నారా రోహిత్, నాగశౌర్య, రెజీనాలు ప్రధాన పాత్రల్లో తెరకెక్కిన రొమాంటిక్ ఎంటర్టైనర్ జ్యో అచ్యుతానంద. ఇటీవల విడుదలైన ఈ సినిమా హిట్ టాక్ సొంతం చేసుకొని మంచి వపూళ్లతో దూసుకుపోతోంది. తాజాగా ఈ సినిమాకు సంబందించిన మరో వార్త టాలీవుడ్ సర్కిల్స్లో ఆసక్తి కలిగిస్తోంది. ఈ సినిమాలో హీరోల ఇంటి సెట్లో త్వరలో సూపర్ స్టార్ మహేష్ బాబు షూటింగ్ చేయనున్నాడట.
 
 గతంలో జనతా గ్యారేజ్ కోసం వేసిన గ్యారేజ్ సెట్లో మహేష్, ఓ పాటతో పాటు ఓ యాక్షన్ సీన్ కూడా షూట్ చేయనున్నాడన్న టాక్ వినిపించింది. తాజాగా జ్యో అచ్యుతానంద సెట్లోనూ మహేష్ సందడి చేయనున్నాడన్న వార్త హాట్ టాపిక్గా మారింది. 90లలోని మిడిల్ క్లాస్ ఇంటి తరహా సెట్ వేసే ఆలోచనలో ఉన్న మురుగదాస్, జ్యో అచ్యుతానంద సెట్ నచ్చటంతో అదే సెట్లో షూట్ చేసేందుకు ప్లాన్ చేసుకుంటున్నాడట.
 
 ప్రస్తుతం చెన్నైలో షూటింగ్ జరుపుకుంటున్న ఈ సినిమా యూనిట్ త్వరలోనే హైదరాబాద్లో భారీ షెడ్యూల్ను ప్లాన్ చేస్తున్నారు. ఈ షెడ్యూల్ దాదాపు నెల రోజుల పాటు కొనసాగే అవకాశం ఉంది. మహేష్ పోలీస్ ఆఫీసర్ పాత్రలో నటిస్తున్న ఈ సినిమాలో రకుల్ ప్రీత్ సింగ్ హీరోయిన్గా నటిస్తుండగా, తమిళ నటుడు, దర్శకుడు ఎస్ జె సూర్య విలన్ రోల్లో కనిపించనున్నాడు.


 అష్టాచమ్మ సినిమాతో యంగ్ హీరో నాని, నటుడు కం దర్శకుడు అవసరాల శ్రీనివాస్ల కెరీర్ ఒకేసారి మొదలైంది. ఈ సినిమా తరువాత నాని హీరోగా సెటిల్ అవ్వగా, అవసరాల శ్రీనివాస్ మాత్రం కామెడీ పాత్రలు చేస్తూనే దర్శకుడిగా కూడా గుర్తింపు తెచ్చుకునే పనిలో ఉన్నాడు. ఇప్పటికే రెండు సినిమాలు పూర్తి చేసిన అవసరాల దర్శకుడిగా మరిన్ని సినిమాలు చేసేందుకు రెడీ అవుతున్నాడు.
 
 ప్రస్తుతం తన దర్శకత్వంలో రూపొందిన జ్యో అచ్యుతానంద సినిమా రిలీజ్ కోసం ఎదురుచూస్తున్న అవసరాల శ్రీనివాస్.. ఆ తరువాత నాని హీరోగా ఓ సినిమాను తెరకెక్కించేందుకు ప్లాన్ చేసుకుంటున్నాడు. వరుస సక్సెస్లతో నాచురల్ స్టార్గా ఎదిగిన నాని కూడా అవసరాలతో కలిసి పనిచేసేందుకు ఇంట్రస్ట్ చూపిస్తున్నాడు. రెగ్యులర్ కమర్షియల్ సినిమాలకు భిన్నమైన సినిమాలు చేసే ఈ ఇద్దరి కాంబినేషన్పై ఇండస్ట్రీ వర్గాల్లో కూడా మంచి అంచనాలే ఉన్నాయి.


 ఊహులు గుసగుసలాడే సినిమాతో దర్శకుడిగా మారిన అవసరాల శ్రీనివాస్ దర్శకత్వంలో తెరకెక్కిన రెండో సినిమా జ్యో అచ్యుతానంద. మొదటి సినిమా తరహా లోనే ఈ సినిమాను కూడా రొమాంటిక్ ఎంటర్టైనర్గా రూపొందించాడు అవసరాల శ్రీనివాస్. ట్రయాంగులర్ లవ్ స్టోరిగా తెరకెక్కుతున్న ఈ సినిమా ఇప్పుడు నలుగురి కెరీర్కు కీలకంగా మారింది.
 
 ముఖ్యంగా అభిరుచి గల నిర్మాతగా పేరు తెచ్చుకున్న సాయి కొర్రపాటి కొద్ది రోజులుగా తన స్థాయికి తగ్గ విజయాలు సాధించలేకపోతున్నారు. అందుకే జ్యో అచ్యుతానంద సక్సెస్ ఆయనకు కీలకం కానుంది. ఇక హీరోలుగా నటిస్తున్న నారా రోహిత్, నాగశౌర్యలకు కూడా ఈ సినిమా సక్సెస్ చాలా అవసరం. నటులుగా మంచి గుర్తింపు తెచ్చుకున్న ఈ ఇద్దరు సక్సెస్కు మాత్రం చాలాకాలంగా దూరంగా ఉన్నారు. ఇక హీరోయిన్గా నటిస్తున్న రెజీనా కూడా స్టార్ ఇమేజ్ కోసం ఈ సినిమానే నమ్ముకుంది.


 సోలో, ప్రతినిథి, రౌడీఫెలో లాంటి సినిమాలతో మంచి గుర్తింపు తెచ్చుకున్న యువ నటుడు నారా రోహిత్. స్టోరి సెలక్షన్ పర్ఫామెన్స్ విషయంలో మంచి మార్కులు సాధిస్తున్న రోహిత్.. లుక్ విషయంలో మాత్రం ఆకట్టుకోలేకపోతున్నాడు. కెరీర్ స్టార్టింగ్ లో కాస్త పరవాలేదనిపించినా.. ఇటీవల సినిమాల్లో బాగా లావుగా కనిపిస్తున్నాడు. ఈ ఏడాది రిలీజ్ అయిన తుంటరి, సావిత్రి, రాజా చెయ్యు వేస్తే సినిమాల్లో రోహిత్ లుక్ పై చాలా కామెంట్స్ వచ్చాయి.
 
 ఈ కామెంట్స్ రోహిత్ వరకు చేరటంతో తన నెక్ట్స్ సినిమాలకు కేర్ తీసుకుంటానంటూ ప్రకటించాడు. అంతేకాదు ఒక సందర్భంలో రోహిత్ సిక్స్ ప్యాక్ కోసం కష్టపడుతున్నాడన్న వార్తలు కూడా వినిపించాయి. అయితే ఈ వార్తలన్ని ఉత్తిదే అని తేలిపోయింది. ఇటీవల విడుదలైన జ్యో అచ్యుతానంద టైలర్ లోనూ నారా రోహిత్ బొద్దుగానే కనిపిస్తున్నాడు. కంటెంట్ పరంగా సినిమా మీద మంచి అంచనాలే ఉన్నా.. మరో సారి ఈ సినిమాకు రోహిత్ లుక్స్ మైనస్ అవుతుందేమో అన్న టాక్ వినిపిస్తోంది.