విశాఖపట్నం పాస్‌పోర్ట్ కేంద్రం అధికారి ఎన్‌ఎల్‌పీ చౌదరి  
 మర్రిపాలెం (విశాఖపట్నం): పోలీసు విచారణతో సంబంధం లేకుండానే పాస్‌పోర్ట్ మంజూరు చేస్తామని విశాఖపట్నం ప్రాంతీయ పాస్‌పోర్ట్ కేంద్రం పాస్‌పోర్ట్ అధికారి ఎన్.ఎల్.పి. చౌదరి గురువారం ప్రకటించారు. సాధారణ పాస్‌పోర్ట్ సేవలను మరింత సులభతరం చేయడానికే ఈ నిర్ణయం తీసుకున్నామన్నారు. అయితే అభ్యర్థి దరఖాస్తు సమర్పించే సమయంలో ఆధార్, ఎన్నికల గుర్తింపు కార్డు, పాన్‌కార్డ్‌తో పాటు ఫారం ‘అనెక్సార్-ఐ’ను అదనంగా సమర్పించాలని చెప్పారు. ఇవన్నీ సక్రమంగా ఉంటే పోలీస్ వెరిఫికేషన్ రిపోర్టు (పీవీఆర్) లేకుండానే పాస్‌పోర్ట్ జారీ చేస్తామన్నారు. అభ్యర్థి సమర్పించిన పత్రాలు ఆన్‌లైన్‌లో పరిశీలనకు అందుబాటులో ఉండాలన్నారు. దీనికి ఎటువంటి అదనపు ఫీజులు ఉండవని స్పష్టం చేశారు.