డెహ్రడూన్‌: ఉత్తరాఖండ్‌ రాజకీయాల్లో శుక్రవారం కీలక పరిణామం చోటుచేసుకుంది. బీజేపీ బహిష్కృ నేత, రాష్ట్ర కేబినెట్ మాజీ మంత్రి హరక్ సింగ్ రావత్.. ఈ రోజు తన కోడలు అనుకృతి గుసేన్‌తో కలిసి ఢిల్లీలో కాంగ్రెస్ పార్టీలో చేరారు. కాంగ్రెస్ ప్రచార సారథి, మాజీ ముఖ్యమంత్రి హరీష్ రావత్ పార్టీ కండువా కప్పి వారిని సాదరంగా ఆహ్వానించారు.   అందుకే వెళ్లగొట్టాం: బీజేపీ ఐదు రోజుల క్రితం హరక్ సింగ్‌ను రాష్ట్ర మంత్రివర్గం నుంచి తొలగించిన బీజేపీ.. ఆరేళ్ల పాటు పార్టీ ప్రాథమిక సభ్యత్వం నుంచి బహిష్కరించింది. అసెంబ్లీ ఎన్నికలలో తన బంధువులకు టిక్కెట్లు ఇవ్వాలని పార్టీ నాయకత్వంపై ఒత్తిడి తెచ్చినందుకు ఆయనను పార్టీ నుంచి వెళ్లగొట్టినట్టు కమలం పార్టీ తెలిపింది. దీంతో ఆయన మళ్లీ సొంత గూటికి వచ్చారు. 2016లో హరీష్ రావత్ నేతృత్వంలోని కాంగ్రెస్ ప్రభుత్వాన్ని మైనారిటీలో పడేయడంలో హరక్ సింగ్‌ కీలక పాత్ర పోషించారు. మరో 9 మంది ఎమ్మెల్యేలతో కలిసి ప్రభుత్వంపై తిరుగుబాటు చేసి బీజేపీలో చేరారు. బీజేపీ వాడుకుని వదిలేసింది: రావత్‌ అయితే బీజేపీ తనను వాడుకుని వదిలేసిందని తాజాగా హరక్ సింగ్‌ ఆరోపించారు. ఈ ఎన్నికల్లో కాంగ్రెస్‌ పార్టీని పూర్తి మెజారిటీతో  గెలిపించి క్షమాపణలు కోరతానని తెలిపారు. తనపై బీజేపీ చేసిన ఆరోపణలను ఆయన ఖండించారు. బేషరతుగా కాంగ్రెస్‌లో చేరినట్టు వెల్లడించారు. పది సీట్లు గెలిపిస్తా కాగా, రావత్ బుధవారం న్యూఢిల్లీలో కాంగ్రెస్ సీనియర్ నేతలతో సమావేశమయ్యారు. తన పలుకుబడిని ఉపయోగించి కనీసం పది సీట్లు గెలిపిస్తానని కాంగ్రెస్ నాయకత్వానికి ఆయన హామీ ఇచ్చారని పీటీఐ నివేదించింది. అయితే, స్థానిక కాంగ్రెస్ పార్టీ నాయకులు, కార్యకర్తల్లోని ఒక వర్గం ఆయన పునరాగమనాన్ని వ్యతిరేకించింది. కేదార్‌నాథ్ నుంచి హరక్ సింగ్‌ను, ఆయన కోడలిని లాన్స్‌డౌన్ నుంచి పోటీకి దింపాలని కాంగ్రెస్‌ భావిస్తున్నట్టు ప్రచారం జరుగుతోంది.  ఉత్తరాఖండ్‌ అసెంబ్లీ ఎన్నికలు ఫిబ్రవరి 14న ఒకే దశలో జరగనున్నాయి. మార్చి 10న ఓట్ల లెక్కింపు చేపట్టనున్నారు. (ఇక బీజేపీకి గుడ్‌ బై: మాజీ సీఎం తనయుడు)


 న్యూఢిల్లీ: ఉత్తరాఖండ్‌కు చెందిన మాజీ మంత్రి హరక్‌ సింగ్‌ రావత్‌పై ఢిల్లీ పోలీసులు రేప్‌ కేసు నమోదుచేశారు. హరక్‌ తనను లైంగికంగా వేధించి.. అత్యాచారం చేసినట్టు 32 ఏళ్ల మహిళ ఫిర్యాదు చేసింది. దీంతో సఫ్దర్‌జంగ్‌ పోలీసులు శుక్రవారం రాత్రి ఎఫ్‌ఐఆర్ నమోదుచేశారు. ఉద్యోగం విషయమై హరక్‌ సింగ్‌ ఢిల్లీ గ్రీన్‌ పార్క్‌లోని తన ఇంటికి పిలిపించుకొని లైంగిక దాడి చేశాడని బాధిత మహిళ పోలీసులకు తెలిపినట్టు తెలిసింది. అయితే, ఆమె 15 ఏళ్ల కిందట కూడా హరక్‌సింగ్‌పై ఇదే తరహాలో ఫిర్యాదు చేసిందని పోలీసులు తెలిపారు. ఈ కేసుకు సంబంధించి మరిన్ని వివరాలు తెలియాల్సి ఉంది.
 
 ఇటీవల ఉత్తరాఖండ్‌ సీఎం హరీశ్ రావత్‌కు వ్యతిరేకంగా కాంగ్రెస్‌ పార్టీలో తిరుగుబాటు లేవదీయడంలో హరక్‌ సింగ్‌ కీలక పాత్ర పోషించారు. రావత్‌ వ్యతిరేక రెబల్‌ ఎమ్మెల్యేలకు ఆయన నేతృత్వం వహించారు. ఆయన తిరుగుబాటుతో ఉత్తరాఖండ్‌లో రాష్ట్రపతి పాలన విధించడం.. తర్వాత సుప్రీంకోర్టు ఆదేశాలతో రావత్ ప్రభుత్వాన్ని పునరుద్ధరించడం తెలిసిందే. ఈ పరిణామాల నేపథ్యంలో వ్యవసాయశాఖ మంత్రి పదవికి రాజీనామా చేసిన ఆయన బీజేపీ గూటికి చేరారు. ఆయనతోపాటు రెబల్‌ ఎమ్మెల్యేలు కూడా బీజేపీలో చేరారు.