ఓ జిల్లా కలెక్టర్‌ను పట్టుకుని మీరు హీరోయిన్‌లా ఉన్నారని, కానీ ఇంతకు ముందెప్పుడు తెరమీద నటిస్తుండగా చూడలేదన్న ఎమ్మెల్యేపై పోలీసులు ఎఫ్ఐఆర్ నమోదు చేశారు. ఛత్తీస్‌గఢ్ బీజేపీ ప్రభుత్వానికి వ్యతిరేకంగా కాంగ్రెస్ పార్టీ నిర్వహిస్తున్న ఆందోళనలో.. కాంగ్రెస్ ఎమ్మెల్యే అమర్ జీత్ భగత్ మాట్లాడారు. సర్‌గుజా జిల్లా కలెక్టర్ రితూ సేన్‌ను చూసి, ఆమె చాలా అందంగా ఉందని, హీరోయిన్‌లా ఉందిగానీ ఆమె నటించడం తానెప్పుడూ చూడలేదని అన్నారు.
 
 అంతటితో ఆగకుంగా.. తన 48 ఏళ్ల జీవితంలో విద్యాశాఖ మంత్రి కేదార్ కశ్యప్ లాంటి పిచ్చివాడిని చూడలేదని అన్నారు. సీతాపూర్ నియోజకవర్గం నుంచి గెలుపొందిన భగత్ వ్యాఖ్యలు సోషల్ మీడియాలో దుమారం రేపుతున్నాయి. దీంతో స్పందించిన బీజేపీ కార్యకర్తలు ఆయనపై పోలీసులకు ఫిర్యాదు చేశారు. రోడ్డుపై ట్రాఫిక్‌ను అడ్డగించడం, తప్పుడు వ్యాఖ్యలు చేయడంపై కేసు నమోదు చేసి దర్యాప్తు చేస్తున్నట్లు పోలీసులు వివరించారు.


 ఇళ్లలో ప్లాస్టిక్ కుర్చీలు, బకెట్లు, మగ్గులు.. ఇలా అనేక ప్లాస్టిక్ వస్తువులుంటాయి. అవి విరిగిపోయినప్పుడు ఏం చేయాలో తెలియక చెత్తలో పారేస్తుంటాం. ఇలాంటి ప్లాస్టిక్ వ్యర్థాలతో పర్యావరణానికి పెను ముప్పు పొంచి ఉంటుందని పర్యావరణ వేత్తలు, శాస్త్రవేత్తలు ఎప్పటినుంచో హెచ్చరిస్తున్నారు. ఈ వ్యర్థాలకు కూడా ఓ అర్థం కల్పించాలని ఛత్తీస్గఢ్లోని సుర్గుజా జిల్లా అధికారులు భావించారు. ఇందుకోసం ఇంటింటికీ సిబ్బందిని తిప్పి, ఇళ్లలో పనికిరాని, విరిగిపోయిన ప్లాస్టిక్ వస్తువులన్నింటినీ సేకరించారు. వాటిని కరిగించి గ్రాన్యూల్స్గా మార్చారు. అలా ఒకటి కాదు, రెండు కాదు.. ఏకంగా 3 క్వింటాళ్ల గ్రాన్యూల్స్ను ఇప్పటివరకు సిద్ధం చేశారు. వీటిని ఉపయోగించి అంబికాపూర్కు సమీపంలోని భగవాన్పూర్ ప్రాంతంలో 400 మీటర్ల పొడవైన రేడియల్ రోడ్డును రూపొందిస్తున్నారు.
 
 ఈ ఆలోచన ఆ జిల్లా కలెక్టర్ రీతు సేన్కు వచ్చింది. 2003 బ్యాచ్ ఐఏఎస్ అధికారిణి అయిన ఆమె, ముందుగా ఈ నగరాన్ని ప్లాస్టిక్ రహితంగా తీర్చిదిద్దాలని భావించారు. అందుకోసం ఏం చేయాలా అని ఆలోచించి.. చివరకు రోడ్డు వేస్తే బాగుంటుందని అనుకున్నారు. దీనిపై మరిన్ని వివరాలు సేకరించగా.. తారు రోడ్ల కంటే ప్లాస్టిక్ రోడ్లే మరింత నాణ్యంగా, మన్నికగా ఉంటాయని తెలిసింది. అంతే, వెంటనే ప్రజలకు అవగాహన కలిగించి, వారి వద్ద ఉన్న ప్లాస్టిక్ వ్యర్థాలను సేకరించి, రోడ్డు వేయించడానికి సిద్ధమైపోయారు. అక్కడ ప్లాస్టిక్ రోడ్డు వచ్చిందంటే.. ఇతర రాష్ట్రాలు కూడా దాన్ని ఆదర్శంగా తీసుకుని అటు కాలుష్యం నుంచి విముక్తి పొందడంతోపాటు, ఇటు రోడ్డు నిర్వహణ వ్యయాన్ని కూడా గణనీయంగా తగ్గించుకోవచ్చు.