తిరువనంతపురం: కాంగ్రెస్ ఉపాధ్యక్షుడు రాహుల్ గాంధీ ప్రయాణిస్తున్న కారులో పెట్రోల్ అయిపోవడంతో దాని డ్రైవర్ హుటాహుటిన బంకుకు తరలించిన ఘటన ఇక్కడ జరిగింది. భద్రతా వైఫల్యంగా పరిగణిస్తున్న ఈ ఘటన వివరాలు.. కేరళ యువజన కాంగ్రెస్ ఆధ్వర్యంలో సోమవారం ఇక్కడ జరిగిన ‘కేరళ యాత్ర’లో రాహుల్ పాల్గొన్నారు. యాత్ర ముగిసిన తర్వాత హోం మంత్రి రమేష్ చెన్నితలతో కలిసి రాహుల్ తన అధికారిక కారులో విమానాశ్రయానికి బయల్దేరారు. ఈ క్రమంలో అలప్పుఝా సమీపంలోని మాన్‌కొంబు ప్రాంతానికి చేరుకునే సరికి కారులో పెట్రోలు అయిపోయింది. దీంతో డ్రైవర్ కారును సమీపంలోని బంకుకు తరలించి ఇంధనాన్ని నింపారు.