న్యూఢిల్లీ: సాఫ్ట్‌వేర్‌ సేవల దిగ్గజం ఇన్ఫోసిస్‌ ప్రస్తుత ఆర్థిక సంవత్సరం(2024–25) తొలి త్రైమాసికంలో ఆసక్తికర ఫలితాలు ప్రకటించింది. కన్సాలిడేటెడ్‌ ప్రాతిపదికన ఏప్రిల్‌–జూన్‌(క్యూ1)లో నికర లాభం 7 శాతం పుంజుకుని రూ. 6,368 కోట్లను తాకింది. గతేడాది(2023–24) ఇదే కాలంలో రూ. 5,945 కోట్లు ఆర్జించింది. అయితే త్రైమాసిక(క్యూ4)వారీగా చూస్తే నికర లాభం రూ. 7,969 కోట్ల నుంచి 20 శాతం క్షీణించింది. మొత్తం ఆదాయం 3.6 శాతం మెరుగుపడి రూ. 39,315 కోట్లకు చేరింది. గత క్యూ1లో రూ. 37,933 కోట్ల టర్నోవర్‌ సాధించింది. ప్రస్తుత ఆరి్థక సంవత్సరాన్ని ప్రోత్సాహకరంగా ప్రారంభించిననట్లు ఇన్ఫోసిస్‌ సీఈవో సలీల్‌ పరేఖ్‌ పేర్కొన్నారు. మెరుగైన మార్జిన్లు, భారీ డీల్స్, రికార్డ్‌ నగదు ఆర్జనను సాధించినట్లు తెలియజేశారు. ఈ షేరు బీఎస్‌ఈలో 2% ఎగసి రూ. 1,759 వద్ద ముగిసింది. 3–4 శాతం వృద్ధి తాజా త్రైమాసికంలో ఇన్ఫోసిస్‌ నిర్వహణ లాభ మార్జిన్లు 0.3 శాతం బలపడి 21.1 శాతంగా నమోదయ్యాయి. పూర్తి ఏడాదికి 20–22 శాతం మార్జిన్లు సాధించగలమని అంచనా వేస్తోంది. పూర్తి ఏడాదికి ఆదాయంలో నిలకడైన కరెన్సీ ప్రాతిపదికన 3–4 శాతం వృద్ధిని సాధించగలమని కంపెనీ తాజాగా అంచనా వేసింది. గతంలో విడుదల చేసిన 1–3 శాతం వృద్ధి అంచనాల (గైడెన్స్‌)ను ఎగువముఖంగా సవరించింది. ఇతర విశేషాలు → క్యూ1లో కంపెనీ చరిత్రలోనే అత్యధికంగా రూ. 9,155 కోట్ల ఫ్రీ క్యాష్‌ ఫ్లో సాధించింది. ఇది 59 శాతం వృద్ధి. → ఈ ఏడాది సాధించగల వృద్ధి ఆధారంగా 15,000 నుంచి 20,000మంది వరకూ ఫ్రెషర్స్‌కు ఉపాధి కలి్పంచే వీలున్నట్లు ఇన్ఫోసిస్‌ సీఎఫ్‌వో జయేష్‌ ఎస్‌. తెలియజేశారు. → క్యూ1లో కంపెనీ చరిత్రలోనే అత్యధికంగా 4.1 బిలియన్‌ డాలర్ల విలువైన 34 భారీ డీల్స్‌ను కుదుర్చుకుంది. ఇవి 78 శాతం అధికంకాగా.. వీటిలో కొత్త కాంట్రాక్టుల వాటా 58 శాతం. → ఉద్యోగుల సంఖ్య 6 శాతం తగ్గి 3,15,332కు పరిమితమైంది. గతేడాది క్యూ1లో మొత్తం సిబ్బంది సంఖ్య 3,36,294కాగా.. జనవరి–మార్చి(క్యూ4)లో 3,17,240గా నమోదైంది. → స్వచ్ఛంద ఉద్యోగ వలసల(అట్రిషన్‌) రేటు 12.7 శాతంగా నమోదైంది. గత క్యూ1లో ఇది 17.3 శాతంకాగా.. క్యూ4లో 12.6 శాతంగా నమోదైంది.

న్యూఢిల్లీ: ఇంధన రంగ ప్రభుత్వ దిగ్గజాలు ఐవోసీ, బీపీసీఎల్, హెచ్‌పీసీఎల్‌ ప్రస్తుత ఆర్థిక సంవత్సరం(2022–23) రెండో త్రైమాసికం(జులై–సెప్టెంబర్‌)లో ఉమ్మడిగా రూ. 2,749 కోట్ల నికర నష్టాలు ప్రకటించాయి. అయితే తొలి అర్ధభాగం(ఏప్రిల్‌–సెప్టెంబర్‌)లో ఇవి మరింత అధికమై రూ. 21,201 కోట్లకు చేరాయి. ఇందుకు పెట్రోల్, డీజిల్‌ తదితర ప్రొడక్టులను తయారీ వ్యయాలకంటే తక్కువ ధరలో విక్రయించడం ప్రభావం చూపింది. అయితే క్యూ2లో ప్రభుత్వం ఎల్‌పీజీ విక్రయాలపై వీటికి ఉమ్మడిగా రూ. 22,000 కోట్ల నష్టపరిహారాన్ని చెల్లించింది. దీంతో క్యూ1(ఏప్రిల్‌–జూన్‌)తో పోలిస్తే క్యూ2లో చమురు పీఎస్‌యూల నష్టాలు పరిమితమయ్యాయి. వెరసి చమురు పీఎస్‌యూల చరిత్రలో తొలిసారి వరుసగా రెండు త్రైమాసికాలలో నికర నష్టాలు ప్రకటించిన రికార్డు నమోదైంది. స్థూల రిఫైనింగ్‌ మార్జిన్లు(జీఆర్‌ఎం) మెరుగుపడినప్పటికీ 7 నెలలుగా ధరలను సవరించకపోవడంతో నష్టాలు వాటిల్లినట్లు ప్రభుత్వ దిగ్గజాలు పేర్కొన్నాయి. కాగా.. క్యూ1లో కంపెనీ చరిత్రలోనే అత్యధికంగా రూ. 10,197 కోట్ల నికర నష్టాన్ని హెచ్‌పీసీఎల్‌ ప్రకటించింది. ఈ బాటలో బీపీసీఎల్‌ రూ. 6,263 కోట్లు, ఐవోసీ రూ. 1,995 కోట్లు చొప్పున నష్టాలు నమోదు చేయడం గమనార్హం!   ఎల్‌పీజీ సబ్సిడీ ఇలా  ప్రభుత్వం ప్రకటించిన ఎల్‌పీజీ విక్రయాల సబ్సిడీని చమురు పీఎస్‌యూలు క్యూ2 ఫలితాలలో పరిగణనలోకి తీసుకున్నాయి. ఐవోసీ అత్యధికంగా రూ. 10,800 కోట్లు అందుకోగా.. హెచ్‌పీసీఎల్‌కు రూ. 5,617 కోట్లు, బీపీసీఎల్‌కు రూ. 5,582 కోట్లు చొప్పున లభించాయి. రష్యా–ఉక్రెయిన్‌ యుద్ధం నేపథ్యంలో ద్రవ్యోల్బణానికి చెక్‌ పెట్టేందుకు వీలుగా పెట్రోల్, డీజిల్‌ ధరల సవరణను చేపట్టలేదని చమురు శాఖ మంత్రి హర్‌దీప్‌ సింగ్‌ పేర్కొన్నారు. దీంతో ఇంధన రంగ పీఎస్‌యూలకు సబ్సిడీ చెల్లింపుల ద్వారా ఆర్థిక శాఖ నుంచి మద్దతును కోరినట్లు తెలియజేశారు. 


 దేశ, విదేశాల్లో పాపులర్ అయిన క్యాబ్ సేవల నిర్వహణ సంస్థ ఉబర్ సంస్థ మరింత పీకల్లోతు నష్టాల్లో కూరుకుపోతోంది. చైనా నుంచి వ్యాపారాల్లో వైదొలిగినప్పటికీ, కంపెనీ ఆర్థిక నష్టాలు తగ్గకపోగా, మరింత పెరిగాయి. ఈ ఏడాదిలో మొదటి తొమ్మిది నెలల కాలంలో ఈ కంపెనీ 2.2 బిలియన్ డాలర్లు(రూ.14,926కోట్లకు పైగా) నష్టాలను మూటకట్టుకున్నట్టు కంపెనీకి సంబంధించిన ఓ వ్యక్తి చెప్పారు. చైనా ఆపరేషన్లు కలపన్నప్పటికీ ఉబర్ టెక్నాలజీస్ మూడో క్వార్టర్లో 800 మిలియన్ డాలర్లకు పైగా నష్టపోయినట్టు తెలిసింది. కానీ ఇదేసమయంలో రెవెన్యూలు  పెంపు కొనసాగిందని వెల్లడైంది. 2016 మొదటి తొమ్మిది నెలల కాలంలో నికర ఆదాయాలు 3.76 బిలియన్ డాలర్ల(రూ.25,517 కోట్లకు పైగా)ను కంపెనీ ఆర్జించగలిగింది.
  
 అమెరికాలో ప్రత్యర్థులందరినీ పడేసి విజయ ఢంకా మోగించి... ఆసియాలోకి ప్రవేశించిన ట్యాక్సీ అగ్రిగేటర్ ఉబెర్‌కు చైనాలో గట్టిదెబ్బే తగిలింది. బిలియన్ల కొద్దీ డాలర్లు కుమ్మరించినా చైనా మార్కెట్లో పట్టు సంపాదించలేకపోవటంతో ఈ రైడ్ దిగ్గజం ఆగస్టు 1న అక్కడ క్యాబ్ మార్కెట్లో అగ్రగామి సంస్థ దీదీ చుక్సింగ్లో ఉబర్ కంపెనీని విలీనం చేసేసింది. ఒప్పందంలో భాగంగా దీదీ 1 బిలియన్ డాలర్లను ఉబర్లో పెట్టుబడులు పెట్టింది. దీంతోనైనా కొంత నష్టాలను తగ్గించుకోవాలని కంపెనీ భావించింది. కానీ కంపెనీ నష్టాలు తగ్గకపోగా, మరింత పెరిగినట్టు తెలుస్తోంది.