న్యూఢిల్లీ: ఆసియా జూనియర్, క్యాడెట్‌ టేబుల్‌ టెన్నిస్‌ (టీటీ) చాంపియన్‌షిప్‌లో భారత్‌కు తొలి సారి స్వర్ణ పతకం లభించింది. లావోస్‌లో మంగళవారం ముగిసిన ఈ టోర్నీలో జూనియర్‌ మిక్స్‌డ్‌ డబుల్స్‌లో పాయస్‌ జైన్‌–యశస్విని జోడీ విజేతగా నిలిచింది. ఫైనల్లో పాయస్‌–యశస్విని ద్వయం 11–9, 11–1, 10–12, 7–11, 11–8తో హాన్‌ జిన్‌యువాన్‌–కిన్‌ యుజువాన్‌ (చైనా) జోడీపై విజయం సాధించింది. అండర్‌–19 బాలుర డబుల్స్‌లో, అండర్‌–19 బాలికల సింగిల్స్‌లో, అండర్‌–19 బాలుర టీమ్‌ ఈవెంట్‌లో భారత్‌కు కాంస్య పతకాలు లభించాయి.      


 థాయ్‌లాండ్ ఓపెన్ టీటీ
 
  బ్యాంకాక్ : థాయ్‌లాండ్ ఓపెన్ క్యాడెట్, జూనియర్ టేబుల్ టెన్నిస్ చాంపియన్‌షిప్‌లో భారత బాలికల జట్లకు కాంస్య పతకాలు లభించాయి. క్యాడెట్‌తోపాటు జూనియర్ విభాగంలోనూ భారత జట్ల పోరాటం సెమీఫైనల్లో ముగిసింది. శుక్రవారం జరిగిన సెమీఫైనల్స్‌లో క్యాడెట్ జట్టు 2-3 తేడాతో హాంకాంగ్ చేతిలో... జూనియర్ జట్టు 0-3తో చైనీస్ తైపీ చేతిలో ఓడిపోయి కాంస్య పతకాలతో సంతృప్తి పడ్డాయి. ఈ టోర్నీలో భారత్ తరఫున తెలంగాణ క్రీడాకారిణులు వరుణీ జైస్వాల్, ఆకుల శ్రీజ జూనియర్  విభాగంలోపాల్గొన్నారు.