సిస్టరాఫ్ డిస్కోశాంతి
 ‘నాపేరు సుచిత్రా ఆనందన్’ అని పరిచయం చేసుకునే ఆమెని చూస్తే నిన్నటి తరం ఐటమ్ బాంబ్ డిస్కో శాంతి చెల్లెలు అని చెబితే నమ్మడం అంత సులభం కాదు. జఫా, రుషి లాంటి సినిమాల ద్వారా ఇప్పుడిప్పుడే తెరపై మెరుస్తోన్న ఈ డస్కీ బ్యూటీ రియల్ స్టార్ శ్రీహరికి స్వయానా మరదలు అనే విషయం చాలా మందికి తెలియదు. ఓ రెస్టారెంట్ ప్రారంభానికి వచ్చిన ఈ బ్లాక్ బ్యూటీని సిటీప్లస్ పలకరించింది. ఈ సందర్భంగా సుచిత్ర  చెప్పిన సంగతులు ఆమె మాటల్లోనే..    - సత్యబాబు
  
 మాది పూర్తిగా సినీ నేపథ్యం ఉన్న కుటుంబం అనేది తెలిసిందే కదా. నాన్న, ఇద్దరు అక్కలు.. ఇలా ఇంట్లో అంతా సినీనటులే. ఏడుగురు తోబుట్టువుల్లో ముగ్గురు ఆడపిల్లలం ఉన్నాం. నేను చివరి దాన్ని. మాస్ కమ్యూనికేషన్స్‌లో మాస్టర్స్ చేశాను. సినీరంగంపై ఎప్పుడూ ఆసక్తి లేదు. జర్నలిస్ట్ కావాలనుకున్నా. అయితే నా కలర్ నచ్చిన ఓ డీజే ఫ్రెండ్  ఫొటోగ్రాఫర్‌కి పరిచయం చేయడం, నేను మోడల్‌గా మారడం జరిగిపోయాయి. అలా పూణెలో చదువుతున్నప్పుడే, కాలేజ్ డేస్‌లోనే మోడల్‌నయ్యాను. చెన్నైలో వందకు పైగా మోడలింగ్ అసైన్‌మెంట్స్‌లో పాల్గొన్నాను. చెట్టినాడ్ శారీస్ వంటివి బాగా పేరు తెచ్చాయి. అయితే సినిమా రంగంలో ఈ కలర్‌కి ఇంకా అంత క్రేజ్ రాలేదనుకోండి.
  
 సిస్టర్ ఒప్పుకోలేదు..
 నేను సినిమాల్లోకి రావడం శాంతికి మొదట్లో ఇష్టం లేదు. ఎందుకంటే మా ఇంట్లో ఆడపిల్లలు ఎవరూ టెన్త్ క్లాస్ దాటలేదు. అందుకే అందరూ నేను చదవాలని కోరుకున్నారు. నేను డిగ్రీ పూర్తి చేసిన తర్వాత ఓకే అంది. చిన్నప్పుడు కొంతకాలం భరతనాట్యం నేర్చుకున్నా గానీ అక్క అంత మంచి డ్యాన్సర్‌ని కాదు.
 
 నిజానికి అక్కలా డ్యాన్స్ చేయాలంటే బాబోయ్.. చాలా కష్టం. అప్పట్లో అమీర్‌పేటలో అక్క డ్యాన్స్ స్కూల్ పెట్టింది కదా అప్పుడు కొన్ని నెలలు తన దగ్గర ట్రైనింగ్ అయ్యా. అయితే ఇటీవల కన్నడ సినిమా గణపలో ఐటమ్ సాంగ్ చేస్తే మంచి రెస్పాన్స్ వచ్చింది. మంచి ఆఫర్లు వస్తే ఐటమ్ సాంగ్స్ చేయడానికీ అభ్యంతరం లేదు.
  
 అక్కకి తోడుగా..
 ఎంతో ప్రేమించే భర్తను కోల్పోయిన అక్కకు ధైర్యం చెప్పేందుకు మా కుటుంబం అంతా చెన్నై నుంచి వచ్చేశాం. తనతోనే ఉంటున్నాం. ఇక్కడ ఏమైనా ఇబ్బంది కలిగించే జ్ఞాపకాలు గుర్తొస్తే చెన్నై తీసుకెళ్తున్నాం. తనకు తోడుగా ఉండాలనే కోరికతోనే సినిమా ఆఫర్లపై ఇప్పటిదాకా సీరియస్‌గా ఆలోచించలేదు.
 
 ఇక దృష్టి పెట్టాలి. జనవరిలో నేను నటించే తమిళ సినిమా ప్రారంభం అవుతోంది. నాగార్జున, కమల్, అర్జున్ వంటి సీనియర్ హీరోలతో నటించాలని ఉంది. అక్క కొడుకులు శశాంక్, మేఘాంశ్ చాలా కష్టపడుతున్నారు. సినిమాల్లో తమను తాము నిరూపించుకునేందుకు సిద్ధమవుతున్నారు. శశాంక్ ఆప్పుడే షార్ట్ ఫిల్మ్స్ కూడా తీస్తున్నాడు. వారిద్దరూ బావ పేరు నిలబెడతారనే విషయంలో సందేహం లేదు.


 ‘చలికాలం కదూ... స్కిన్ కేర్ విషయంలో జాగ్రత్తగా ఉంటాను. మాయిశ్చరైజర్స్ బాగా యూజ్ చేస్తాను’ అంటూ చెప్పింది అప్‌కమింగ్ అందాల తార నిఖితా నారాయణ్. గచ్చిబౌలిలోని విప్రోలేక్ సమీపంలో గురువారం బార్బెక్యూ నేషన్ రెస్టారెంట్ ప్రారంభోత్సవంలో మరో నటి సుచిత్రాఆనందన్‌తో మెరిసిన నిఖిత... చలికాలంలో పాటించాల్సిన టిప్స్‌ని ‘సిటీ ప్లస్’తో పంచుకుంది. సిటీలో వెదర్ బాగా కూల్‌గా ఉందంటూ... ఇలాంటి సీజన్‌లో చాలా మంది నీళ్లు తాగడం మానేస్తారని, అయితే అది సరికాదంది.
  
  నీళ్లు సరిపడనంత తాగకపోతే అది స్కిన్‌పై ప్రభావం చూపుతుందని చెప్పింది. చల్లని వెదర్‌లో హాట్ కాఫీ తాగుతుంటే ఆ మజాయే వేరంటున్న ఈ కన్నడ సుందరి... వైన్‌లూ, విస్కీలకు తాను చాలా దూరం అంది. వైన్ టేస్ట్ చేయవచ్చని ఇంట్లోవాళ్లే ప్రోత్సహించినా... తనకు ఆ టేస్ట్ నచ్చలేదంది. పైగా తనలాంటి లో బీపీ పేషెంట్స్‌కి అవి న ప్పవు కూడా అంటూ నవ్వేసింది. మన సంప్రదాయ ఆహారంలోనే సీజనల్ సమస్యలకు సమాధానాలు లభిస్తాయని, ఈ సీజన్‌లో ఇంటి వంటకాల్లో పెప్పర్ వంటివి విరివిగా వినియోగిస్తారని మీకు తెలుసు కదా అంటూ ఉదహరించింది.
  
  గ్రిల్డ్ ఫుడ్ అంటే ఎంతో ఇష్టమన్న నిఖిత... బార్బెక్యూ గచ్చిబౌలిలో ప్రారంభించడంతో తను ఉంటున్న చోటుకి అది చాలా దగ్గరగా ఉందంటూ సరదా పడిపోయింది. బాయ్‌ఫ్రెండ్ గురించి అడిగితే... ఇండస్ట్రీకి వచ్చి రెండేళ్లే అయిందనీ, అప్పుడే అలాంటివి అడిగితే ఎలా? అని చిన్నబుచ్చుకుంది. అంతకీ కావాలంటే మీరే ఎవరితోనైనా ముడిపెట్టేయండంటూ చమత్కరించిందీ మాజీ మిస్ హైదరాబాద్.