం వహించే స్థాయికి షబ్నమ్‌ చేరుకుంది. వేసవి శిబిరాల్లో జట్టుగా ఆడేటప్పుడే పేస్‌ బౌలింగ్‌ వైపు ఆసక్తి పెరిగి పేస్‌లో వేరియేషన్స్‌తో జట్టుకు కీలకంగా మారింది. కరోనాతో శిక్షణ, పోటీలకు బ్రేక్‌ వచ్చింది. తిరిగి 2022లో పోటీలు ప్రారంభం కావడంతో దేశవాళీ క్రికెట్‌లో అన్ని ఫార్మాట్లలో ఆడింది. చాలెంజర్‌ ట్రోఫీతో పాటు స్కూల్‌ గేమ్స్‌ నేషనల్స్‌ అండర్‌–17 జట్టుకు ఆడింది.

పట్నా: భారత క్రికెట్‌ నియంత్రణ మండలి (బీసీసీఐ) ఆధ్వర్యంలో జరుగుతున్న కూచ్‌ బెహార్‌ ట్రోఫీ అండర్‌–19 క్రికెట్‌ టోర్నమెంట్‌లో బిహార్‌ ఎడంచేతి వాటం స్పిన్నర్‌ సుమన్‌ కుమార్‌ అద్భుతం చేశాడు. రాజస్తాన్‌తో ఇక్కడి మొయిన్‌ ఉల్‌ హఖ్‌ స్టేడియంలో ఆదివారం ముగిసిన మ్యాచ్‌లో 18 ఏళ్ల సుమన్‌ ఒకే ఇన్నింగ్స్‌లో 10కి 10 వికెట్లు తీసుకున్నాడు. సుమన్‌ 33.5 ఓవర్లలో 20 మెయిడెన్లు వేసి 53 పరుగులిచ్చి 10 వికెట్లు పడగొట్టాడు. సుమన్‌ ధాటికి రాజస్తాన్‌ తొలి ఇన్నింగ్స్‌లో 75.5 ఓవర్లలో 182 పరుగులకు ఆలౌటైంది. బిహార్‌ జట్టు తొలి ఇన్నింగ్స్‌లో 467 పరుగులకు ఆలౌటైంది. 285 పరుగుల తొలి ఇన్నింగ్స్‌ ఆధిక్యం సంపాదించిన బిహార్‌ జట్టు రాజస్తాన్‌ను ఫాలోఆన్‌ ఆడించింది. రెండో ఇన్నింగ్స్‌లో రాజస్తాన్‌ జట్టు బ్యాటర్లు అద్భుతంగా ఆడారు. మొత్తం 137.5 ఓవర్లలో రాజస్తాన్‌ జట్టు 5 వికెట్లు కోల్పోయి 410 పరుగులు చేయడంతో మ్యాచ్‌ ‘డ్రా’గా ముగిసింది.కూచ్‌ బెహార్‌ ట్రోఫీ చరిత్రలో ఇన్నింగ్స్‌లో 10కి 10 వికెట్లు తీసిన మూడో బౌలర్‌గా సుమన్‌ కుమార్‌ గుర్తింపు పొందాడు. గతంలో ఆంధ్ర బౌలర్‌ మెహబూబ్‌ బాషా (2010లో త్రిపురపై 44 పరుగులకు 10 వికెట్లు), మణిపూర్‌ పేస్‌ బౌలర్‌ రెక్స్‌ రాజ్‌కుమార్‌ సింగ్‌ (2018లో అరుణాచల్‌ ప్రదేశ్‌పై 11 పరుగులకు 10 వికెట్లు) ఈ ఘనత సాధించారు.


  
  వెంకటగిరి: పట్టణంలోని  తారకరామా క్రీడాప్రాంగణంలో అండర్‌ –19 అంతర జిల్లాల ప్లేట్‌ క్రికెట్‌ మ్యాచ్‌లు బుధవారం ప్రారంభమయ్యాయి. ఈ సందర్భంగా నిర్వాహకులు మాట్లాడుతూ కృష్ణా, కర్నూలు, తూర్పుగోదావరి, ప్రకాశం జిల్లాల మధ్యన పది రోజుల పాటు మ్యాచ్‌లు నిర్వహించనున్నట్లు తెలిపారు. పోటీలు త్రీడే మ్యాచ్‌లుగా ఉంటాయని వివరించారు.
 హోరాహోరీగా పోటీలు  
 అండర్‌ –19 అంతర్‌ జిల్లాల క్రికెట్‌ పోటీలు హోరాహోరీగా సాగుతున్నారు. తొలుత కర్నూలు–తూర్పుగోదావరి జట్ల మధ్యన పోటీ మొదలవగా కర్నూలు జట్టు టాస్‌ గెలిచి బ్యాటింగ్‌ ఎంచుకుంది. 39.3 ఓవర్లలో 96 పరుగులకు ఆలౌటైంది. కర్నూలు జిల్లా జట్టు క్రీడాకారుడు యాదేష్‌ అత్యధికంగా 101 పరుగులు సాధించాడు. అనంతరం బ్యాటింగ్‌కు దిగిన తూర్పుగోదావరి జట్టు ఆటముగిసే సమయానికి 48 ఓవర్లలో నాలుగు వికెట్ల నష్టానికి 152 పరుగులు చేసింది. అలాగే కృష్ణా–ప్రకాశం జట్ల మధ్యన జరిగిన పోరులో తొలుత టాస్‌ గెలిచి బ్యాటింగ్‌ ఎంచుకున్న కృష్ణా జట్టు  68 ఓవర్లలో 171 పరుగులు చేసి ఆలౌట్‌ అయింది. కౌశిక్‌ అత్యధికంగా 64 పరుగులు చేశాడు. అనంతరం బ్యాటింగ్‌కు దిగిన ప్రకాశం జిల్లా జట్టు ఆటముగిసే సమయానికి 2 వికెట్ల నష్టానికి 102 పరుగులు చేసింది. గురువారం మ్యాచ్‌లను కొనసాగించనున్నారు.


 కడప స్పోర్ట్స్‌ :
  కడప నగరంలోని కేఎస్‌ఆర్‌ఎం, కేఓఆర్‌ఎం క్రీడామైదానాల్లో బుధవారం అంతర్‌ జిల్లాల అండర్‌–19 ఎలైట్‌ గ్రూపు క్రికెట్‌ మ్యాచ్‌లు ప్రారంభమయ్యాయి. ఈనెల 27 నుంచి ఆగస్టు 6వ తేదీ వరకు నిర్వహించే ఈ పోటీల్లో వివిధ జిల్లాల జట్లు తలపడనున్నాయి. కేఎస్‌ఆర్‌ఎం క్రీడామైదానంలో అనంతపురం, గుంటూరు జట్ల తలపడ్డాయి. టాస్‌ గెలిచిన అనంతపురం జట్టు బ్యాటింగ్‌ ఎంచుకుంది. 90 ఓవర్లలో 8 వికెట్లు కోల్పోయి 381 పరుగుల భారీస్కోరు చేసింది. జట్టులోని మహబూబ్‌పీరా 1 సిక్స్‌ర్, 14 ఫోర్లతో 109 పరుగులు చేశాడు. ఈయనకు జతగా గిరినాథరెడ్డి 81, షకీర్‌ 46, ఖాదర్‌వల్లి 44 పరుగులు చేశారు. గుంటూరు బౌలర్లు సీహెచ్‌ మణికంఠస్వామి 2, మహీప్‌కుమార్‌ 2, హుస్సేన్‌ 2 వికెట్లు తీశారు. దీంతో తొలిరోజు ఆటముగిసింది.
 కడపపై విశాఖ జట్టు ఆధిక్యం..
 కేఓఆర్‌ఎం క్రీడామైదానంలో విశాఖపట్టణం, కడప జట్లు తలపడ్డాయి. టాస్‌ గెలిచిన విశాఖ జట్టు 38.2 ఓవర్లలో 112 పరుగులకు ఆలౌట్‌ అయింది. జట్టులోని శరణ్‌తేజ 34, వంశీకష్ణ 23 పరుగులు చేశారు. కడప బౌలర్లు భరద్వాజ్‌ 3, హరిశంకర్‌రెడ్డి 3 వికెట్లు తీశారు. అనంతరం తొలి ఇన్నింగ్స్‌ ప్రారంభించిన కడప జట్టు 34 ఓవర్లలో 69 పరుగులకే ఆలౌట్‌ అయింది. జట్టులోని సాయిసుధీర్‌ 31, నూర్‌బాషా 11 పరుగులు చేశారు. విశాఖ బౌలర్లు ప్రశాంత్‌ 2, అజయ్‌ 3 వికెట్లు తీశారు. అనంతరం రెండవ ఇన్నింగ్స్‌ ప్రారంభించిన విశాఖ జట్టు తొలిరోజు ఆట ముగిసే సమయానికి 10 ఓవర్లలో 1 వికెట్‌ కోల్పోయి 32 పరుగులు చేసింది. జట్టులోని జోగేష్‌ 20, శరణ్‌తేజ 8 పరుగులతో క్రీజులో ఉన్నారు. దీంతో తొలిరోజు ఆటముగిసింది.