హైదరాబాద్: భారతదేశాన్ని లైఫ్ సైన్సెస్ రంగంలో గ్లోబల్ ప్రోడక్ట్ లీడర్‌గా నిలబెట్టే లక్ష్యంతో, ప్రతిష్టాత్మకమైన ఐకేపీ నాలెడ్జ్ పార్క్ (IKP Knowledge Park) ‘ఐకేపీ ఏఆర్‌కే’(IKP ARK) పేరుతో సరికొత్త వెంచర్ యాక్సిలరేషన్ ప్రోగ్రామ్‌ను ప్రారంభించింది. లోతైన శాస్త్రీయ పరిశోధనలు (Deep-Science) చేసే స్టార్టప్‌లు ఎదుర్కొంటున్న వాణిజ్యపరమైన సవాళ్లను అధిగమించడానికి ఈ ప్రోగ్రామ్ ఒక వారధిలా పనిచేయనుంది.చాలా స్టార్టప్‌లు అద్భుతమైన ఆవిష్కరణలు చేసినప్పటికీ, సరైన సహకారం, రెగ్యులేటరీ నిబంధనలపై అవగాహన లేక మధ్యలోనే ఆగిపోతున్నాయి. ఈ అంతరాన్ని తగ్గించడానికి, ఐకేపీ ఏఆర్‌కే ఒక వినూత్న నమూనాను తీసుకొచ్చింది. ఇందులో భాగంగా అనుభవజ్ఞులైన నిపుణులు నేరుగా ఆయా కంపెనీలతో కలిసి పనిచేస్తూ, వ్యాపార విస్తరణలో వ్యవస్థాపకులకు వెన్నుదన్నుగా నిలుస్తారు.ఎంపికైన ప్రతి స్టార్టప్‌కు సుమారు రూ.2 కోట్ల వరకు విలువైన ప్రయోజనాలను ఐకేపీ కల్పిస్తోంది. ఇందులో ప్రాజెక్ట్ మైలురాళ్ల ఆధారిత నిధులతో పాటు, మౌలిక సదుపాయాల కల్పన, సీడీఎస్‌సీవో, ఎఫ్‌డీఏ వంటి సంస్థల నుండి రెగ్యులేటరీ అనుమతులు పొందడంలో సాంకేతిక మద్దతు ఉంటుంది. ఐకేపీకి ఉన్న 20 ఏళ్ల సుదీర్ఘ పెట్టుబడిదారుల నెట్‌వర్క్ ద్వారా స్టార్టప్‌లు తమ వ్యాపార నమూనాలను మెరుగుపరుచుకుని నిధులు సేకరించుకునే అవకాశం కలుగుతుంది.ఈ ప్రోగ్రామ్ 12 నెలల కాలపరిమితితో మూడు దశల్లో సాగుతుంది. మొదటి దశలో వ్యాపార ప్రణాళిక (బ్లూప్రింట్) సిద్ధం చేయడం, రెండో దశలో నిర్వహణపరమైన ముప్పులను తగ్గించడం, చివరి ఎనిమిది నెలల్లో నేరుగా మార్కెట్లోకి ప్రవేశించి సిరీస్-ఎ ఫండింగ్ సాధించడంపై దృష్టి సారిస్తారు. ఈ వినూత్న పద్ధతి ద్వారా ప్రయోగశాలలోని ఆవిష్కరణలు వేగంగా ప్రజలకు చేరువవుతాయని ఐకేపీ సీఈఓ డాక్టర్ సత్య ప్రకాష్ డాష్ పేర్కొన్నారు.తొలి విడతలో భాగంగా మెడ్‌టెక్, హెల్త్‌టెక్ స్టార్టప్‌ల నుండి దరఖాస్తులను ఆహ్వానిస్తున్నారు. ప్రూఫ్ ఆఫ్ కాన్సెప్ట్ (TRL 3+) కలిగి ఉన్న సంస్థలు దరఖాస్తు చేసుకోవచ్చు. గత రెండు దశాబ్దాలుగా సుమారు 1,900 కంపెనీలకు అండగా నిలిచిన ఐకేపీ, ఈ కొత్త ప్రోగ్రామ్ ద్వారా భారతీయ స్టార్టప్ వ్యవస్థలో మరో కీలక మైలురాయిని అధిగమించనుంది.

హైదరాబాద్, బిజినెస్‌ బ్యూరో: ఐకేపీ నాలెడ్జ్‌ పార్క్‌ (ఐకేపీ) తలపెట్టిన 19వ విడత ఇంటర్నేషనల్‌ నాలెడ్జ్‌ మిలీనియం కాన్ఫరెన్స్‌ (ఐకేఎంసీ) 2025లో 150కి పైగా ఆవిష్కర్తలు, స్టార్టప్‌లు పాల్గొన్నాయి. ఈ సందర్భంగా కొత్త ఆవిష్కరణలకు తోడ్పాటునిచ్చేలా ఐకేపీ పలు కీలక ప్రకటనలు చేసింది. ఐకేపీ ఫ్యూచర్‌ ఫార్వర్డ్‌ ఫండ్‌ ద్వారా ప్రోజెన్‌ ఫుడ్స్‌ స్టార్టప్‌లో రూ. 1 కోటి వరకు ఇన్వెస్ట్‌మెంట్, ఐకేపీ ఫ్యూచర్‌ స్టార్స్‌ అవార్డ్స్‌ కింద అయిదు యువ ఆవిష్కర్తలకు రూ. 5 లక్షల చొప్పున గ్రాంట్‌ మొదలైనవి వీటిలో ఉన్నాయి. తెలంగాణ రాష్ట్ర ముఖ్యమంత్రి కార్యాలయంలో భాగమైన స్పెషల్‌ ప్రాజెక్ట్స్‌ (స్పీడ్‌) అండ్‌ ఇన్వెస్ట్‌మెంట్‌ సెల్‌ ప్రత్యేక చీఫ్‌ సెక్రటరీ జయేష్‌ రంజన్, స్ట్రాండ్‌ లైఫ్‌ సైన్సెస్‌ సహ–వ్యవస్థాపకుడు విజయ్‌ చంద్రుతో పాటు పలువురు టెక్నాలజీ ఆవిష్కర్తలు, ఎంట్రప్రెన్యూర్లు ఇందులో పాల్గొన్నారు.


 హైదరాబాద్, బిజినెస్ బ్యూరో: సస్య రక్షణ ఉత్పత్తుల తయారీలో ఉన్న అడామా హైదరాబాద్‌లోని ఐకేపీ నాలెడ్జ్‌పార్క్‌లో కొత్తగా ఫార్ములేషన్ ల్యాబ్‌ను ప్రారంభించింది. ఇప్పటికే ఇక్కడ 10 వేల చ.అ.ల్లో సైంథటిక్ ల్యాబ్, అనాలిటికల్ ల్యాబ్, స్పేలప్ ల్యాబొరేటరీ అనే మూడు విభాగాలున్నాయని.. కొత్తగా ఆర్‌అండ్‌డీ ఫార్ములేషన్ ల్యాబ్‌ను ప్రారంభించామని అడామా ఇండియా ప్రెసిడెంట్ అండ్ సీఈఓ లెవానాన్ మంగళవారం ఒక ప్రకటనలో తెలిపారు. దీంతో దేశీయ మార్కెట్‌కు, రైతులకు అవసరమైన వ్యవసాయ ఉత్పత్తులను అందించే వీలుంటుందని.. ప్రస్తుతం దేశంలో 70కి పైగా వ్యవసాయ ఉత్పత్తులను విక్రయిస్తున్నామని పేర్కొన్నారు. అడామా కేంద్ర కార్యాలయమైన ఇజ్రాయిల్ తర్వాత రెండో రీసెర్చ్ అండ్ డెవలప్‌మెంట్ (ఆర్‌అండ్‌డీ) సెంటర్‌ను హైదరాబాద్‌లోనే ఉంది.