తంగరడోణలో 7లక్షలు విలువ చేసే కంది, పత్తి విత్తనాలు సీజ్‌
  
 ఆస్పరి: మండలంలోని కారుమంచి, తంగరడోణ గ్రామాల్లో  శనివారం వ్యవసాయ శాఖ అధికారులు మెరుపు దాడులు చేశారు. నకిలీ, అనుమతి లేకుండా విక్రయిస్తున్న పత్తి, కంది విత్తనాలను గుర్తించి సీజ్‌ చేశారు.   మండలంలోని కారుమంచిలో నకిలీ విత్తనాలు అమ్ముతున్నారన్న సమాచారంతో ఏఓ పవన్‌ కుమార్, ఏఈఓలు నాగరాజు, జయరాం, సిబ్బందితో  కలిసి క​ృష్ణ అనే వ్యక్తి ఇంటికెళ్లి తనిఖీలు చేశారు. 14 కేజీల నకిలీ  పత్తి విత్తనాలు గుర్తించి, 1950 పీడీ యాక్ట్‌ కింద అతడిపై కేసు నమోదు చేశారు.  అలాగే తంగరడోణలో పరమేశ్వర్, సీతారామిరెడ్డి  ఎరువుల దుకాణాలపై దాడులు నిర్వహించి రూ.7లక్షలు విలువ చేసే  పత్తి, కంది విత్తనాలను సీజ్‌ చేసి 1966 సీడ్‌ యాక్ట్‌ కింద కేసు నమోదు చేశారు. సీజ్‌ చేసిన విత్తనాలను ఆలూరు ఏడీఏ రాజశేఖర్‌కు అప్పగించినట్లు ఏఓ చెప్పారు. ఎవరైనా గ్రామాల్లో, దుకాణాల్లో నకిలీ విత్తనాలు అమ్మినా, ఫిర్యాదులు అందినా కఠిన చర్యలు తప్పవని  ఏఓ హెచ్చరించారు.  నకిలీ విత్తనాలు అమ్మితే తమకు సమాచారం ఇవ్వాలని మండల ప్రజలను కోరారు.  
  


 నంద్యాల: రాష్ట్రంలో నియంత పాలన సాగుతోందని, ప్రజా సమస్యలపై పోరాడితే పీడియాక్ట్‌ను ప్రయోగిస్తానని ప్రభుత్వం బెదిరించడం తగదని పశ్చిమ రాయలసీమ పట్టభద్రుల ఎమ్మెల్సీ అభ్యర్థి వెన్నపూస గోపాల్‌రెడ్డి అన్నారు. శనివారం స్థానిక వైఎస్సార్సీపీ కార్యాలయాన్ని సందర్శించి పార్టీ నియోజకవర్గ ఇన్‌చార్జి రాజగోపాల్‌రెడ్డి, ఇతర నేతలను కలిసి మద్దతు కోరారు. ఈ సందర్భంగా ఆయన విలేకరులతో మాట్లాడుతూ..టీడీపీ అధినేత చంద్రబాబునాయుడు ఎన్నికల సమయంలో ఇచ్చిన 600 హామీల్లో ఒక్కటి కూడా నెరవేరలేదన్నారు. ఇంటింటికీ ఉద్యోగం, నిరుద్యోగ భృతి ఇవ్వాలని, రైతుల నుంచి బలవంతంగా లాక్కున్న భూములకు పరిహారం ఇవ్వాలని వామపక్ష నేతలు ఆందోళన నిర్వహిస్తే వారిని అరెస్ట్‌ చేయించి దారుణమన్నారు. ఇప్పటి వరకు ఉద్యోగులుకు పీఆర్సీ ఇవ్వలేదని గుర్తు చేశారు. రెయిన్‌గన్‌లు, దోమలపై దండయాత్ర వంటి వ్యర్థ కార్యక్రమాలను నిర్వహించి నిధులను వృథా చేస్తున్నారని విమర్శించారు. కార్యక్రమంలో వైఎస్సార్‌సీపీ నేతలు జహీర్‌బాషా, కల్లూరి రామలింగారెడ్డి, శ్రీనివాసరెడ్డి, చరణ్‌రెడ్డి, న్యాయవాదులు మాధవరెడ్డి, జాకీర్, నాగేష్, తదితరులు పాల్గొన్నారు.