సాక్షి, హైదరాబాద్: సెంట్రల్ జోన్ జాతీయ ర్యాంకింగ్ టేబుల్ టెన్నిస్ (టీటీ) చాంపియన్‌షిప్‌లో హైదరాబాద్ అమ్మాయి నైనా జైస్వాల్ విజేతగా నిలిచింది. గుజరాత్‌లో జరుగుతున్న ఈ పోటీల్లో నైనా సబ్ జూనియర్ బాలికల సింగిల్స్ విభాగంలో టైటిల్ దక్కించుకుంది.
  
  
   ఫైనల్లో ఆమె 11-4, 11-6, 11-7, 11-5తో ఐశ్వర్య పాఠక్ (ఉత్తరప్రదేశ్)పై గెలిచింది. 2011, 2012లలో కూడా జాతీయ సబ్ జూనియర్ టైటిల్స్ నెగ్గిన నైనా తాజా విజయంతో ‘హ్యాట్రిక్’ నమోదు చేసింది. ఈ క్రమంలో ఆంధ్రప్రదేశ్ నుంచి ఈ ఘనత సాధించిన తొలి క్రీడాకారిణిగా గుర్తింపు పొందింది.