ఫ్రెంచ్ ఓపెన్ సూపర్ సిరీస్ టోర్నీ
 పారిస్: ప్రపంచ చాంపియన్‌షిప్‌లో రజత పతకం సాధించిన తర్వాత పాల్గొన్న మూడో టోర్నమెంట్‌లోనూ భారత బ్యాడ్మింటన్ స్టార్ సైనా నెహ్వాల్‌కు నిరాశ ఎదురైంది. జపాన్ ఓపెన్‌లో, డెన్మార్క్ ఓపెన్‌లో రెండో రౌండ్‌లోనే ఇంటిదారి పట్టిన ఈ హైదరాబాద్ అమ్మాయి తాజాగా ఫ్రెంచ్ ఓపెన్ సూపర్ సిరీస్‌లో క్వార్టర్ ఫైనల్ అడ్డంకిని దాటలేకపోయింది. శుక్రవారం జరిగిన మహిళల సింగిల్స్ క్వార్టర్ ఫైనల్లో టాప్ సీడ్ సైనా 9-21, 15-21తో ప్రపంచ మాజీ చాంపియన్ ఇంతనోన్ రత్చనోక్ (థాయ్‌లాండ్) చేతిలో ఓడిపోయింది.
  
 కశ్యప్ రెండు నెలలు దూరం
 మరోవైపు పురుషుల సింగిల్స్ విభాగంలో పారుపల్లి కశ్యప్, ప్రణయ్, అజయ్ జయరామ్ ప్రిక్వార్టర్ ఫైనల్లో ఓడిపోయారు. రాజీవ్ ఉసెఫ్ (ఇంగ్లండ్)తో జరిగిన మ్యాచ్‌లో కశ్యప్ స్కోరు 11-21, 21-13. 2-4 వద్ద గాయం కారణంగా వైదొలిగాడు. కాలి పిక్కలో గాయం కారణంగా కశ్యప్ రెండు నెలలపాటు ఆటకు దూరమయ్యాడు. ఇతర మ్యాచ్‌ల్లో ప్రణయ్ 15-21, 8-21తో ఎన్‌జి కా లాంగ్ అంగుస్ (హాంకాంగ్) చేతిలో, అజయ్ జయరామ్ 18-21, 8-21తో తియాన్ హువీ (చైనా) చేతిలో ఓటమి చవిచూశారు.